ಚೈನಾ ಅಧ್ಯಕ್ಷನಿಗೆ ಮೀಸೆ; ಕಲಾವಿದನ ಬಂಧನ

ಶಾಂಘೈ: ಚೈನಾ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಅವರಿಗೆ ಮೀಸೆ ಬರೆದು ಹಾಸ್ಯ ಚಿತ್ರವೊಂದನ್ನು ಪ್ರಕಟಿಸಿದ್ದಕ್ಕೆ ಶಾಂಘೈ ಕಲಾವಿದ ಡೈ ಜೈನ್ಯಾಂಗ್ ಅವರನ್ನು ಬಂಧಿಸಲಾಗಿದೆ ಎಂದು ಚೈನಾ ಮಾನವ ಹಕ್ಕುಗಳ ಸಮರ್ಥನಾ ಸಂಸ್ಥೆ ತಿಳಿಸಿದೆ.

ಛಾಯಾಚಿತ್ರಕಾರ ಡೈ ಅವರು 'ಕೈಸಾಂಥೇನಿಯಮ್ ಮುಖ'ಗಳನ್ನು ಸೃಷ್ಟಿಸುವಲ್ಲಿ ಪ್ರವೀಣರು. ಈ ಹೂವು ಚೈನಾದ ಆಡು ಭಾಷೆಯಲ್ಲಿ ಗುದವನ್ನು ಪ್ರತಿನಿಧಿಸುತ್ತದೆ.

ಕ್ಸಿ ಅವರ ಚಿತ್ರ ಬಳಸಿ ಅಂತರ್ಜಾಲದಲ್ಲಿ ಸ್ಯೂಟ್ ಕೇಸ್, ಟಿ ಶರ್ಟ್ ಮತ್ತು ಕೋಕ್ ಡಬ್ಬಗಳ ಮೇಲೆ 'ಕೈಸಾಂಥೇನಿಯಮ್ ಮುಖ' ಮೂಡಿಸಿ ಹಾಗು ವಿಚಿತ್ರ ಮೀಸೆ ಬರೆದು ಪ್ರಕಟಿಸಿದ್ದರು ಎಂದು ಮಾಧ್ಯಮವೊಂದು ವರದಿ ಮಾಡಿದೆ.

ಕ್ಸಿ ಫೋಟೋದ ಮೇಲೆ ಮೂಡಿಸಿದ ಮೀಸೆ ಹಿಟ್ಲರ್ ಮೀಸೆಗೆ ಹೋಲಿಕೆಯಾಗದಿದ್ದರೂ ಹಲವು ಅಂತರ್ಜಾಲ ಬಳಕೆದಾರರು ಅದು ಹಿಟ್ಲರ್ ನನ್ನು ನೆನಪಿಸುತ್ತದೆ ಎಂದು ಪ್ರತಿಕ್ರಿಯಿಸಿದ್ದಾರೆ ಎಂದು ತಿಳಿದುಬಂದಿದೆ.

ದಾಂಧಲೆ ಸೃಷ್ಟಿಸಿರುವ ಆರೋಪದ ಮೇಲೆ ಡೈ ಅವರನ್ನು ಬಂಧಿಸಿದ್ದು ಆರೋಪ ಸಾಬೀತಾದರೆ ೫ ವರ್ಷಗಳ ಜೈಲು ಶಿಕ್ಷೆಯಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ.