ಮಹಾತ್ಮಾ ಗಾಂಧಿ ಅಹಿಂಸಾವಾದಿ, ಶಾಂತಿಪ್ರಿಯ, ಹಾಗೆಂದು ಕೆಣಕಿದರೆ ಭಾರತ ಸುಮ್ಮನಿರಲ್ಲ...: ಅಂತರರಾಷ್ಟ್ರೀಯ ಸಮುದಾಯಕ್ಕೆ Shashi Tharoor

ನವದೆಹಲಿ: ಪಾಕಿಸ್ತಾನ ತನ್ನ ದೇಶದಲ್ಲಿ ನಿರ್ಮಿಸಲಾಗಿರುವ ಭಯೋತ್ಪಾದಕ ನಿರ್ವಾಹಕರನ್ನು ನಿರ್ಮೂಲನೆ ಮಾಡಲು ನಿರ್ಧರಿಸುವವರೆಗೆ ಅದರೊಂದಿಗೆ ಯಾವುದೇ ಮಾತುಕತೆ ಸಾಧ್ಯವಿಲ್ಲ ಎಂದು ವಿದೇಶಗಳಿಗೆ ತೆರಳಿರುವ ಸರ್ವಪಕ್ಷ ನಿಯೋಗದ ನೇತೃತ್ವ ವಹಿಸಿರುವ ಕಾಂಗ್ರೆಸ್ ಸಂಸದ ಶಶಿ ತರೂರ್ ಅಂತರರಾಷ್ಟ್ರೀಯ ಸಮುದಾಯಕ್ಕೆ ಸ್ಪಷ್ಟ ಸಂದೇಶ ರವಾನಿಸಿದ್ದಾರೆ.

ವಿವಾದಗಳನ್ನು ಮಾತುಕತೆಯ ಮೂಲಕವೇ ಪರಿಹರಿಸಿಕೊಳ್ಳಬೇಕು ಎಂದು ಭಾರತ ಅರ್ಥಮಾಡಿಕೊಂಡಿದೆ, ಆದರೆ ಹಣೆಯ ಕಡೆಗೆ ಗನ್ ಹಿಡಿದಾಗಲೂ ಭಾರತ ಮಾತುಕತೆಯಲ್ಲಿ ನಂಬಿಕೆ ಇಡುವುದಿಲ್ಲ ಎಂದು ತರೂರ್ ತಿಳಿಸಿದ್ದಾರೆ.

ಕೊಲಂಬಿಯಾ ಕೌನ್ಸಿಲ್ ಫಾರ್ ಇಂಟರ್ನ್ಯಾಷನಲ್ ರಿಲೇಶನ್ಸ್‌ನಲ್ಲಿ ಚಿಂತನಾ ನಾಯಕರೊಂದಿಗೆ ನಡೆದ ಚರ್ಚೆಯ ಸಂದರ್ಭದಲ್ಲಿ ಮಾತನಾಡಿರುವ ಶಶಿ ತರೂರ್, ಮಹಾತ್ಮಾ ಗಾಂಧಿಯವರು ಸಹ ಶಾಂತಿಯಲ್ಲಿ ನಂಬಿಕೆ ಇಟ್ಟಿದ್ದರು ಆದರೂ, ಅವರು ಬ್ರಿಟಿಷರ ವಿರುದ್ಧ ಸ್ವಾತಂತ್ರ್ಯ ಹೋರಾಟವನ್ನು ಮುನ್ನಡೆಸಿದರು ಎಂದು ಹೇಳಿದ್ದಾರೆ.

"ನಮ್ಮ ದೃಷ್ಟಿಕೋನವನ್ನು ನೀವು ಅರ್ಥಮಾಡಿಕೊಳ್ಳಬೇಕೆಂದು ನಾನು ಬಯಸುತ್ತೇನೆ; ಶಾಂತಿಯ ಮಹತ್ವದ ಬಗ್ಗೆ ನಾವು ನಿಮ್ಮೊಂದಿಗೆ ಭಿನ್ನಾಭಿಪ್ರಾಯ ಹೊಂದಿಲ್ಲ. ನಾವು ಮಹಾತ್ಮಾ ಗಾಂಧಿಯವರ ಭೂಮಿಗೆ ಸೇರಿದವರು, ಅವರು ನಮಗೆ ಶಾಂತಿ, ಅಹಿಂಸೆಯ ಮಹತ್ವವನ್ನು ಕಲಿಸಿದರು". ಆದರೆ ಅದೇ ಸಮಯದಲ್ಲಿ, ನಮಗೆ, ಶಾಂತಿಯು ಸ್ವಾಭಿಮಾನದೊಂದಿಗೆ ಇರಬೇಕು ಮತ್ತು ಸ್ವಾತಂತ್ರ್ಯ ಭಯ ಮುಕ್ತವಾಗಿರಬೇಕು. ಮಹಾತ್ಮಾ ಗಾಂಧಿಯವರು ಶಾಂತಿಯ ವ್ಯಕ್ತಿಯಾಗಿದ್ದರು, ಆದರೆ ಅವರು ಬ್ರಿಟಿಷರ ವಿರುದ್ಧ ಸ್ವಾತಂತ್ರ್ಯ ಹೋರಾಟವನ್ನೂ ಮುನ್ನಡೆಸಿದರು ಎಂಬುದನ್ನು ನೆನಪಿಡಿ. ನೀವು ನಿಮ್ಮ ಮೇಲೆ ದಾಳಿ ನಡೆಸಿದರೂ, ನಿಮ್ಮನ್ನು ಕೆಣಕಿದರೂ ಸುಮ್ಮನೆ ಕುಳಿತು ಇನ್ನೊಂದು ಕೆನ್ನೆಯನ್ನು ತಿರುಗಿಸುವುದಿಲ್ಲ ಆದರೆ ಸರಿಯಾದದ್ದಕ್ಕಾಗಿ ನಿಲ್ಲುತ್ತೀರಿ. ಭಯೋತ್ಪಾದನೆಯನ್ನು ಎದುರಿಸುವಾಗ ಭಾರತವು ನಿಖರವಾಗಿ ಅದೇ ಮಾರ್ಗವನ್ನು ಆರಿಸಿಕೊಂಡಿದೆ" ಎಂದು ತರೂರ್ ಹೇಳಿದರು.

"ವಿವಾದಗಳನ್ನು ಸಂಭಾಷಣೆಯ ಮೂಲಕ ಇತ್ಯರ್ಥಪಡಿಸಬೇಕು ಎಂದು ನಾವು ಅರ್ಥಮಾಡಿಕೊಂಡಿದ್ದರೂ, ನಮ್ಮ ಹಣೆಯ ಕಡೆಗೆ ಗುಂಡು ಹಾರಿಸಿದಾಗಲೂ ಮಾತುಕತೆಯಲ್ಲಿ ತೊಡಗಬೇಕು ಎಂಬುದನ್ನು ನಾವು ನಂಬುವುದಿಲ್ಲ. ಭಯೋತ್ಪಾದನೆಯನ್ನು ರಾಷ್ಟ್ರದ ನೀತಿಯ ಸಾಧನವಾಗಿ ಬಳಸಿಕೊಂಡಿರುವ ಪಾಕಿಸ್ತಾನವು ವಾಸ್ತವವಾಗಿ ತನ್ನ ದೇಶದಲ್ಲಿ ನಿರ್ಮಿಸಲಾದ ಭಯೋತ್ಪಾದಕ ನಿರ್ವಾಹಕರನ್ನು ಅಂತ್ಯಗೊಳಿಸಲು ನಿರ್ಧರಿಸಿದಾಗ, ನಾವು ಮಾತುಕತೆಯ ಬಗ್ಗೆ ಮಾತನಾಡಬಹುದು. ಅಲ್ಲಿಯವರೆಗೆ, ನಾವು ಈ ಜನರೊಂದಿಗೆ ಮಾತನಾಡಲು ಸಿದ್ಧರಿಲ್ಲ" ಎಂದು ಕಾಂಗ್ರೆಸ್ ಸಂಸದರು ದೃಢವಾಗಿ ತಿಳಿಸಿದ್ದಾರೆ.

ಇದಲ್ಲದೆ, ಏಪ್ರಿಲ್ 22 ರಂದು ಪಹಲ್ಗಾಮ್‌ನಲ್ಲಿ ನಡೆದ ದಾಳಿಯಲ್ಲಿ 26 ನಾಗರಿಕರು ಸಾವನ್ನಪ್ಪಿದ ನಂತರ ಪ್ರಾರಂಭವಾದ ಬೆಳವಣಿಗೆಗಳ ಸರಣಿಯನ್ನು ಕಾಂಗ್ರೆಸ್ ಸಂಸದ ಶಶಿ ತರೂರ್ ಅಂತಾರಾಷ್ಟ್ರೀಯ ಸಮುದಾಯಕ್ಕೆ ವಿವರಿಸಿದ್ದಾರೆ.