'ಕಬಾಲಿ' ಮೇ ಅಥವಾ ಜೂನ್ ನಲ್ಲಿ ಬಿಡುಗಡೆ: ರಜನಿಕಾಂತ್

ಚೆನ್ನೈ: ಬಹು ನಿರೀಕ್ಷಿತ ಸೂಪರ್ ಸ್ಟಾರ್ ರಜನಿಕಾಂತ್ ಅವರ ಮುಂದಿನ ಭೂಗತ ಲೋಕದ ಸಿನೆಮಾ 'ಕಬಾಲಿ' ವಿಶ್ವದಾದ್ಯಂತ ಮೇ ಅಥವಾ ಜೂನ್ ನಲ್ಲಿ ತೆರೆ ಕಾಣಲಿದೆ ಎಂದು ನಟ ಹೇಳಿದ್ದಾರೆ. ಇದು ರಜನಿಕಾಂತ್ ಅವರ ೧೬೧ನೆ ಚಿತ್ರ.

ಮಂಗಳವಾರ ಪತ್ರಕರ್ತರೊಂದಿಗೆ ಮಾತನಾಡಿದ ನಟ ಮೇ ಕೊನೆಯ ವಾರ ಅಥವಾ ಜೂನ್ ಮೊದಲ ಭಾಗದಲ್ಲಿ ಸಿನೆಮಾ ಬಿಡುಗಡೆಯಾಗಲಿದೆ ಎಂದು ತಿಳಿಸಿದ್ದಾರೆ.

"ಕಬಾಲಿ ಮೇ ಕೊನೆಯ ವಾರದಲ್ಲಿ ಅಥವಾ ಜೂನ್ ಮೊದಲ ಭಾಗದಲ್ಲಿ ಬಿಡುಗಡೆಯಾಗುವ ಸಾಧ್ಯತೆಯಿದೆ" ಎಂದು ಪದ್ಮ ಭೂಷಣ ಸ್ವೀಕರಿಸಲು ನವದೆಹಲಿಗೆ ವಿಮಾನದ ಮೂಲಕ ತೆರಳುವ ಮುಂಚಿತವಾಗಿ ತಿಳಿಸಿದ್ದಾರೆ.

ನಿಜ ಜೀವನದ ಭೂಗತ ದೊರೆ 'ಕಬಾಲೀಶ್ವರಂ' ಅವರ ಮೇಲೆ ಪಾತ್ರ ಹೆಣೆದಿದ್ದು, ರಂಜಿತ್ ನಿರ್ದೇಶನದ ಈ ಚಿತ್ರದಲ್ಲಿ ರಜನೀಕಾಂತ್ ಭೂಗತ ದೊರೆಯ ಪಾತ್ರ ನಿರ್ವಹಿಸಿದ್ದಾರೆ.

ಈ ಸಿನೆಮಾದಲ್ಲಿ ದಿನೇಶ್, ದಾನಿಷ್ಕಾ, ಕಿಶೋರ್ ಮತ್ತು ಕಲೈರಸನ್ ಕೂಡ ನಟಿಸಿದ್ದಾರೆ.