ಒಬಾಮ- ಮೋದಿ ನಡುವಿನ ಪರಿಣಾಮಕಾರಿ ಸಂಬಂಧದಿಂದ ಪ್ಯಾರಿಸ್ ಒಪ್ಪಂದ ಯಶಸ್ವಿ: ಅಮೆರಿಕ ಅಧಿಕಾರಿ

ವಾಷಿಂಗ್ಟನ್: ಪ್ಯಾರಿಸ್ ಹವಾಮಾನ ಬದಲಾವಣೆ ಒಪ್ಪಂದ ಸಾಧ್ಯವಾಗಿದ್ದು ಪ್ರಧಾನಿ ನರೇಂದ್ರ ಮೋದಿ- ಅಮೆರಿಕ ಅಧ್ಯಕ್ಷ ಬರಾಕ್ ಒಬಾಮ ನಡುವಿನ ಉತ್ತಮ ಸಂಬಂಧದಿಂದ ಎಂದು ಅಮೆರಿಕ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
ಒಪ್ಪಂದ ನಡೆಯುವುದಕ್ಕೂ ಒಂದು ದಿನದ ಮುನ್ನ ಬರಾಕ್ ಒಬಾಮ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಕರೆ ಮಾಡಿದ್ದರು. ಒಬಾಮ ಮೋದಿ ಅವರಿಗೆ ಕರೆ ಮಾಡದೇ ಇದ್ದಿದ್ದರೆ ಒಪ್ಪಂದ ಯಶಸ್ವಿಯಾಗುತ್ತಿರಲಿಲ್ಲ ಎಂದು ಹವಾಮಾನ ಬದಲಾವಣೆಯ ಅಮೆರಿಕದ ವಿಶೇಷ ಪ್ರತಿನಿಧಿ ಟೋಡ್ ಸ್ಟರ್ನ್ ಅಭಿಪ್ರಾಯಪಟ್ಟಿದ್ದಾರೆ.    
ಕೇವಲ ಹವಾಮಾನ ಬದಲಾವಣೆ ಒಪ್ಪಂದಕ್ಕೆ ಸಂಬಂಧಿಸಿದಂತೆ ಬರಾಕ್ ಒಬಾಮ ಹಾಗೂ ಮೋದಿ ಪರಿಣಾಮಕಾರಿ ಸಂಬಂಧ ಹೊಂದಿಲ್ಲ, ಎಲ್ಲಾ ವಿಷಯಗಳ ಬಗ್ಗೆಯೂ ಉಭಯ ನಾಯಕರ ಸಂಬಂಧ ಪರಿಣಾಮಕಾರಿಯಾಗಿರಲಿದೆ ಎಂದು ಟೋಡ್ ಸ್ಟರ್ನ್ ಹೇಳಿದ್ದಾರೆ.
ನರೇಂದ್ರ ಮೋದಿ ಅಧಿಕಾರ ಸ್ವೀಕರಿಸಿ ಕೇವಲ ನಾಲ್ಕು ತಿಂಗಳಲ್ಲೇ ಉಭಯ ನಾಯಕರು ಉಭಯ ದೇಶಗಳಿಗೆ ಪರಸ್ಪರ ಭೇಟಿ ನೀಡಿದ್ದರು, ಇದೊಂದು ಅಭುತ ಅಂಶವಾಗಿದ್ದು ಒಬಾಮ- ಮೋದಿ ವಿಶಾಲ ದೃಷ್ಟಿಕೋನ ಹೊಂದಿದ್ದಾರೆ ಎಂದು ಟೋಡ್ ಸ್ಟರ್ನ್ ಹೇಳಿದ್ದಾರೆ.