ಬಡ್ಡಿ ದರ ಯಥಾಸ್ಥಿತಿ

ಮುಂಬೈ: ಗೃಹ, ವಾಹನ ಸಾಲ ಪಡೆದವರಿಗೆ ಈ ಬಾರಿ ನಿರಾಶೆ. ಭಾರತೀಯ ರಿಸರ್ವ್ ಬ್ಯಾಂಕ್(ಆರ್‍ಬಿಐ) ಸಾಲದ ಮೇಲಿನ ಬಡ್ಡಿ ದರದಲ್ಲಿ ಯಥಾಸ್ಥಿತಿ ಕಾಪಾಡಿಕೊಂಡಿದೆ. ಮಂಗಳವಾರ ಪ್ರಕಟವಾದ ತನ್ನ ದ್ವೈಮಾಸಿಕ ಹಣಕಾಸು ನೀತಿ ಪರಾಮರ್ಶೆಯಲ್ಲಿ ಆರ್‍ಬಿಐ ರೆಪೋ  ಹಾಗೂ ರಿವರ್ಸ್ ರೆಪೋ ದರದಲ್ಲಿ ಯಾವುದೇ ಬದಲಾವಣೆ ಮಾಡಿಲ್ಲ .
ಆದರೆ, ಕಳೆದ ಬಾರಿಯ ಬಡ್ಡಿ ದರ ಇಳಿಕೆಯ ಅನುಕೂಲವನ್ನು ಗ್ರಾಹಕರಿಗೆ ವರ್ಗಾಯಿಸದೇ ಇರುವ ಬ್ಯಾಂಕುಗಳ ನಿಲುವಿಗೆ ಆರ್‍ಬಿಐ ಗವರ್ನರ್ ರಘುರಾಂ ರಾಜನ್ ಕೆಂಡಕಾರಿದ್ದಾರೆ. ಸಾಲದ ಮೇಲಿನ ವೆಚ್ಚ ಹೆಚ್ಚಾಗಿರುವ ಕಾರಣ  ಬಡ್ಡಿ ದರ ಇಳಿಕೆ ಮಾಡಿಲ್ಲ ಎಂಬ ಬ್ಯಾಂಕ್ಗಳ ವಾದವನ್ನು  `ಮೂರ್ಖತನ ಎಂದು ಹೇಳಿದ್ದಾರೆ . ಆರ್‍ಬಿಐ ಒತ್ತಡಕ್ಕೆ ಕೊನೆಗೂ ಮಣಿದ ಎಸ್‍ಬಿಐ ಹಾಗೂ ಎಚ್‍ಡಿಎಫ್ ಸಿ ಬ್ಯಾಂಕುಗಳುಸಾಲದ ಮೇಲಿನ ಬಡ್ಡಿ ದರವನ್ನು ಶೇ.0.15 ಇಳಿಕೆ ಮಾಡಿವೆ. ಹೀಗಾಗಿ ಈ ಬ್ಯಾಂಕ್ ಗಳ ಬಡ್ಡಿ  ದರ  ಶೇ.10ರಿಂದ ಶೇ.9.85ಕ್ಕಿಳಿದಿದೆ. ಬಡ್ಡಿ ದರ ಏರಿಕೆಯಿಲ್ಲ: ದೇಶದ ಹಲವೆಡೆ ಸುರಿದ ಅಕಾಲಿಕ ಮಳೆಯು ಆಹಾರ ವಸ್ತುಗಳ ದರವನ್ನು ಗಗನಕ್ಕೇರಿಸಬಹುದು ಎಂಬ ಆತಂಕದ ಹಿನ್ನೆಲೆಯಲ್ಲಿ ಆರ್‍ಬಿಐ ಬಡ್ಡಿ ದರದಲ್ಲಿ ಇಳಿಕೆ ಮಾಡಲಿಲ್ಲ. ಹಾಗಾಗಿ ರೆಪೋ  ದರ ಶೇ.7.5 ಹಾಗೂ ನಗದು ಮೀಸಲು ಅನುಪಾತ ಶೇ.4 ಆಗಿಯೇ  ಮುಂದುವರಿಯಲಿದೆ.