ಕೊರೋನಾ ವಿರುದ್ಧ ಮೊದಲು ಲಸಿಕೆ ಕಂಡು ಹಿಡಿದಿದ್ದೇ ಆದರೆ, ಚೀನಾದೊಂದಿಗೆ ಕೆಲಸ ಮಾಡಲು ಅಮೆರಿಕಾ ಸಿದ್ಧ: ಟ್ರಂಪ್

ವಾಷಿಂಗ್ಟನ್: ಕೊರೋನಾ ವೈರಸ್ ವಿರುದ್ಧ ಮೊದಲು ಯಶಸ್ವಿಯಾಗಿ ಲಸಿಕೆ ಕಂಡು ಹಿಡಿದ್ದೇ ಆದರೆ, ಚೀನಾದೊಂದಿಗೆ ಕೆಲಸ ಮಾಡಲು ಅಮೆರಿಕಾ ಸಿದ್ಧವಿದೆ ಎಂದು ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಹೇಳಿದ್ದಾರೆ. 

ಕೊರೋನಾ ವಿರುದ್ಧ ಉತ್ತಮ ಫಲಿತಾಂಶ ನೀಡಲು ಮುಂದಾಗಿರುವ ಯಾವುದೇ ರಾಷ್ಟ್ರದೊಂದಿಗೆ ಕೆಲಸ ಮಾಡಲು ನಾವು ಸಿದ್ಧರಿದ್ದೇವೆ. ಕೊರೋನಾ ವಿರುದ್ಧ ಮೊದಲು ಚೀನಾ ರಾಷ್ಟ್ರವೇ ಯಶಸ್ವಿಯಾಗಿ ಲಸಿಕೆಯನ್ನು ಕಂಡು ಹಿಡಿದ್ದೇ ಆದರೂ ನಾವು ಆ ರಾಷ್ಟ್ರದೊಂದಿಗೂ ಕೆಲಸ ಮಾಡಲು ಸಿದ್ಧರಿದ್ದೇವೆಂದು ಹೇಳಿದ್ದಾರೆ. 

ಲಸಿಕೆ ಕಂಡು ಹಿಡಿಯುವ ಮತ್ತು ಚಿಕಿತ್ಸಕ ಅಭಿವೃದ್ಧಿಗಳಲ್ಲಿ ನಾವು ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿದ್ದೇವೆ. ಸಂಭಾವ್ಯ ಲಸಿಕೆಗಳು ನಿರೀಕ್ಷಿತ ಸಮಯಕ್ಕಿಂತಲೂ ಶೀಘ್ರಗತಿಯಲ್ಲಿ ಬರಲಿದೆ. ಲಸಿಕೆ ವಿತರಣೆಗೆ ಅಮೆರಿಕಾ ಸೇನೆ ಸಹಾಯ ಮಾಡಲಿದೆ ಎಂದು ತಿಳಿಸಿದ್ದಾರೆ. 

ಡಿಸೆಂಬರ್ ನಲ್ಲಿ ಚೀನಾದ ವುಹಾನ್ ನಲ್ಲಿ ಆರಂಭವಾದ ಈ ಕೊರೋನಾ ಇದೀಗ ಇಡೀ ವಿಶ್ವಕ್ಕೆ ತಲೆನೋವಾಗಿ ಪರಿಣಮಿಸಿದೆ. ಪ್ರಮುಖವಾಗಿ ವಿಶ್ವದ ದೊಡ್ಡಣ್ಣ ಎನಿಸಿಕೊಂಡಿರುವ ಅಮೆರಿಕಾವನ್ನಂತೂ ಬೆನ್ನು ಬಿಡದಂತೆ ಕಾಡುತ್ತಲೇ ಇದೆ. ಕೊರೋನಾ ವೈರಸ್ ಮಟ್ಟಹಾಕಲು ಹೆಣಗಾಡುತ್ತಿರುವ ಅಮೆರಿಕಾ ಈ ಹಿಂದೆ ಚೀನಾ ವಿರುದ್ಧ ಟೀಕೆಗಳನ್ನು ಮಾಡಿತ್ತು. ಕೊರೋನಾ ಚೀನಾದೊಳಗೆ ಇರಬೇಕಿತ್ತು. ಆದರೆ, ಕೊರೋನಾ ವೈರಸ್ ಏಕಾಏಕಿ ಜಾಗತಿಕ ಸಾಂಕ್ರಾಮಿಕ ರೋಗವಾಗಿ ಮಾರ್ಪಡಲು ವಿಶ್ವ ಆರೋಗ್ಯ ಸಂಸ್ಥೆಯೇ ಚೀನಾಗೆ ಅವಕಾಶ ಮಾಡಿಕೊಟ್ಟಿತ್ತು ಎಂದು ಆರೋಪಿಸಿದ್ದರು. 

ವಾರದಲ್ಲಿ ಮೂರು ದಿನ ಕರೋನ ಪರೀಕ್ಷೆ: ಟ್ರಂಪ್
ಅಮೆರಿಕ ಅಧ್ಯಕ್ಷ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಸರಾಸರಿ ಎರಡು ಅಥವಾ ಮೂರು ದಿನಗಳಿಗೊಮ್ಮೆ ಕರೋನ ಪರೀಕ್ಷೆಗೆ ಒಳಪಡುತ್ತಿದ್ದಾರೆ.

ಬಹುಶಃ ನಾನು ಪ್ರತಿ ಎರಡು, ಇಲ್ಲ ಮೂರು ದಿನಗಳಿಗೊಮ್ಮೆ, ಕರೋನ ಪರೀಕ್ಷೆ ಎದುರಿಸುತ್ತಿದ್ದೇನೆ ಎಂದು ಟ್ರಂಪ್ ಪತ್ರಿಕಾಗೋಷ್ಠಿಯಲ್ಲಿ ಹೇಳಿಕೊಂಡಿದ್ದಾರೆ.

ಹಿಂದಿನ ದಿನ, ಶ್ವೇತಭವನದ ಪತ್ರಿಕಾ ಕಾರ್ಯದರ್ಶಿ ಕೇಯ್ಲೀ ಮೆಕ್ ಸುದ್ದಿಗಾರರೊಂದಿಗೆ ಮಾತನಾಡಿ, ಟ್ರಂಪ್ ಕರೋನ ಸೊಂಕಿನ ಪರೀಕ್ಷೆಗಾಗಿ ಹಲವು ಸಲ ಒಳಗಾಗಿದ್ದಾರೆ ಎಂದರು.