ನಟಿ ಕರೀನಾಗೆ ಬೆದರಿಕೆ: ಭದ್ರತೆ ಹೆಚ್ಚಳ

ಮುಂಬೈ: ಬಾಲಿವುಡ್ ನಟಿ ಕರೀನಾ ಕಪೂರ್ ಖಾನ್‌ಗೆ ಕೆಲ ಧಾರ್ಮಿಕ ಸಂಘಟನೆಗಳಿಂದ ಬೆದರಿಕೆ ಕರೆಗಳು ಬಂದ ಹಿನ್ನಲೆಯಲ್ಲಿ ಅವರ ಭದ್ರತೆಯನ್ನು ಹೆಚ್ಚಳ ಮಾಡಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ವಿಎಚ್‌ಪಿ ಸಂಘಟನೆ ಮ್ಯಾಗಜಿನ್‌ನಲ್ಲಿ ಕರೀನಾ ಅವರ ಭಾವಚಿತ್ರ ಪ್ರಕಟಗೊಂಡ ಬಳಿಕ ಈ ಬೆದರಿಕೆ ಕರೆಗಳು ಬರಲಾರಂಭಿಸಿದ್ದು, ಇದನ್ನು ಸ್ವತಃ ಪತಿ ಸೈಫ್ ಅಲಿಖಾನ್ ಅವರ ಕುಟುಂಬದ ಮೂಲಗಳು ಸ್ಪಷ್ಟಪಡಿಸಿವೆ. ಹೀಗಾಗಿ ಪ್ರಸ್ತುತ ಕರೀನಾ ಕಪೂರ್‌ಗೆ ಇರುವ ಭದ್ರತೆಯೊಂದಿಗೇ ಇಬ್ಬರು ಬಾಡಿಗಾರ್ಡ್‌ಗಳನ್ನು ಹೆಚ್ಚುವರಿಯಾಗಿ ಸೇರ್ಪಡೆಗೊಳಿಸಲಾಗಿದೆ.

ಈ ಹಿಂದೆ ವಿಎಚ್‌ಪಿ ಸಂಘಟನೆಯ ಮ್ಯಾಗಜಿನ್ ಹಿಮಾಲಯಧ್ವನಿಯಲ್ಲಿ ಕರೀನಾ ಕಪೂರ್ ಅವರ ಭಾವಚಿತ್ರ ಪ್ರಕಟವಾಗಿತ್ತು. ಕರೀನಾ ಅವರ ಅರ್ಧ ಮುಖ ಮತ್ತು ಬುರ್ಖಾಧರಿಸಿರುವ ಮಹಿಳೆಯ ಅರ್ಧ ಮುಖವನ್ನು ಒಟ್ಟುಗೂಡಿಸಿ ಭಾವಚಿತ್ರವನ್ನು ತಯಾರಿಸಲಾಗಿತ್ತು. ಭಾರತದಲ್ಲಿ ಲವ್‌ಜಿಹಾದ್ ಪ್ರಕರಣಗಳನ್ನು ವಿರೋಧಿಸಿ ಬರೆದಿದ್ದ ಲೇಖನಕ್ಕಾಗಿ ಈ ಭಾವಚಿತ್ರವನ್ನು ಉಪಯೋಗಿಸಿಕೊಳ್ಳಲಾಗಿತ್ತು ಎಂದು ಹೇಳಲಾಗುತ್ತಿದೆ.

ವಿಎಚ್‌ಪಿ ಸಂಘಟನೆಯ ಈ ಕ್ರಮದ ವಿರುದ್ಧ ಅಸಮಾಧಾನಗೊಂಡಿದ್ದ ಕರೀನಾ ಪತಿ ಸೈಫ್ ಅಲಿಖಾನ್, ಕಾನೂನು ಕ್ರಮಕ್ಕೆ ಮುಂದಾಗಿದ್ದರು ಎಂದು ಹೇಳಲಾಗುತ್ತಿದೆ. ಇದಾದ ಬಳಿಕ ಕೆಲ ಧಾರ್ಮಿಕ ಸಂಘಟನೆಗಳು ಕರೀನಾ ಅವರಿಕೆ ಕರೆ ಮಾಡಿ ಬೆದರಿಕೆ ಹಾಕುತ್ತಿರುವುದರಿಂದ ಕರೀನಾ ಅವರ ಭದ್ರತೆಯನ್ನು ಹೆಚ್ಚಳ ಮಾಡಲಾಗಿದೆ.