ಚೆನ್ನೈ ಪ್ರವಾಹಕ್ಕೆ ನೆರವಾದ ಬೆಂಗಳೂರಿಗೆ ಧನ್ಯವಾದ ಹೇಳಿದ ನಟ ವಿಶಾಲ್

ಚೆನ್ನೈ: ಕುಂಭದ್ರೋಣ ಮಳೆಗೆ ತತ್ತರಿಸಿ ಪ್ರವಾಹಕ್ಕೆ ತುತ್ತಾಗಿರುವ ಚೆನ್ನೈ ಜನತೆಗೆ ನಿರೀಕ್ಷೆ ಮೀರಿ ಸಹಾಯ ಮಾಡಿದ ಬೆಂಗಳೂರಿಗರಿಗೆ ತಮಿಳು ನಟ ವಿಶಾಲ್ ಧನ್ಯವಾದ ಹೇಳಿದ್ದಾರೆ.

ಬೆಂಗಳೂರಿನಿಂದ ಚೆನ್ನೈಗೆ ಬಂದ ಪರಿಹಾರ ಸಾಮಗ್ರಿ ತುಂಬಿದ ಲಾರಿಗಳನ್ನು ಸ್ವತಃ ತಾವೇ ಬರ ಮಾಡಿಕೊಂಡ ನಟ ವಿಶಾಲ್ ಮತ್ತು ತಂಡದ ಸಿಬ್ಬಂದಿಗಳು ನೇರವಾಗಿ ಅವರೇ ಚೆನ್ನೈ ಜನತೆಗೆ ವಿತರಣೆ ಮಾಡುತ್ತಿದ್ದಾರೆ. ಈ ವೇಳೆ ಮಾತನಾಡಿದ ನಟ ವಿಶಾಲ್ ಬೆಂಗಳೂರಿಗರ ನೆರವನ್ನು ಮನದುಂಬಿ ಕೊಂಡಾಡಿದ್ದು, "ನಿರೀಕ್ಷೆ ಮೀರಿ ಚೆನ್ನೈಗೆ ಬೆಂಗಳೂರಿನಿಂದ ನೆರವು ಹರಿದುಬರುತ್ತಿದೆ. ಆದರೆ ಮತ್ತಷ್ಟು ಅಗತ್ಯ ವಸ್ತುಗಳು ಬೇಕಿದ್ದು, ವೈದ್ಯಕೀಯ ಪರಿಕರಗಳು ಮತ್ತು ಅಗತ್ಯ ವಸ್ತಗಳು ಬೇಕಿದೆ ಎಂದು ಇದೇ ವೇಳೆ ಮನವಿ ಮಾಡಿಕೊಂಡಿದ್ದಾರೆ.

ಪ್ರವಾಹ ಪೀಡಿತ ಚೆನ್ನೈಗೆ ಬೆಂಗಳೂರಿನ ವಿವಿಧ ಸಂಘ-ಸಂಸ್ಥೆಗಳು ಸಾಕಷ್ಟು ಪ್ರಮಾಣದಲ್ಲಿ ಪರಿಹಾರ ಸಾಮಗ್ರಿಗಳನ್ನು ಶೇಖರಿಸಿ ರವಾನಿಸುತ್ತಿದ್ದು, ಮತ್ತಷ್ಟು ದಿನಗಳ ಕಾಲ ಪರಿಹಾರ ಸಾಮಗ್ರಿಗಳ ಶೇಖರಣೆ ಮತ್ತು ರವಾನೆ ಮುಂದುವರೆಯಲಿದೆ ಎಂದು ತಿಳಿದುಬಂದಿದೆ.