ಆದಾಯ ತೆರಿಗೆ ವಿವರ ಸಲ್ಲಿಕೆಗೆ ಆಗಸ್ಟ್ 31ರ ಗಡುವು

ನವದೆಹಲಿ: ಕೇಂದ್ರ ವಿತ್ತ ಸಚಿವಾಲಯ ಭಾನುವಾರ ನೂತನ ಆದಾಯ ತೆರಿಗೆ ರಿಟರ್ನ್ ಅರ್ಜಿಗಳನ್ನು ಪ್ರಕಟಿಸಿದ್ದು, ಆದಾಯ ತೆರಿಗೆ ವಿವರಗಳನ್ನು ಸಲ್ಲಿಸುವ ದಿನಾಂಕವನ್ನು ಆಗಸ್ಟ್ 31ರರೆಗೂ ವಿಸ್ತರಿಸಿದೆ ಎಂದು ತಿಳಿದುಬಂದಿದೆ.

ಐಟಿಆರ್ 2 (income tax return) ಮತ್ತು ಐಟಿಆರ್ 2ಎ ಎಂಬ ಮೂರು ಪುಟಗಳ ಅರ್ಜಿಗಳನ್ನು ಪ್ರಕಟಿಸಲಾಗಿದ್ದು, ಅದರಲ್ಲಿ ಆದಾಯ ತರಿಗೆ ವಿವರಗಳನ್ನು ಭರ್ತಿ ಮಾಡಿ ಇಲಾಖೆಗೆ ಸಲ್ಲಿಸುವಂತೆ ವಿತ್ತ ಸಚಿವಾಲಯ ಹೇಳಿದೆ. ಅಲ್ಲದೆ ಹೊಸ ಐ-ಟಿ ರಿಟರ್ನ್ಸ್ ಅರ್ಜಿಗಳಲ್ಲಿ ವಿದೇಶೀ ಪ್ರವಾಸ, ಸುಪ್ತ ಬ್ಯಾಂಕ್ ಖಾತೆಗಳ ವಿವರಗಳನ್ನು ಬಹಿರಂಗ ಪಡಿಸಬೇಕಾಗಿಲ್ಲ ಎಂದು ಇಲಾಖೆ ತಿಳಿಸಿದೆ.

ಈ ಹಿಂದೆ ಬಿಡುಗಡೆ ಮಾಡಲಾಗಿದ್ದ ವಿದೇಶಿ ಪ್ರವಾಸ ಕುರಿತ ವಿವರಗಳನ್ನು ತುಂಬ ಬೇಕಿದ್ದ ಅರ್ಜಿಗಳನ್ನು ವಿವಾದ ಉಂಟಾದ ಹಿನ್ನಲೆಯಲ್ಲಿ ಸಚಿವಾಲಯ ಹಿಂದಕ್ಕೆ ಪಡೆದಿದೆ. ಪ್ರಸ್ತುತ ಸಚಿವಾಲಯ ಬಿಡುಗಡೆ ಮಾಡಿರುವ ಈ ನೂತನ ಅರ್ಜಿಯಲ್ಲಿ ಕೇವಲ ಪಾಸ್ ಪೋರ್ಟ್ ವಿವರ ಮಾತ್ರ ಸಲ್ಲಿಸಬೇಕಿದೆ.