ಷೇರು ಮಾರುಕಟ್ಟೆ ಚೇತರಿಕೆ

ಸೋಮವಾರದ ಭಾರಿ ಕುಸಿತದಿಂದ ಚೇತರಿಸಿಕೊಂಡಿರುವ ಭಾರತದ ಷೇರು ಮಾರುಕಟ್ಟೆಗಳು ಮಂಗಳವಾರ ಗಣನೀಯ ಏರಿಕೆ ದಾಖಲಿಸಿದವು. ಜಿಎಸ್‍ಟಿ ಮಸೂದೆ ಜಾರಿಗೆ ಕೇಂದ್ರ ಸರ್ಕಾರ ವಿಶೇಷ ಅಧಿವೇಶನ ಕರೆಯಲಿದೆ ಎಂಬ ಆಶಾವಾದದೊಂದಿಗೆ ಹೂಡಿಕೆದಾರರು ರಿಯಾಲ್ಟಿ, ಲೋಹ, ಬ್ಯಾಂಕಿಂಗ್ ಷೇರುಗಳನ್ನು ಹೆಚ್ಚು ಖರೀದಿಸಿದರು. ಇದರಿಂದ ಮುಂಬೈ ಷೇರು ಮಾರುಕಟ್ಟೆ ಸೂಚ್ಯಂಕ ಸೆನ್ಸೆಕ್ಸ್ 290.82 ಅಂಕ ಏರಿಕೆಯೊಂದಿಗೆ 26,032.38ಕ್ಕೆ ವಹಿವಾಟು ಮುಗಿಸಿತು. ದಿನದ ಮಧ್ಯಾವಧಿಯಲ್ಲಿ ಡಾಲರ್ ವಿರುದ್ಧ ರುಪಾಯಿ ಮೌಲ್ಯ 76 ಪೈಸೆ ಏರಿಕೆ ಕಂಡಿದೆ.

ವಹಿವಾಟು 826.35 ಅಂಕಗಳ ಏರಿಳಿತ ಕಂಡಿತು. ಅಂತಿಮವಾಗಿ 26 ಸಾವಿರಕ್ಕಿಂತಲೂ ಹೆಚ್ಚು ದಿನದಂತ್ಯ ಕಾಣುವಲ್ಲಿ ಸಫಲವಾಯಿತು. ಸೆನ್ಸೆಕ್ಸ್ ಗಳಿಕೆಯೊಂದಿಗೆ ವಹಿವಾಟು ಆರಂಭಿಸಿತು. ಒಂದು ಹಂತದಲ್ಲಿ ದಿನದ ಗರಿಷ್ಠ 26,124.83ರವರೆಗೂ ಏರಿಕೆ ಕಂಡಿತ್ತು. ನಂತರ ಕುಸಿಯುತ್ತಾ ಬಂದಿತು. ದಿನದ ಕನಿಷ್ಠ 25,298.42ರವರೆಗೂ ಇಳಿದಿತ್ತು. ದಿನದ ಮಧ್ಯಾವಧಿಯಲ್ಲಿ ಭಾರಿ ನೆಗೆತ ಕಂಡು ಗಳಿಕೆಯೊಂದಿಗೆ ವಹಿವಾಟು ಮುಗಿಯಿತು.

ರಾಷ್ಟ್ರೀಯ ಷೇರು ಮಾರುಕಟ್ಟೆ ಸೂಚ್ಯಂಕ ನಿಫ್ಟಿ 71.70 ಅಂಕ ಏರಿಕೆಯೊಂದಿಗೆ 7,880.70ಕ್ಕೆ ತಲುಪಿತು. ಸೆನ್ಸೆಕ್ಸ್ ಗುಂಪಿನ ಷೇರುಗಳ ಪೈಕಿ ವೇದಾಂತ, ಟಾಟಾ ಮೋಟಾರ್ಸ್, ಕೋಲ್ ಇಂಡಿಯಾ ಐಸಿಐಸಿಐ ಬ್ಯಾಂಕ್, ಆ್ಯಕ್ಸಿಸ್ ಬ್ಯಾಂಕ್, ಎನ್‍ಟಿಪಿಸಿ, ಟಾಟಾ ಸ್ಟೀಲ್, ಗೇಲ್, ಎಸ್ ಬಿಐ, ಆರ್‍ಐಎಲ್ ಸೇರಿದಂತೆ 22 ಷೇರುಗಳು ಗಳಿಕೆ ಕಂಡವು. ರಿಯಾಲ್ಟಿ, ಲೋಹ, ತೈಲ ಮತ್ತು ಅನಿಲ ಸಾರ್ವಜನಿಕ ವಲಯದ ಕಂಪನಿಗಳು ಮತ್ತು ಬ್ಯಾಂಕ್ ಸೂಚ್ಯಂಕಗಳು ಏರಿಕೆ ದಾಖಲಿಸಿದವು. ರಿಟೇಲ್ ಹೂಡಿಕೆದಾರರು ಮಧ್ಯಮ ಮತ್ತು ಸಣ್ಣ ಬಂಡವಾಳ ಷೇರುಗಳಲ್ಲಿ ಹಣ ಹೂಡಿಕೆ ಮಾಡಿದರು. ಇದರಿಂದ ಈ ಗುಂಪಿನ ಸೂಚ್ಯಂಕ ಶೇ.1.99ರಷ್ಟು ಏರಿತು