ಪ್ರೇಯಸಿ ಜೊತೆ ಗೋವಿಂದ: 'ಮನುಷ್ಯರಿಗಿಂತ ಪ್ರಾಣಿಗಳೇ ಎಷ್ಟೋ ಮೇಲು'; ಏಕಾಂಗಿಯಾಗಿ 'ಲಾಲ್‌ಬಾಗ್‌ಚಾ ರಾಜ್' ದರ್ಶನ ಪಡೆದು ಸುನೀತಾ ಆಕ್ರೋಶ!

ಬಾಲಿವುಡ್‌ನ ಹಿರಿಯ ನಟ ಗೋವಿಂದ ಹಾಗೂ ಅವರ ಪತ್ನಿ ಸುನೀತಾ ಅಹುಜಾ ಅವರ ವೈಯಕ್ತಿಕ ಜೀವನದ ಕೋಲ್ಡ್‌ ವಾರ್ ಮತ್ತೆ ಭಾರೀ ಚರ್ಚೆಗೆ ಗ್ರಾಸವಾಗಿದೆ.

ಮುಂಬೈನ ಅತ್ಯಂತ ಪ್ರಸಿದ್ದ ʻಲಾಲ್‌ಬಾಗ್‌ಚಾ ರಾಜʼ ಗಣಪತಿಯ ದರ್ಶನದ ವೇಳೆ ನಡೆದಿರುವ ಘಟನೆಯೊಂದು ಇಬ್ಬರ ನಡುವಿನ ಮನಸ್ತಾಪವನ್ನ ಮತ್ತೊಮ್ಮೆ ಸಾರ್ವಜನಿಕವಾಗಿ ಬಯಲು ಮಾಡಿದೆ. ಗಣೇಶೋತ್ಸವದ ಶುಭ ಸಂದರ್ಭದಲ್ಲೇ ಈ ದಂಪತಿ ಪ್ರತ್ಯೇಕವಾಗಿ ಬಂದು ಗಣಪತಿಯ ದರ್ಶನ ಪಡೆದಿರುವುದು ಬಾಲಿವುಡ್‌ ಅಂಗಳದಲ್ಲಿ ತೀವ್ರ ಕುತೂಹಲಕ್ಕೆ ಕಾರಣವಾಗಿದೆ.‌

ʻಲಾಲ್‌ಬಾಗ್‌ಚಾ ರಾಜʼನ ದರ್ಶನಕ್ಕೆ ಮಂಗಳವಾರ ಬೆಳಗ್ಗೆ ಸುನೀತಾ ಅಹುಜಾ ಅವರು ಏಕಾಂಗಿಯಾಗಿ ಆಗಮಿಸಿ ಪೂಜೆ ಸಲ್ಲಿಸಿದ್ದರು. ಆದರೆ, ಅದೇ ದಿನ ಸಂಜೆ ನಟ ಗೋವಿಂದ ಅವರು ನಟಿ ಕೋಮಲ್‌ ರಾಣಿ ಜೊತೆಗೆ ಆಗಮಿಸಿ ಗಣೇಶನ ಆಶೀರ್ವಾದ ಪಡೆದ್ರು.

ಬಳಿಕ ಪಾಪರಾಜಿಗಳನ್ನು ಕಂಡ ನಟ, ‘ಗಣಪತಿ ಬಪ್ಪ ಮೊರಿಯಾ’ ಎಂದು ಕೂಗಿದರೆ, ಕೋಮಲ್, ಕ್ಯಾಮೆರಾಗಳತ್ತ ಕೈಬೀಸಿದ್ದರು. ಇವರಿಬ್ಬರ ಭೇಟಿಗೂ ಕೆಲವೇ ಗಂಟೆಗಳ ಮೊದಲು ಅವರ ಪತ್ನಿ ಸುನೀತಾ ಅಹುಜಾ ಒಬ್ಬರೇ ಲಾಲ್ ಬಾಗ್ ಚಾ ರಾಜನ ಆಶೀರ್ವಾದ ಪಡೆದು, ಪೂಜೆ ಸಲ್ಲಿಸಿದ್ದರು.

ಈ ಘಟನೆಯ ನಂತರ ಪತ್ನಿ ಸುನೀತಾ ಅಹುಜಾ ಅವರು, ‘ಮನುಷ್ಯರಿಗಿಂತ ಪ್ರಾಣಿಗಳೇ ಮೇಲು’ ಎಂದು ಮಾಧ್ಯಮಗಳ ಎದುರು ಕಿಡಿಕಾರಿದ್ದಾರೆ. ‘ಮನುಷ್ಯರನ್ನು ಎಷ್ಟೇ ಪ್ರೀತಿಸಿದರೂ ಅವರು ಮೋಸ ಮಾಡುತ್ತಾರೆ. ಪ್ರಾಣಿಗಳನ್ನು ಪ್ರೀತಿಸಿದರೆ ಅವು ನಿಮ್ಮ ಜೊತೆ ನಿಷ್ಠೆಯಿಂದ ಇರುತ್ತವೆ. ಮನುಷ್ಯರು ನಂಬಿಕೆದ್ರೋಹಿಗಳು’ ಎಂದಿದ್ದಾರೆ.

ಕೋಮಲ್‌ ರಾಣಿ ಹಾಗೂ ಗೋವಿಂದ ಪ್ರಸ್ತುತ ಹೊಸ ಸಿನಿಮಾದಲ್ಲಿ ಜೊತೆಯಾಗಿ ಅಭಿನಯಿಸುತ್ತಿದ್ದು, ಸಿನಿಮಾದ ನೆಪದಲ್ಲಿ ಅವರಿಬ್ಬರೂ ಆಗಾಗ ಸಾರ್ವಜನಿಕವಾಗಿ ಒಟ್ಟಿಗೆ ಕಾಣಿಸಿಕೊಳ್ತಿದ್ದಾರೆ. ಆದರೆ, ಇವರಿಬ್ಬರ ಬಗ್ಗೆ ಸುನೀತಾ ಅಹುಜಾ ಅವರಿಗೆ ಮೊದಲಿನಿಂದಲೂ ಅಸಮಾಧಾನವಿತ್ತು.