ದೆಹಲಿ ಬಜೆಟ್: ಪುರಸಭೆಗಳಿಗೆ ೧೦೦೦ಕೋಟಿ ಹೆಚ್ಚುವರಿ ಅನುದಾನ

ನವದೆಹಲಿ: ದೆಹಲಿ ಪುರಸಭೆಗಳಿಗೆ ಹೆಚ್ಚುವರಿ ೧೦೦೦ ಕೋಟಿ ರೂ ಅನುದಾನ ನೀಡುವುದಾಗಿ ದೆಹಲಿ ವಿತ್ತ ಸಚಿವ ಮನೀಶ್ ಸಿಸೋದಿಯಾ ಸೋಮವಾರ ಘೋಷಿಸಿದ್ದಾರೆ.

"ಕಳೆದ ವರ್ಷ ದೆಹಲಿ ಪುರಸಭೆಗಳಿಗೆ ಬಜೆಟ್ ಅನುದಾನ ೫೯೦೮ಕೋಟಿ ಇತ್ತು. ಇದನ್ನು ನಂತರ ೫೯೯೯ಕೋಟಿಗೆ ಏರಿಸಲಾಯಿತು. ಈ ವರ್ಷ ಇದನ್ನು ೬೯೧೯ ಕೋಟಿಗೆ ಹೆಚ್ಚಿಸಲು ನಿರ್ಧರಿಸಿದ್ದೇವೆ" ಎಂದು ದೆಹಲಿ ವಿಧಾನಸಭೆಯಲ್ಲಿ ಉಪಮುಖ್ಯಮಂತ್ರಿ ಸಿಸೋದಿಯಾ ಹೇಳಿದ್ದಾರೆ.

ಬಿಜೆಪಿ ನಿಯಂತ್ರಣದಲ್ಲಿರುವ ಪುರಸಭೆಗಳನ್ನುದ್ದೇಶಿಸಿ, ಈ ಹಣವನ್ನು ಸದ್ಬಳಕೆ ಮಾಡಿಕೊಳ್ಳಲು ಆಗ್ರಹಿಸಿದ್ದಾರೆ.

"ಈ ಹಣವನ್ನು ಸರಿಯಾಗಿ ಉಪಯೋಗಿಸಿಕೊಂಡು, ಪುರಸಭೆಗಳು ತಮ್ಮ ನೌಕರರಿಗೆ ಸಮಯಕ್ಕೆ ಸರಿಯಾಗಿ ವೇತನ ನೀಡಲಿದ್ದಾರೆ ಎಂದು ನಂಬುತ್ತೇನೆ. ಇದು ಸಾರ್ವಜನಿಕರ ಹಣ ಮತ್ತು ಭ್ರಷ್ಟಾಚಾರದಲ್ಲಿ ತೊಡಗಿ ಈ ಹಣವನ್ನು ಪೋಲು ಮಾಡಬಾರದು" ಎಂದು ಕಿವಿಮಾತು ಹೇಳಿದ್ದಾರೆ.

ದೆಹಲಿಯಲ್ಲಿ ವೈಫೈ ಸೌಕರ್ಯದ ಬಗ್ಗೆ ಮಾತನಾಡಿದ ಅವರು ಈಗಿನ ಯೋಜನೆಗಳನ್ನು ಪರಿಶೀಲಿಸಿ ಇನ್ನೂ ಪರಿಣಾಮಕಾರಿ ಯೋಜನೆಗಳನ್ನು ರೂಪಿಸಲಿದ್ದೇವೆ ಎಂದು ತಿಳಿಸಿದ್ದಾರೆ. "ಬಸ್ ಗಳಲ್ಲಿ ಮತ್ತು ಕೆಲವು ಪ್ರದೇಶಗಳಲ್ಲಿ ಪ್ರಾಯೋಗಿಕವಾಗಿ ವೈಫೈ ಸೇವೆಯನ್ನು ಒದಗಿಸುತ್ತಿದ್ದೇವೆ. ಈ ಯೋಜನೆಗಳು ಬಗ್ಗೆ ಸಮಗ್ರ ಅಧ್ಯಯನ ನಡೆಸಿ ಇನ್ನೂ ಪರಿಣಾಮಕಾರಿ ಯೋಜನೆಗಳನ್ನು ರೂಪಿಸಲಿದ್ದೇವೆ" ಎಂದು ಮನೀಶ್ ತಿಳಿಸಿದ್ದಾರೆ.