ದಿಗಂತ್ ಅಭಿನಯದ 'ವೆಡ್ಡಿಂಗ್ ಪಲಾವ್' ಟ್ರೇಲರ್ ಅನಾವರಣ ಮಾಡಿದ ಆಲಿಯಾ

ಬಾಲಿವುಡ್ ನಟಿ ಆಲಿಯಾ ಭಟ್, ಅನುಷ್ಕಾ ರಂಜನ್ ಅವರ ಅಭಿನಯದ ಚೊಚ್ಚಲ ಸಿನೆಮಾ 'ವೆಡ್ಡಿಂಗ್ ಪಲಾವ್' ಸಿನೆಮಾದ ಟ್ರೇಲರ್ ಬಿಡುಗಡೆ ಕಾರ್ಯಕ್ರಮದಲ್ಲಿ ಭಾಗವಹಿಸಿ, ಬಿಡುಗಡೆ ಮಾಡಿದ್ದಾರೆ. ಈ ಸಿನೆಮಾದ ನಾಯಕ ನಟ ಕನ್ನಡಿಗ ಗುಳಿ ಕೆನ್ನೆಯ ಸುಂದರ ದಿಗಂತ್.

ಟ್ರೇಲರ್ ಅನಾವರಣದಲ್ಲಿ ಭಾಗಿಯಾದುದ್ದಕ್ಕೆ ವಿವರಣೆ ನೀಡಿದ ಆಲಿಯಾ, "ಅನುಷ್ಕಾ ಮತ್ತು ಅವಳ ಸಹೋದರಿ ಕಂಚಿ ಮತ್ತು ನಾನು ಸಣ್ಣವರಿದ್ದಾಗ ನಟ-ನಟಿ ಆಟ ಆಡುತ್ತಿದ್ದೊ. ಅದು ಹೇಗೋ ಯಾವಾಗಲು ನಾನು ನಾಯಕನಟನಾಗಿರುತ್ತಿದ್ದೆ. ಅದಕ್ಕೆ ನಾನು ಹೀಗೆ ಡ್ರೆಸ್ ಮಾಡಿಕೊಂಡಿದ್ದೇನೆ" ಎಂದಿದ್ದಾರೆ.

ಆಲಿಯಾ ಅವರ ತಂದೆ ನಿರ್ದೇಶಕ ಮಹೇಶ್ ಭಟ್ ಕೂಡ ಅನುಷ್ಕಾ ಅವರಿಗೆ ಶುಭಾಷಯ ಕೋರಿದ್ದಾರೆ. ಈ ಸಿನೆಮಾವನ್ನು ಅನುಷ್ಕಾ ಅವರ ಪೋಷಕರಾದ ಅನು ಮತ್ತು ಶಶಿ ರಂಜನ್ ನಿರ್ಮಿಸುತ್ತಿದ್ದಾರೆ.

ದಿಗಂತ್ ಅವರಿಗೆ ಇದು ಮೊದಲ ಬಾಲಿವುಡ್ ಸಿನೆಮಾ. ರಂಗ್ ದೆ ಬಸಂತಿ, ಭಾಗ್ ಮಿಲ್ಕಾ ಭಾಗ್ ಮತ್ತು ೨ ಸ್ಟೇಟ್ಸ್ ಸಿನೆಮಾಗಳಲ್ಲಿ ಸಿನೆಮ್ಯಾಟೊಗ್ರಾಫರ್ ಆಗಿದ್ದ ಬಿನೋದ್ ಪ್ರಧಾನ್ ಅವರಿಗೆ ಇದು ಚೊಚ್ಚಲ ನಿರ್ದೇಶನದ ಚಿತ್ರ.

ಈ ಕಾರ್ಯಕ್ರಮದಲ್ಲಿ ತಾರೆಯರಾದ ಶತ್ರುಘ್ನ ಸಿನ್ಹಾ, ಜಿತೇಂದ್ರ, ಜಾಕಿ ಶ್ರಾಫ್, ಸಂಜಯ್ ಕಪೂರ್, ಶಕ್ತಿ ಕಪೂರ್ ಮತ್ತು ಡೇವಿಡ್ ಧವನ್ ಕೂಡ ಕಾಣಿಸಿಕೊಂಡರು.

ಇಲ್ಲಿದೆ ಟ್ರೇಲರ್ ನೋಡಿ.