ಪ್ರಧಾನಿ ಮೋದಿ ಅಧ್ಯಕ್ಷತೆಯಲ್ಲಿ ದಾವೋಸ್‍ ಮಾದರಿಯ ಸಮ್ಮೇಳನ : ಮುಫ್ತಿ ಮಹಮ್ಮದ್ ಸಯೀದ್

ಶ್ರೀನಗರ: ಜಮ್ಮು-ಕಾಶ್ಮೀರದ ಗುಲ್ಮಾರ್ಗ್ ನಲ್ಲಿ ನಡೆಸಲು ಉದ್ದೇಶಿಸಿರುವ  ದಾವೋಸ್‍ ಮಾದರಿಯ ಸಮ್ಮೇಳನ ಪ್ರಧಾನಿ ನರೇಂದ್ರ ಮೋದಿ ಅಧ್ಯಕ್ಷತೆಯಲ್ಲಿ ನಡೆಯಬೇಕೆಂದು ಜಮ್ಮು-ಕಾಶ್ಮೀರ ಮುಖ್ಯಮಂತ್ರಿ ಮುಫ್ತಿ ಮಹಮ್ಮದ್ ಸಯೀದ್ ಹೇಳಿದ್ದಾರೆ.

ಜಮ್ಮು-ಕಾಶ್ಮೀರವನ್ನು ವಿಶ್ವದ ನಂ.1 ಪ್ರವಾಸಿ ತಾಣವನ್ನಾಗಿ ಮಾಡುವ ನಿಟ್ಟಿನಲ್ಲಿ  ಸ್ವಿಜರ್ಲೆಂಡ್‍ ನ ದಾವೋಸ್‍ ನಲ್ಲಿ ನಡೆದ ಸಮ್ಮೇಳನದ ಮಾದರಿಯ ಕಾರ್ಯಕ್ರಮವನ್ನು ಗುಲ್ಮಾರ್ಗ್ ಅಥವಾ ಶ್ರೀನಗರದಲ್ಲಿ ನಡೆಸಲು ಉದ್ದೇಶಿಸಲಾಗಿದೆ. ದೇಶದ ಉದ್ದಿಮೆದಾರರು ಭಾಗವಹಿಸಲಿರುವ ಈ ಕಾರ್ಯಕ್ರಮದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅಧ್ಯಕ್ಷತೆ ವಹಿಸಬೇಕು ಎಂದು ಮುಫ್ತಿ ಮಹಮ್ಮದ್ ಸಯೀದ್ ಮನವಿ ಮಾಡಿದ್ದಾರೆ.      

ಶೇರ್-ಇ-ಕಾಶ್ಮೀರ್ ಇಂಟರ್ನ್ಯಾಷನಲ್ ಕಾನ್ಫರೆನ್ಸ್ ಸೆಂಟರ್ ನಲ್ಲಿ ಮೊದಲ ಬಾರಿಗೆ ನಡೆದ ಟ್ರಾವೆಲ್ ಮಾರ್ಟ್ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಮಾತನಾಡಿರುವ ಮುಫ್ತಿ ಮಹಮ್ಮದ್ ಸಯೀದ್, ಜಮ್ಮು-ಕಾಶ್ಮೀರವನ್ನು ಶಾಂತಿ ದ್ವೀಪ ಎಂದು ಬಣ್ಣಿಸಿದ್ದು ರಾಜ್ಯವನ್ನು ವಿಶ್ವದಲ್ಲೇ ಅತ್ಯುನ್ನತ ಪ್ರವಾಸಿ ತಾಣವಾಗಿ ನೋಡಬೇಕೆಂಬುದು ತಮ್ಮ ಕನಸು ಎಂದಿದ್ದಾರೆ.

ರಾಜ್ಯದಲ್ಲಿ ಪ್ರಕ್ಷುಬ್ಧ ಸ್ಥಿತಿ ಉಂಟಾಗಿದ್ದಾರೂ ಪ್ರವಾಸಿಗರಿಗೆ ಎಂದಿಗೂ ತೊಂದರೆ ಉಂಟಾಗಿಲ್ಲ. ಆದ್ದರಿಂದ ಜಮ್ಮು-ಕಾಶ್ಮೀರ ಶಾಂತಿ ದ್ವೀಪವಾಗಿದೆ.  ತಮ್ಮ ರಾಜ್ಯ ಎದುರಿಸುತ್ತಿರುವ ಸಮಸ್ಯೆಗಳನ್ನು ಬಗೆಹರಿಸಿ ವಿಶ್ವದ ನಂ.1  ಪ್ರವಾಸಿ ತಾಣವಾಗುವ ಕನಸನ್ನು ನನಸು ಮಾಡುವುದಾಗಿ ಮುಫ್ತಿ  ಮಹಮ್ಮದ್ ಭರವಸೆ ನೀಡಿದ್ದಾರೆ.