ವಿಕೃತಕಾಮಿ-ಕೊಲೆಪಾತಕಿಗೆ ೨೩ವರ್ಷಗಳ ಕಠಿಣ ಸಜೆ

ವೆಲ್ಲೂರು: ೩ ವರ್ಷದ ಹಿಂದೆ ಐದು ವರ್ಷದ ಬಾಲಕಿಗೆ ಲೈಂಗಿಕ ಕಿರುಕುಳ ನೀಡಿ ಕೊಲೆ ಮಾಡಿದ ಆರೋಪದ ಮೇಲೆ ದೇವಾಲಯದ ಅರ್ಚಕನೊಬ್ಬನಿಗೆ (೫೦) ಮಂಗಳವಾರ ಮಹಿಳಾ ನ್ಯಾಯಾಲಯ ೨೩ ವರ್ಷದ ಕಠಿಣ ಸಜೆ ವಿಧಿಸಿದೆ.

ಅಲ್ಲದೆ ತಪ್ಪಿತಸ್ಥನಿಗೆ ೫೦೦೦ ರೂ ದಂಡವನ್ನು ಕೂಡ ನ್ಯಾಯಾಲಯ ವಿಧಿಸಿದೆ. ಗುಡಿಯಟ್ಟಮ್ ನ ಪಾಂಡಿಯನಗರದ ಕುಮಾರ್ ಅಲಿಯಾಸ್ ಕುಮಾರ್ ಗುರುಕುಲ್ ಅವರನ್ನು ಅಪಹರಣ, ಲೈಂಗಿಕ ಕಿರುಕುಳ, ಕೊಲೆ ಹಾಗು ಸಾಕ್ಷ್ಯಗಳ ನಾಶದ ಆರೋಪದ ಮೇಲೆ ತಪ್ಪಿತಸ್ಥ ಎಂದು ನ್ಯಾಯಮೂರ್ತಿ ಎ ನಜೀರ್ ಅಹ್ಮದ್ ತೀರ್ಪು ನೀಡಿದ್ದಾರೆ. ಕೊಲೆಯಾದ ಸಂತ್ರಸ್ತೆ ಐದು ವರ್ಷದ ಬಾಲಕಿ ಲಕ್ಷ್ಮಿ (ಹೆಸರು ಬದಲಿಸಲಾಗಿದೆ) ಪಾಂಡಿಯನಗರದ ಅಣ್ಣೈ ಇಂದಿರಾಗಾಂಧಿ ಪ್ರಾಥಮಿಕ ಶಾಲೆಯಲ್ಲಿ ಒಂದನೇ ತರಗತಿ ಓದುತ್ತಿದ್ದಳು.

ಸೆಪ್ಟಂಬರ್ ೧೯ ೨೦೧೧ ರಂದು ಮಧ್ಯಾಹ್ನದ ಊಟದ ವಿರಾಮದ ನಂತರ ಬಾಲಕಿ ಕಾಣೆಯಾಗಿದ್ದಳು. ಗುಡಿಯಟ್ಟಮ್ ಪೊಲೀಸ್ ಠಾಣೆಯಲ್ಲಿ ಬಾಲಕಿಯ ತಂದೆ, ಮಗಳು ಕಾಣೆಯಾಗಿರುವುದರ ಬಗ್ಗೆ ದೂರು ನೀಡಿದ್ದರು. ಬಾಲಕಿ ಕಾಣೆಯಾದ ಎರಡು ದಿನದ ನಂತರ ಸೆಪ್ಟಂಬರ್ ೨೧ರಂದು ಕುಮಾರ್ ಮನೆಯ ಹತ್ತಿರ ಬಾಲಕಿಯ ದೇಹ ಪತ್ತೆಯಾಗಿತ್ತು.

ಬಾಲಕಿಯ ಚಪ್ಪಲಿ ಮತ್ತು ಬಳೆಗಳನ್ನು ಅರ್ಚಕನ ಮನೆಯಿಂದ ಪೊಲೀಸರು ವಶಪಡಿಸಿಕೊಂಡು ವಿಚಾರಣೆ ನಡೆಸಿದ ಮೇಲೆ ಅರ್ಚಕ ಕುಮಾರ್ ತಪ್ಪೊಪ್ಪಿಕೊಂಡಿದ್ದ.