ದಕ್ಷಿಣ ಭಾರತದ ಚಿತ್ರಕತೆಗಳನ್ನು ನೋಡಿ ಬಾಲಿವುಡ್ ಕಲಿಯಬೇಕಿದೆ: ರಾಮ್ ಚರಣ್

ನವದೆಹಲಿ: ದಕ್ಷಿಣ ಭಾರತದ ಚಿತ್ರಕತೆಗಳನ್ನು ನೋಡಿ ಬಾಲಿವುಡ್ ಕಲಿಯಬೇಕಿದೆ ಎಂದು ನಟ ರಾಮ್ ಚರಣ್ ಹೇಳಿದ್ದಾರೆ. ಸದ್ಯ, ರಾಮ್ ತಮಿಳು ಹಿಟ್ ಚಿತ್ರವಾದ 'ತಣಿ ಒರುವನ್' ನ ತೆಲುಗು ರಿಮೇಕ್ ಚಿತ್ರದಲ್ಲಿ ಬ್ಯುಸಿಯಾಗಿದ್ದಾರೆ. 

ಇಲ್ಲಿಯವರೆಗೆ 10 ಚಿತ್ರಗಳಲ್ಲಿ ನಟಿಸಿರುವ ರಾಮ್ ಚರಣ್ ಜಂಜೀರ್ ಎಂಬ ಹಿಂದಿ ಸಿನಿಮಾದಲ್ಲಿ  ನಟಿಸಿದ್ದರು. 1973ರಲ್ಲಿ ಬಿಡುಗಡೆಯಾದ ಪ್ರಕಾಶ್ ಮೆಹ್ರಾ ನಿರ್ದೇಶನದ ಜಂಜೀರ್ ಸಿನಿಮಾದ ರಿಮೇಕ್ ಆಗಿತ್ತು ಈ ಜಂಜೀರ್ ಸಿನಿಮಾ.

ಸಿನಿಮಾ ನಿರ್ಮಾಣದ ಕೆಲವೊಂದು ಅಂಶಗಳನ್ನು ದಕ್ಷಿಣ ಭಾರತದ ಸಿನಿಮಾ ರಂಗ ಅಳವಡಿಸಿಕೊಳ್ಳಬೇಕಿದೆ. ಆದರೆ ಚಿತ್ರಕತೆ ವಿಚಾರಕ್ಕೆ ಬಂದರೆ ಬಾಲಿವುಡ್ ದಕ್ಷಿಣ ಭಾರತದ ಚಿತ್ರರಂಗದಿಂದ ಕಲಿತುಕೊಳ್ಳಬೇಕಿದೆ. ಇಲ್ಲಿರುವ ಫೈಟ್, ಆಕ್ಷನ್ ಗಳ ಬಗ್ಗೆ ಅಲ್ಲ ಡ್ರಾಮಾ ಬಗ್ಗೆ ನಾನು ಹೇಳುತ್ತಿದ್ದೀನಿ.

ದಕ್ಷಿಣ ಭಾರತದಲ್ಲಿ ಕೆಲವೇ ಕೆಲವು ಸಿನಿಮಾಗಳು ಮಾತ್ರ ಮಲ್ಟಿಪ್ಲೆಕ್ಸ್‌ಗಳಲ್ಲಿ ಬಿಡುಗಡೆಯಾಗುವಂತವುಗಳು. ಕೆಲವರಿಗೆ ಇಂಥಾ ಚಿತ್ರಗಳನ್ನು ನೋಡಲು ಸಾಧ್ಯವಾಗುವುದಿಲ್ಲ.  ಆದರೆ  ಬಾಲಿವುಡ್ ನಲ್ಲಿ ಹೆಚ್ಚಿನವು ಮಲ್ಟಿಪ್ಲೆಕ್ಸ್ ಸಿನಿಮಾಗಳೇ. ದಕ್ಷಿಣದಲ್ಲಿ ದೊಡ್ಡ ಚಿತ್ರವಾಗಲೀ, ಚಿಕ್ಕದಾಗಿರಲಿ ಎಲ್ಲರೂ ನೋಡುತ್ತಾರೆ. ಅಂದರೆ ಎಲ್ಲರೂ ನೋಡತಕ್ಕಂಥಾ ಸಿನಿಮಾಗಳು ಇಲ್ಲಿವೆ, ಜನರು ಬಂದು ನೋಡ್ತಾರೆ, ಖುಷಿ ಪಡುತ್ತಾರೆ ಎಂದು ಸುದ್ದಿ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ರಾಮ್ ಚರಣ್‌ ಹೇಳಿದ್ದಾರೆ.