'Gen Z ಮದುವೆಯನ್ನು ಗಂಭೀರವಾಗಿ ಪರಿಗಣಿಸುತ್ತದೆ': ಭಾವಿ ಪತಿ ಬಗ್ಗೆ ಮನಬಿಚ್ಚಿ ಮಾತನಾಡಿದ ಸಾರಾ ತೆಂಡೂಲ್ಕರ್!

ಇತ್ತೀಚಿನ ಸಂದರ್ಶನವೊಂದರಲ್ಲಿ, ಭಾರತದ ಕ್ರಿಕೆಟ್ ದಿಗ್ಗಜ ಸಚಿನ್ ತೆಂಡೂಲ್ಕರ್ ಅವರ ಪುತ್ರಿ ಸಾರಾ ತೆಂಡೂಲ್ಕರ್ ಅವರು ತಮ್ಮ ಸಹೋದರ ಅರ್ಜುನ್ ಮತ್ತು ಸಾನಿಯಾ ಚಾಂದೋಕ್ ಅವರ ವಿವಾಹದ ಕುರಿತು ಮಾತನಾಡಿದ್ದಾರೆ. ಅರ್ಜುನ್ ಮತ್ತು ಸಾನಿಯಾ ಮಾರ್ಚ್ 5 ರಂದು ವಿವಾಹವಾದರು.

'ವೋಗ್' (Vogue) ನಿಯತಕಾಲಿಕದೊಂದಿಗೆ ಮಾತನಾಡುತ್ತಾ, ಅರ್ಜುನ್ ಅವರ ಮದುವೆಯನ್ನು ತನ್ನದೇ ಭವಿಷ್ಯದ ಮದುವೆಗೆ ಒಂದು 'ಪೂರ್ವಾಭ್ಯಾಸ' (ಟ್ರಯಲ್ ರೌಂಡ್) ಎಂದು ಬಣ್ಣಿಸಿದ ಸಾರಾ, 'ಅದು ನನಗೆ ಒಂದು ಉತ್ತಮ ಪೂರ್ವಾಭ್ಯಾಸವಾಗಿತ್ತು ಎಂದು ನನಗೆ ಅನ್ನಿಸುತ್ತದೆ. ಈಗ ನನಗೆ ಏನು ಬೇಕು ಮತ್ತು ಏನು ಬೇಡ ಎಂಬುದು ತಿಳಿದಿದೆ' ಎಂದರು.

ಬೆಳೆಯುವಾಗ ತಾನು ಮೃದುವಾದ ಬಣ್ಣದ (pastel bride) ಉಡುಪನ್ನು ಧರಿಸಿದ ವಧುವಾಗಬೇಕೆಂದೂ, ಅದ್ದೂರಿ ಹಾಗೂ ವೈಭವೋಪೇತವಾದ ಮದುವೆಯನ್ನು ಮಾಡಿಕೊಳ್ಳಬೇಕೆಂದೂ ಕನಸು ಕಾಣುತ್ತಿದ್ದೆ. ಆದರೆ, ಕಾಲಕ್ರಮೇಣ ನನ್ನ ಆಲೋಚನೆಗಳು ಬದಲಾಗಿವೆ. ಈಗ ಆಪ್ತರಷ್ಟೇ ಪಾಲ್ಗೊಳ್ಳುವ ಸರಳ ಸಮಾರಂಭವನ್ನು ಬಯಸುವುದಾಗಿ ಮತ್ತು ಸಾಂಪ್ರದಾಯಿಕ ಕೆಂಪು ಬಣ್ಣದ ಉಡುಪನ್ನೇ ಆಯ್ಕೆ ಮಾಡಿಕೊಳ್ಳುವ ಸಾಧ್ಯತೆಯಿದೆ ಎಂದೂ ತಿಳಿಸಿದರು.

'ನಾನು ತುಲಾ ರಾಶಿಯವಳು, ನಿರ್ಧಾರ ತೆಗೆದುಕೊಳ್ಳುವ ವಿಷಯದಲ್ಲಿ ಬಹಳ ಗೊಂದಲಕ್ಕೊಳಗಾಗುವವಳು. ಏನೋ ಹೇಳಲಾಗದು? ಬಹುಶಃ ನಾನು ಹಸಿರು ಬಣ್ಣವನ್ನೇ ಆಯ್ಕೆ ಮಾಡಿಕೊಳ್ಳಬಹುದು' ಎಂದರು.

ಸಂಬಂಧಗಳ ವಿಷಯದಲ್ಲಿ 'ಜೆನ್ ಝೆಡ್' ಪೀಳಿಗೆಯ ಬದ್ಧತೆಯನ್ನು ಅನೇಕರು ಪ್ರಶ್ನಿಸುತ್ತಾರಾದರೂ, ಸಂಬಂಧವು ಸರಿಯಾಗಿ ಸಾಗದಿದ್ದಾಗ ಅದರಿಂದ ಹೊರಬರುವಷ್ಟು ಗಂಭೀರವಾಗಿ ತಮ್ಮ ಪೀಳಿಗೆಯು ಮದುವೆಯನ್ನು ಪರಿಗಣಿಸುತ್ತದೆ ಎಂದು ಸಾರಾ ನಂಬುತ್ತಾರೆ.

'ಜನರು ನಿಶ್ಚಿತಾರ್ಥ ಮಾಡಿಕೊಂಡ ನಂತರ, ಮದುವೆಗೆ ಸಿದ್ಧತೆ ನಡೆಯುತ್ತಿರುವಾಗಲೇ ತಮ್ಮ ಸಂಗಾತಿಯ ಅಥವಾ ಅವರ ಕುಟುಂಬದ ನಿಜವಾದ ಸ್ವರೂಪವನ್ನು ಅರಿತುಕೊಂಡು, 'ನನ್ನಿಂದ ಇನ್ನು ಇದನ್ನು ಮುಂದುವರಿಸಲು ಸಾಧ್ಯವಿಲ್ಲ' ಎಂದು ಭಾವಿಸುವುದನ್ನು ನಾನು ಕಂಡಿದ್ದೇನೆ ಎಂದರು.

'ವಿವಾಹವಾಗುವ ಮುನ್ನವೇ ಸಂಬಂಧದಿಂದ ಹೊರಬರುವುದು ಒಂದು ಉತ್ತಮ ನಿರ್ಧಾರ ಎಂದು ನಾನು ಭಾವಿಸುತ್ತೇನೆ. ಹಿಂದಿನ ತಲೆಮಾರುಗಳವರು ತಮ್ಮ ಪರವಾಗಿ ಧ್ವನಿ ಎತ್ತಲು ಹೆಚ್ಚು ಹಿಂಜರಿಯುತ್ತಿದ್ದರು; ಆದರೆ, ಪರಿಸ್ಥಿತಿ ಸರಿಯಿಲ್ಲದಿದ್ದಾಗ ಹಾಗೆ ಮಾಡಲು 'ಜೆನ್ ಝೆಡ್' ಪೀಳಿಗೆಯವರು ಹೆಚ್ಚು ಆತ್ಮವಿಶ್ವಾಸ ಮತ್ತು ಸಬಲೀಕರಣದ ಭಾವನೆಯನ್ನು ಹೊಂದಿದ್ದಾರೆ' ಎಂದರು.

ತಮ್ಮ ಭವಿಷ್ಯದ ಸಂಗಾತಿಯಲ್ಲಿ ತಾವು ಬಯಸುವ ಗುಣಗಳ ಕುರಿತು ಮಾತನಾಡುತ್ತಾ, 'ನನ್ನ ಪೋಷಕರು ಮೊದಲು ಉತ್ತಮ ಸ್ನೇಹಿತರು. ಮನೆಯಲ್ಲಿ ಅವರ ನಡುವೆ ತಮಾಷೆಯ ಚಟುವಟಿಕೆಗಳು ಮತ್ತು ಹಗುರವಾದ ಹಾಸ್ಯದ ವಾತಾವರಣವಿರುತ್ತದೆ; ನನ್ನ ಭವಿಷ್ಯದ ಸಂಗಾತಿಯಲ್ಲೂ ಖಂಡಿತವಾಗಿಯೂ ಇಂತಹ ಗುಣವನ್ನೇ ನಾನು ಬಯಸುತ್ತೇನೆ. ಅವರ ನಡುವೆ ಅಧಿಕಾರದ ಮೇಲ್ಗೈ ಸಾಧಿಸುವ ಅಥವಾ ಪ್ರಭುತ್ವ ಮೆರೆಸುವಂತಹ ಯಾವುದೇ ಧೋರಣೆ ಇರುವುದಿಲ್ಲ, ಇದು ನಿಜಕ್ಕೂ ಅದ್ಭುತವಾದ ವಿಷಯ' ಎಂದು ಹೇಳಿದರು.

'ನಾನು ಚಿಕ್ಕವಳಿದ್ದಾಗ, ಎಲ್ಲ ಸಂಬಂಧಗಳೂ ಹೀಗೆಯೇ ಇರುತ್ತವೆ ಎಂದುಕೊಂಡಿದ್ದೆ. ಆದರೆ ಬೆಳೆಯುತ್ತಾ ಹೋದಂತೆ, ಲಾಂಗ್-ಡಿಸ್ಟೆನ್ಸ್ ಸಂಬಂಧಗಳನ್ನು ಹೇಗೆ ನಿಭಾಯಿಸುತ್ತಿದ್ದರು ಎಂಬುದರ ಬಗ್ಗೆ ನಾನು ಯೋಚಿಸಲು ಪ್ರಾರಂಭಿಸಿದೆ. 20 ವರ್ಷಗಳ ಹಿಂದೆ ಫೇಸ್‌ಟೈಮ್ (FaceTime) ಅಥವಾ ವಾಟ್ಸಾಪ್ ಸೌಲಭ್ಯವಿರಲಿಲ್ಲ, ಅಷ್ಟೇ ಅಲ್ಲದೆ ಅಂತರರಾಷ್ಟ್ರೀಯ ಕರೆಗಳೂ ದುಬಾರಿಯಾಗಿದ್ದವು' ಎಂದರು.

ಪ್ರೀತಿಯನ್ನು ಸ್ನೇಹವೆಂದು ಪರಿಗಣಿಸುತ್ತೀರಾ ಎಂದು ಕೇಳಿದಾಗ, ಸಾರಾ ನಗುತ್ತಾ 'ಖಂಡಿತವಾಗಿಯೂ' ಎಂದು ಉತ್ತರಿಸಿದರು.

ಸ್ನೇಹ ಮತ್ತು ಸೋಲ್‌ಮೇಟ್ಸ್ ಕುರಿತು ಮಾತನಾಡುತ್ತಾ, 'ರೊಮ್ಯಾಂಟಿಕ್ ಸೋಲ್‌ಮೇಟ್ಸ್ ಇರುತ್ತಾರೆ ಎಂದು ನಂಬಲು ನಾನು ಇಷ್ಟಪಡುತ್ತೇನೆ; ಆದರೆ ನನ್ನ ಅತ್ಯುತ್ತಮ ಸ್ನೇಹಿತರೇ ನೂರಕ್ಕೆ ನೂರರಷ್ಟು ನನ್ನ ನಿಜವಾದ ಸೋಲ್‌ಮೇಟ್ಸ್' ಎಂದು ಹೇಳಿದರು.

ಸಚಿನ್ ತೆಂಡೂಲ್ಕರ್ ಮತ್ತು ಅಂಜಲಿ ತೆಂಡೂಲ್ಕರ್ ಅವರು 1995ರಲ್ಲಿ ವಿವಾಹವಾದರು. 1997ರ ಅಕ್ಟೋಬರ್ 12ರಂದು ಮುಂಬೈನಲ್ಲಿ ಸಾರಾ ತೆಂಡೂಲ್ಕರ್ ಜನಿಸಿದರು. ಇವರು ದಂಪತಿಯ ಹಿರಿಯ ಮಗಳು.