ಮುಂಬೈ: ಸಲ್ಮಾನ್ ಖಾನ್ ಭೇಟಿಗೆ ಮನೆಬಿಟ್ಟು ಬಂದು ಕಾಂಪೌಂಡ್ ಗೋಡೆ ಏರಿದ ಬಾಲಕಿ!

ಮುಂಬೈ : ಬಾಲಿವುಡ್ ಸೂಪರ್ ಸ್ಟಾರ್ ಸಲ್ಮಾನ್ ಖಾನ್ ಅವರಿಂದ ಆಕರ್ಷಿತಗೊಂಡ ಬಾಲಕಿಯೊಬ್ಬಳು ಅವರನ್ನು ನೋಡಲೆಂದು  ಮಧ್ಯಪ್ರದೇಶದಿಂದ ಮನೆಬಿಟ್ಟು  ಮುಂಬೈಗೆ ಬಂದಿದ್ದು, ಬಾಂದ್ರದಲ್ಲಿನ ಪೊಸ್ ಗ್ಯಾಲಕ್ಸಿ ಅಪಾರ್ಟ್ ಮೆಂಟ್ ನ ಕಾಂಪೌಂಡ್ ಗೋಡೆ ಏರಿ ಪ್ರಯತ್ನಿಸಿದ್ದಾಳೆ.

ನಂತರ 15 ವರ್ಷದ ಆ ಬಾಲಕಿಯನ್ನು ವಶಕ್ಕೆ ಪಡೆದು  ಮಕ್ಕಳ ವಸತಿ ನಿಲಯಕ್ಕೆ ಕಳುಹಿಸಲಾಯಿತು ಎಂದು ಪೊಲೀಸರು ತಿಳಿಸಿದ್ದಾರೆ.

ಮಧ್ಯಪ್ರದೇಶದ ಬೆರಸಿಯಾ ನಿವಾಸಿದ ಈ ಬಾಲಕಿ , ಸಲ್ಮಾನ್ ಖಾನ್ ಭೇಟಿ ಸಲುವಾಗಿ ಭಾನುವಾರ ಮನೆ ಬಿಟ್ಟಿದ್ದಾಳೆ .ನಂತರ ರೈಲಿನಲ್ಲಿ ದೂರದ ಮುಂಬೈಗೆ ಬಂದಿದ್ದು, ನಿನ್ನೆ ಬೆಳಿಗ್ಗೆ ಬಾಂದ್ರಾ ನಿಲ್ದಾಣದಲ್ಲಿ ಇಳಿದುಕೊಂಡಿದ್ದಾಳೆ.

 ಬಾಂದ್ರಾದಲ್ಲಿ ಸಲ್ಮಾನ್ ಖಾನ್ ಮನೆ ಇರುವುದನ್ನು ತಿಳಿದ ಆ ಬಾಲಕಿ ,ನೇರವಾಗಿ ಗ್ಯಾಲಕ್ಸಿ ಅಪಾರ್ಟ್ ಮೆಂಟ್ ಬಳಿ ಬಂದಿದ್ದು, ಗೇಟ್ ಮೂಲಕ ಅಪಾರ್ಟ್ ಮೆಂಟ್ ನ ಆವರಣದೊಳಗೆ ಪ್ರವೇಶಿಸಲು ಯತ್ನಿಸಿದ್ದಾಳೆ. ಆದರೆ, ಸ್ಥಳದಲ್ಲಿಯೇ ಇದ್ದ ಭದ್ರತಾ ಪಡೆಗಳು ಇದನ್ನು ತಡೆದಿದ್ದಾರೆ.

ನಂತರ ಆ ಬಾಲಕಿ ಕಟ್ಟಡದ ಗೋಡೆ ಕಾಂಪೌಂಡ್ ಏರಲು  ಪ್ರಯತ್ನಿಸಿದ್ದಾಳೆ. ಮತ್ತೆ ಭದ್ರತಾ ಸಿಬ್ಬಂದಿಗಳು ಇದನ್ನು ತಡೆದಿದ್ದು, ಪೊಲೀಸರಿಗೆ ಸುದ್ದಿ ಮುಟ್ಟಿಸಿದ್ದಾರೆ. ಸ್ಥಳಕ್ಕಾಗಮಿಸಿದ ಪೊಲೀಸರು ಆ ಬಾಲಕಿಯನ್ನು   ಪೊಲೀಸ್ ಠಾಣೆಗೆ ಕರೆದುಕೊಂಡು ಹೋಗಿದ್ದಾರೆ.

 ಆಧಾರ್ ಕಾರ್ಡ್ ಆಧಾರದ ಮೇಲೆ ಆ ಬಾಲಕಿ ಬಗ್ಗೆ ಅವರ ಪೋಷಕರಿಗೆ ಮಾಹಿತಿ ನೀಡಲಾಗಿದೆ . ನಂತರ ಪ್ರಾಥಮಿಕ ವಿಚಾರಣೆ ಬಳಿಕ ಆ ಬಾಲಕಿಯನ್ನು ಮಕ್ಕಳ ವಸತಿಗೆ ಸೇರಿಸಲಾಗಿದೆ. ಮುಂಬೈಗೆ ಆಕೆಯ ಪೋಷಕರು ಬಂದ ನಂತರ ಅವರ ವಶಕ್ಕೆ ನೀಡಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ.