ಐಟಮ್ ಡ್ಯಾನ್ಸ್ 'ಇಲಿಯಾನಾ'ಗೆ ೧.೫ ಕೋಟಿ?

ಚೆನ್ನೈ: ರಾಮ್ ಚರಣ ಅವರ ಮುಂದಿನ ತೆಲುಗು ಚಿತ್ರ 'ಬ್ರೂಸ್ ಲೀ' ನಲ್ಲಿ ಐಟಮ್ ಡ್ಯಾನ್ಸ್ ಒಂದಕ್ಕೆ ಹೆಜ್ಜೆ ಹಾಕಲು ನಟಿ ಇಲಿಯಾನ ಡಿ ಕ್ರ್ಯೂಜ್ ಅವರಿಗೆ ೧.೫ ಕೋಟಿ ಆಫರ್ ಮಾಡಲಾಗಿದೆ ಎಂದು ಬಲ್ಲ ಮೂಲಗಳಿಂದ ತಿಳಿದುಬಂದಿದೆ.

"'ಬ್ರೂಸ್ ಲೀ' ಸಿನೆಮಾದ ಒಂದು ವಿಶೇಷ ಹಾಡಿಗೆ ಹೆಜ್ಜೆ ಹಾಕಲು ಇಲಿಯಾನ ಅವರನ್ನು ಸಂಪರ್ಕಿಸಿ ೧.೫ ಕೋಟಿ ಆಫರ್ ನೀಡಲಾಗಿದೆ. ಆದರೆ ನಟಿ ಇನ್ನೂ ಒಪ್ಪಿಕೊಂಡಿಲ್ಲ" ಎಂದು ಚಲನಚಿತ್ರದ ಮೂಲಗಳು ತಿಳಿಸಿವೆ.

ಶ್ರೀನು ವೈಟ್ಲ ನಿರ್ದೇಶನದ ಈ ಚಿತ್ರದಲ್ಲಿ ರಾಕುಲ್ ಪ್ರೀತ್ ಸಿಂಗ್ ಕೂಡ ನಟಿಸುತ್ತಿದ್ದಾರೆ. ಈ ಚಿತ್ರದಲ್ಲಿ ಬ್ರೂಸ್ ಲೀ ಅಡ್ಡಹೆಸರೊತ್ತ ಆಕ್ಷನ್ ಹೀರೋ ಆಗಿ ರಾಮ್ ಚರಣ ಕಾಣಿಸಿಕೊಳ್ಳಲಿದ್ದಾರೆ.

೨೦೧೨ ರಲ್ಲಿ "ದೇವುಡು ಚೇಸಿನ ಮನುಷ್ಯಲು' ಸಿನೆಮಾದಲ್ಲಿ ಕಾಣಿಸಿಕೊಂಡಿದ್ದ ಇಲಿಯಾನ ಕಳೆದ ವಾರ ಚಿರಂಜೀವಿ ಹುಟ್ಟುಹಬ್ಬದ ಸಂಭ್ರಮಕ್ಕೆ ಹೈದರಾಬಾದಿಗೆ ಬಂದಿದ್ದರು. ಆಸಕ್ತಿದಾಯಕ ಪಾತ್ರ ಸಿಕ್ಕರೆ ತೆಲುಗು ಚಿತ್ರರಂಗಕ್ಕೆ ವಾಪಸ್ ಬರುವುದಾಗಿ ತಿಳಿಸಿದ್ದರು.