ಹೋಟೆಲ್ ಬಿಲ್ ಕಟ್ಟಲಾಗದೆ ಬೀದಿಯಲ್ಲೆ ಕಾಲ ಕಳೆದ ಆಟಗಾರರು: ಮತ್ತೆ ಮುಜುಗರಕ್ಕೆ ಒಳಗಾದ ಪಾಕಿಸ್ತಾನ ತಂಡ!

ಕರಾಚಿ: ಆಸ್ಟ್ರೇಲಿಯಾದ ಕೆನ್‌ಬೆರಾದಲ್ಲಿ ಪಾಕಿಸ್ತಾನದ ಹಾಕಿ ತಂಡ ವಾಸ್ತವ್ಯ ಹೂಡಬೇಕಿದ್ದ ಹೋಟೆಲ್‌ಗೆ ಪಾಕಿಸ್ತಾನ ಹಾಕಿ ಫೆಡರೇಷನ್ ಹಣ ಪಾವತಿಸದ ಕಾರಣ ಬುಕ್ಕಿಂಗ್ ರದ್ದುಮಾಡಲಾಯಿತು. ಪರಿಣಾಮ ರಾಜಧಾನಿ ಕೆನ್‌ಬೆರಾ ತಲುಪಿದ ಆಟಗಾರರು ಗಂಟೆಗಟ್ಟಲೆ ರಸ್ತೆ ಬದಿ ಕಳೆಯಬೇಕಾಯಿತು.

ಆರ್ಥಿಕ ಮುಗ್ಗಟ್ಟಿನ ಕಾರಣ ಪಾಕಿಸ್ತಾನ ಹಾಕಿ ಫೆಡರೇಷನ್‌ ಹಣ ಪಾವತಿಸಿರಲಿಲ್ಲ. ತಂಡ ಮತ್ತು ಸಿಬ್ಬಂದಿ ಕಳೆದ ವಾರ ಆಸ್ಟ್ರೇಲಿಯಾಕ್ಕೆ ಹೊರಟಾಗ ಕೆನ್‌ಬೆರಾದಲ್ಲಿ ಬುಕ್‌ ಮಾಡಲಾಗಿದ್ದ ಫೋರ್‌ಸ್ಟಾರ್ ಹೋಟೆಲ್‌ಗೆ ಪಾಕಿಸ್ತಾನದ ಕ್ರೀಡಾ ಮಂಡಳಿ ಮತ್ತು ಪಾಕಿಸ್ತಾನ ಹಾಕಿ ಫೆಡರೇಷನ್ ಹಣ ಪಾವತಿಸಲಿದೆ ಎಂದು ಹೇಳಲಾಗಿತ್ತು. ಆದರೆ ಹಣ ಪಾವತಿಸದ ಕಾರಣ ಬೀದಿಬದಿ ಓಡಾಡಿ ಸಮಯ ಕಳೆದರು ಎಂದು ತಂಡದ ಆಪ್ತ ಮೂಲಗಳು ತಿಳಿಸಿವೆ. ಕೊನೆಗೂ ತಂಡಕ್ಕೆ ಅಲ್ಲಿ ವ್ಯವಸ್ಥೆ ಮಾಡಲಾಯಿತು.

ಮುಖ್ಯ ತರಬೇತುದಾರ ತಕ್ಷಣವೇ ತಹೀರ್ ಜಮಾನ್ ಪಾಕಿಸ್ತಾನದ ಅಧಿಕಾರಿಗಳನ್ನು ಸಂಪರ್ಕಿಸಲು ಪ್ರಯತ್ನಿಸಿದರು, ಆದರೆ ಸಮಯದ ವ್ಯತ್ಯಾಸ ಮತ್ತು ಹಣದ ಕೊರತೆಯಿಂದಾಗಿ ಗಂಟೆಗಟ್ಟಲೆ ಅವರಿಗೆ ಯಾವುದೇ ಪರಿಹಾರ ಸಿಗಲಿಲ್ಲ. ದೀರ್ಘ ಪ್ರಯಾಣದ ನಂತರ, ಆಟಗಾರರಿಗೆ ವಿಶ್ರಾಂತಿ ಸ್ಥಳ ಅಥವಾ ಆಹಾರವೂ ಇರಲಿಲ್ಲ. ಕೊನೆಗೆ, ಸಾಕಷ್ಟು ಪ್ರಯತ್ನದ ನಂತರ, ಹೋಟೆಲ್ ಸೀಮಿತ ಸಂಖ್ಯೆಯ ಕೊಠಡಿಗಳನ್ನು ಒದಗಿಸಿದೆ. ಇದರಿಂದ ಇಬ್ಬರು ಅಥವಾ ಮೂವರು ಆಟಗಾರರು ಒಂದೇ ಕೊಠಡಿಯನ್ನು ಹಂಚಿಕೊಂಡಿದ್ದಾರೆ. ಮರುದಿನ, ತಂಡವು ಮೈದಾನಕ್ಕೆ ಮರಳಿದೆ. ಅಲ್ಲಿ ಅವರು ಆಸ್ಟ್ರೇಲಿಯಾ ವಿರುದ್ಧ 2-3 ಅಂತರದಿಂದ ಸೋತಿದ್ದಾರೆ.

ತಂಡವು ಕೆನ್‌ಬೆರಾ ತಲುಪಿದಾಗ ಹೋಟೆಲ್‌ನಲ್ಲಿ ಬುಕಿಂಗ್ ಆಗಿರಲಿಲ್ಲ. ತಂಡದ ಹೆಡ್‌ ಕೋಚ್‌ ತಾಹಿರ್ ಜಮಾನ್ ಅವರು ಕಾಲಮಾನ ವ್ಯತ್ಯಾಸದ ಕಾರಣ ಪಿಎಸ್‌ಬಿ ಮತ್ತು ಪಿಎಚ್‌ಎಫ್‌ ಅಧಿಕಾರಿಗಳ ಜೊತೆ ಸಂಪರ್ಕ ಸಾಧಿಸಲು ಸಮಸ್ಯೆಗಳನ್ನು ಎದುರಿಸಬೇಕಾಯಿತು ಎನ್ನಲಾಗಿದೆ. ನಂತರ ಅವರು ಮೊಬೈಲ್ ಸಂದೇಶ ಕಳುಹಿಸಿದರು.

ಈ ಪ್ರಕರಣ ಪಾಕಿಸ್ತಾನದ ರಾಷ್ಟ್ರೀಯ ಕ್ರೀಡೆಗೆ ಇರಿಸುಮುರಿಸು ಉಂಟುಮಾಡಿದೆ. ಈ ಪ್ರವಾಸದಲ್ಲಿ ತಂಡವು ನಿಯಮಿತ ವ್ಯವಸ್ಥಾಪಕರಿಲ್ಲದೆ ಪ್ರಯಾಣಿಸುತ್ತಿದೆ. ಮಾಜಿ ಒಲಿಂಪಿಯನ್ ಅಂಜುಮ್ ಸಯೀದ್ ಅವರನ್ನು ತೆಗೆದುಹಾಕಲಾಗಿದೆ. ವಿಮಾನದಲ್ಲಿ ಧೂಮಪಾನ ಮಾಡಿದ ಕಾರಣ ಮತ್ತು ವಿಮಾನ ನಿಲ್ದಾಣದ ಭದ್ರತಾ ಸಿಬ್ಬಂದಿಯೊಂದಿಗೆ ವಾಗ್ವಾದ ನಡೆಸಿದ ಆರೋಪದ ಮೇಲೆ ಅವರನ್ನು ಮ್ಯಾನೇಜರ್​ ಸ್ಥಾನದಿಂದ ತೆಗೆದುಹಾಕಲಾಗಿದೆ ಎಂದು ವರದಿಯಾಗಿದೆ. ಈ ಕಾರಣದಿಂದ ಈ ಬಾರಿ ಅವರನ್ನು ತಂಡದೊಂದಿಗೆ ಕಳುಹಿಸಿಲ್ಲ. ಮ್ಯಾನೇಜರ್ ಇಲ್ಲದೆ ಪಾಕ್ ತಂಡ ಆಸ್ಟ್ರೇಲಿಯಾಗೆ ತೆರಳಿತ್ತು.