ಬೆಂಗಳೂರಿನಲ್ಲಿ ಲೀಟರ್ ಪೆಟ್ರೋಲ್ ದರ 110.93 ರೂ: 10 ದಿನಗಳಲ್ಲಿ ನಾಲ್ಕನೇ ಬಾರಿ ಹೆಚ್ಚಳ

ರಾಜಧಾನಿ ಬೆಂಗಳೂರಿನಲ್ಲಿ ಇಂಧನ ದರಗಳು ಇಂದು ಮೇ 25ರಂದು ಭಾರೀ ಏರಿಕೆ ಕಂಡಿದ್ದು, ಇದರಿಂದ ಸಾರಿಗೆ ಸಂಘಟನೆಗಳು ಸಾರಿಗೆ ಕ್ಷೇತ್ರದ ಮೇಲಿನ ಭಾರವನ್ನು ಕಡಿಮೆ ಮಾಡಲು ಕರ್ನಾಟಕ ಸರ್ಕಾರ ಮಧ್ಯಪ್ರವೇಶಿಸಬೇಕು ಎಂದು ಒತ್ತಾಯಿಸಿವೆ.

ಪೆಟ್ರೋಲ್ ಮತ್ತು ಡೀಸೆಲ್ ದರಗಳನ್ನು ಇಂದು ಸೋಮವಾರ (ಮೇ 25, 2026) ಕಳೆದ ಹತ್ತು ದಿನಗಳಲ್ಲಿ ನಾಲ್ಕನೇ ಬಾರಿ ಹೆಚ್ಚಿಸಲಾಗಿದ್ದು, ಈ ಬಾರಿ ದೇಶದಾದ್ಯಂತ ಹಾಗೂ ಎಲ್ಲಾ ಮಾದರಿಗಳ ಮೇಲೂ ಪ್ರತಿ ಲೀಟರ್‌ಗೆ 2.7 ರೂಪಾಯಿಯಿಂದ 2.8ರೂಪಾಯಿಯವರೆಗೆ ಏರಿಕೆ ಮಾಡಲಾಗಿದೆ.

ಈ ಇತ್ತೀಚಿನ ಏರಿಕೆಯಿಂದ, ಮೇ 15ರಂದು ಮೊದಲ ಬಾರಿಗೆ ದರ ಹೆಚ್ಚಳವಾದ ಬಳಿಕ ನಾಲ್ಕು ಹಂತಗಳಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ಚಿಲ್ಲರೆ ದರಗಳು ಒಟ್ಟಾರೆ ಸುಮಾರು 7.5 ರೂಪಾಯಿಗೆ ಪ್ರತಿ ಲೀಟರ್‌ವರೆಗೆ ಏರಿಕೆಯಾಗಿದೆ.

ಕಳೆದ 10 ದಿನಗಳಿಂದ ನಿರಂತರವಾಗಿ ನಡೆಯುತ್ತಿರುವ ಇಂಧನ ದರ ಏರಿಕೆ ಸಾರಿಗೆ ಕ್ಷೇತ್ರ ಮತ್ತು ಸಾರ್ವಜನಿಕರ ಮೇಲೆ ದೊಡ್ಡ ಮಟ್ಟದ ಪರಿಣಾಮ ಬೀರಿದೆ. ಇದರಿಂದ ಕಾರ್ಯಾಚರಣಾ ವೆಚ್ಚಗಳು ಹೆಚ್ಚಿದ್ದು, ಅಗತ್ಯ ವಸ್ತುಗಳ ಬೆಲೆಗಳೂ ಏರಿಕೆಯಾಗುತ್ತಿವೆ.

ಕರ್ನಾಟಕ ರಾಜ್ಯ ಸಾರಿಗೆ ನಿರ್ವಾಹಕರ ಸಂಘ (KSTOA) ತಿಳಿಸಿರುವಂತೆ, ಇಂಧನ ದರಗಳ ನಿರಂತರ ಏರಿಕೆ ಸರಕು ಸಾಗಣೆ, ಕ್ಯಾಬ್‌ಗಳು, ಬಸ್ ಸೇವೆಗಳು ಮಾತ್ರವಲ್ಲದೆ ಕೃಷಿ ಕ್ಷೇತ್ರಕ್ಕೂ ಹೊರೆ ತಂದಿದ್ದು, ಇದರ ಪರಿಣಾಮವಾಗಿ ವಸ್ತುಗಳ ಬೆಲೆಗಳಲ್ಲಿ ಸರಣಿ ಏರಿಕೆ ಕಾಣಿಸುತ್ತಿದೆ.

KSTOA ಅಧ್ಯಕ್ಷ ರಾಧಾಕೃಷ್ಣ ಹೊಳ್ಳ ಸರ್ಕಾರ ತಕ್ಷಣ ಸರಿಪಡಿಸುವ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದರು.

ರಾಜ್ಯ ಸರ್ಕಾರ ಇಂಧನದ ಮೇಲೆ ವಿಧಿಸಿರುವ ತೆರಿಗೆಗಳನ್ನು ಮರುಪರಿಶೀಲಿಸಬೇಕು. ಜೊತೆಗೆ ಸಾರ್ವಜನಿಕರ ಆರ್ಥಿಕ ಭಾರವನ್ನು ಕಡಿಮೆ ಮಾಡಲು ಅನಗತ್ಯ ಸರ್ಕಾರಿ ವೆಚ್ಚಗಳನ್ನು ಕೂಡ ಕಡಿತಗೊಳಿಸಬೇಕು ಎಂದು ಹೇಳಿದ್ದಾರೆ.