ಇರಾನ್ ಮೇಲೆ ಅಮೆರಿಕ ನೌಕಾಪಡೆ ದಿಗ್ಬಂಧನ ಜಾರಿ; ಬಂದರುಗಳಲ್ಲಿ ನಿರ್ಬಂಧ ಖಚಿತಪಡಿಸಿದ ಯುಕೆ!

ಟೆಹ್ರಾನ್: ಅಮೆರಿಕದ ಸೈನಿಕ ನೌಕಾಪಡೆಯಿಂದ ಇರಾನ್ ವಿರುದ್ಧ ಹೇರಲಾದ ನೌಕಾ ನಿರ್ಬಂಧವು, ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನಿಗದಿಪಡಿಸಿದ್ದ ಗಡುವು ಮುಗಿದ ನಂತರ ಅಧಿಕೃತವಾಗಿ ಜಾರಿಯಾಗಿದೆ.

ನಿರ್ಬಂಧ ಆರಂಭವಾದುದನ್ನು ದೃಢಪಡಿಸಿದ ಯುನೈಟೆಡ್ ಕಿಂಗ್‌ಡಮ್ ಮೆರಿಟೈಮ್ ಟ್ರೇಡ್ ಆಪರೇಷನ್ಸ್ (UKMTO) ಸಂಸ್ಥೆ, “ಇರಾನ್‌ನ ಬಂದರು ಮತ್ತು ಕರಾವಳಿ ಪ್ರದೇಶಗಳಿಗೆ ಸಮುದ್ರ ಮಾರ್ಗದ ಪ್ರವೇಶದ ಮೇಲೆ ನಿರ್ಬಂಧಗಳನ್ನು ಜಾರಿಗೊಳಿಸಲಾಗುತ್ತಿದೆ.ಇದರಲ್ಲಿ ಅರೇಬಿಯನ್ ಗಲ್ಫ್, ಒಮಾನ್ ಕೊಲ್ಲಿಯು ಹಾಗೂ ಹೋರ್ಮುಜ್ ಜಲಸಂಧಿಯ ಪೂರ್ವ ಭಾಗದ ಅರೇಬಿಯನ್ ಸಮುದ್ರದ ತೀರ ಪ್ರದೇಶಗಳೂ ಸೇರಿವೆ” ಎಂಬ ವರದಿಗಳನ್ನು ತಮಗೆ ಲಭಿಸಿವೆ ಎಂದು ತಿಳಿಸಿದೆ.

UKMTO ಪ್ರಕಾರ, ಈ ಪ್ರವೇಶ ನಿರ್ಬಂಧಗಳು ಯಾವುದೇ ಧ್ವಜದಡಿಯಲ್ಲಿ ಸಂಚರಿಸುವ ಹಡಗುಗಳಿಗೂ ಸಮಾನವಾಗಿ ಅನ್ವಯವಾಗುತ್ತವೆ. ವಿಶೇಷವಾಗಿ ಇರಾನ್‌ನ ಬಂದರುಗಳು, ತೈಲ ಟರ್ಮಿನಲ್‌ಗಳು ಅಥವಾ ಕರಾವಳಿ ಸೌಲಭ್ಯಗಳೊಂದಿಗೆ ವ್ಯವಹರಿಸುವ ಹಡಗುಗಳಿಗೆ ಇದು ಅನ್ವಯಿಸುತ್ತದೆ. ಆದರೆ, ಇರಾನ್‌ಗೆ ಸಂಬಂಧಿಸದ ಗಮ್ಯಸ್ಥಾನಗಳಿಗೆ ಅಥವಾ ಅಲ್ಲಿಂದ ಹೋರ್ಮುಜ್ ಜಲಸಂಧಿಯ ಮೂಲಕ ಸಾಗುವ ಹಡಗುಗಳ ಸಂಚಾರವನ್ನು ಈ ಕ್ರಮಗಳು ತಡೆಯುತ್ತಿರುವುದಾಗಿ ವರದಿಯಾಗಿಲ್ಲ.

ಅಮೆರಿಕ ಮತ್ತು ಇರಾನ್ ಪ್ರತಿನಿಧಿ ಮಂಡಳಿಗಳ ನಡುವಿನ ಮಾತುಕತೆಗಳು ಸಂಪೂರ್ಣವಾಗಿ ವಿಫಲವಾದ ಹಿನ್ನೆಲೆಯಲ್ಲಿ ಈ ಅಪೂರ್ವ ಕ್ರಮ ಕೈಗೊಳ್ಳಲಾಗಿದೆ. ಯಾವುದೇ ತೀರ್ಮಾನಕ್ಕೆ ಬರದೆ ಮಾತುಕತೆ ಮುಕ್ತಾಯವಾದ ತಕ್ಷಣ, ಅಧ್ಯಕ್ಷ ಟ್ರಂಪ್ ಹೋರ್ಮುಜ್ ಜಲಸಂಧಿಗೆ ಪ್ರವೇಶಿಸುವ ಅಥವಾ ಅಲ್ಲಿಂದ ಹೊರಡುವ ಎಲ್ಲಾ ಹಡಗುಗಳ ಮೇಲೆ ನೌಕಾ ನಿರ್ಬಂಧ ಹೇರುವ ಆದೇಶ ಹೊರಡಿಸಿದರು. “ಈ ಕ್ಷಣದಿಂದಲೇ, ವಿಶ್ವದಲ್ಲೇ ಅತ್ಯುತ್ತಮವಾದ ಅಮೆರಿಕದ ನೌಕಾಪಡೆ, ಹೋರ್ಮುಜ್ ಜಲಸಂಧಿಗೆ ಪ್ರವೇಶಿಸಲು ಅಥವಾ ಅಲ್ಲಿಂದ ಹೊರಡಲು ಯತ್ನಿಸುವ ಎಲ್ಲ ಹಡಗುಗಳ ಮೇಲೆ ನೌಕಾ ನಿರ್ಬಂಧ (BLOCKADING) ಜಾರಿಗೊಳಿಸುವ ಪ್ರಕ್ರಿಯೆಯನ್ನು ಆರಂಭಿಸಲಿದೆ,” ಎಂದು ಅಧ್ಯಕ್ಷರು ಘೋಷಿಸಿದ್ದಾರೆ.