ಐಎಂಎಫ್ ಸಾಲ ತೀರಿಸಲು ವಿಫಲವಾದ ಮೊದಲ ಅಭಿವೃದ್ಧಿ ಹೊಂದಿದ ರಾಷ್ಟ್ರ ಗ್ರೀಸ್

ವಾಶಿಂಗ್ಟನ್: ಅಂತರಾಷ್ಟ್ರೀಯ ಧನಸಹಾಯ ನಿಧಿ (ಐಎಂಎಫ್) ಸಂಸ್ಥೆಗೆ ಸಾಲ ತೀರಿಸಲು ಗ್ರೀಸ್ ದೇಶಕ್ಕೆ ನೆನ್ನೆ ಕೊನೆಯ ದಿನವಾಗಿದ್ದು, ಹಣ ಹಿಂದಿರುಗಿಸಲು ಗ್ರೀಸ್ ವಿಫಲವಾಗಿದ್ದರಿಂದ, ಸಾಲ ತೀರಿಸದ ಮೊದಲ ಅಭಿವೃದ್ಧಿ ಹೊಂದಿದ ದೇಶ ಎನಿಸಿಕೊಂಡಿದೆ. ಗ್ರೀಸ್ ಐಎಂಎಫ್ ಸಂಸ್ಥೆಗೆ ೧.೫ ಬಿಲಿಯನ್ ಯೂರೋ ಸಾಲ ಹಿಂದಿದಿರುಗಿಸಬೇಕಿತ್ತು.

"ಐಎಂಎಫ್ ಗೆ ಗ್ರೀಸ್ ಹಿಂದಿರುಗಿಸಬೇಕಿದ್ದ ಸಾಲದ ಮೊತ್ತವನ್ನು ನೀಡಲು ವಿಫಲವಾಗಿದೆ ಎಂದು ಧೃಢೀಕರಿಸುತ್ತೇನೆ" ಎಂದು ಐಎಂಎಫ್ ವಕ್ತಾರ ಗೆರ್ರಿ ರೈಸ್ ತಿಳಿಸಿದ್ದಾರೆ.

"ನಾವು ನಮ್ಮ ಕಾರ್ಯಕಾರಿಣಿ ಸಮಿತಿಗೆ ಈ ವಿಷಯ ತಿಳಿಸಿದ್ದು, ಅವರು ಸಾಲ ತೀರುಸುವವರೆಗೆ ಗ್ರೀಸ್ ದೇಶಕ್ಕೆ ಧನಸಹಾಯ ಸಾಧ್ಯವಾಗುವುದಿಲ್ಲ" ಎಂದು ಅವರು ತಿಳಿಸಿದ್ದಾರೆ.

ಯೂರೋಪಿಯನ್ ಯೂನಿಯನ್ ಜೊತೆ ಬೇಲ್-ಔಟ್ ಮಾಡಲು ಸುಧೀರ್ಘ ಮಾತುಕತೆ ನಡೆಸಿದರೂ ಅದ್ಯಾವುದೂ ಸಫಲವಾಗದೆ ಹೋಗಿದೆ. ಐಎಮ್ಎಫ್ ಸಂಸ್ಥೆಗೆ ಕೂಡ ಗಡುವನ್ನು ವಿಸ್ತರಿಸಲು ಗ್ರೀಸ್ ಮಾಡಿದ ಮನವಿ ಕೂಡ ತಿರಸ್ಕೃತವಾಗಿದೆ.

ಅವರು ಮನವಿ ಮಾಡಿದ್ದರು ಆದರೆ ಸಮಿತಿ ಒಪ್ಪಿಕೊಳ್ಳಲಿಲ ಎಂದು ರೈಸ್ ತಿಳಿಸಿದ್ದಾರೆ.