ಯೋಗ ದಿನ ಕಾರ್ಯಕ್ರಮದಲ್ಲಿ ಪ್ರಧಾನಿ ಮೋದಿ ಜೊತೆ ವೇದಿಕೆ ಹಂಚಿಕೊಳ್ಳಲಿರುವ ರಾಮದೇವ್

ನವದೆಹಲಿ: ಅಂತರಾಷ್ಟ್ರೀಯ ಯೋಗ ದಿನದ ಅಂಗವಾಗಿ ಭಾನುವಾರ ರಾಜಪಥದಲ್ಲಿ ನಡೆಯಲಿರುವ ಕಾರ್ಯಕ್ರಮದಲ್ಲಿ ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಯೋಗ ಮಾಡುವುದಿಲ್ಲ ಬದಲಾಗಿ ನೆರೆದಿರುವವರನ್ನು ಉದ್ದೇಶಿಸಿ ಭಾಷಣ ಮಾಡಲಿದ್ದಾರೆ. ಮೋದಿಯವರನ್ನು ಒಳಗೊಂಡಂತೆ ವೇದಿಕೆಯ ಮೇಲೆ ಜೂನ್ ೨೧ರಂದು ಏಳು ಜನ ನೆರೆದಿರುತ್ತಾರೆ ಅವರಲ್ಲಿ ಬಾಬ ರಾಮದೇವ್ ಕೂಡ ಒಬ್ಬರು.

ಜೂನ್ ೨೧ ಹತ್ತಿರವಾಗುತ್ತಿರುವಂತೆ ಈ ಕಾರ್ಯಕ್ರಮಕ್ಕೆ ಸಿದ್ಧತೆಗಳು ಭರದಿಂದ ಸಾಗುತ್ತಿವೆ. ಒಂದೇ ಸ್ಥಳದಲ್ಲಿ ಅತಿ ಹೆಚ್ಚು ಜನ ಯೋಗ ಮಾಡಿಲಿರುವುದರಿಂದ ಈ ಕಾರ್ಯಕ್ರಮವನ್ನು ಗಿನ್ನಿಸ್ ದಾಖಲೆ ಪುಸ್ತಕಕ್ಕೆ ಸೇರಿಸಲು ಸರ್ಕಾರ ಮನವಿ ಮಾಡಿದೆ. ೩೩ ನಿಮಿಷದ ಈ ಯೋಗ ಪ್ರದರ್ಶನದಲ್ಲಿ ೩೫ ಸಾವಿರಕ್ಕೂ ಹೆಚ್ಚು ಜನ ಭಾಗವಹಿಸಲಿದ್ದಾರೆ ಎಂದು ತಿಳಿದುಬಂದಿದೆ.

ಮೋದಿ ಅವರು ಅಂದು ಯೋಗ ಮಾಡುವುದಿಲ್ಲ ಎಂದು ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್ ತಿಳಿಸಿದ್ದಾರೆ ಮತ್ತು ಮೂಲಗಳ ಪ್ರಕಾರ ಪ್ರಧಾನಿ ೧೫-೨೦ ನಿಮಿಷಗಳ ಕಾಲ ಭಾಷಣ ಮಾಡಲಿದ್ದಾರೆ.

ಆರು ಜನ ವೇದಿಕೆ ಮೇಲೆ ಮೋದಿಯವನ್ನು ಸೇರಲಿದ್ದಾರೆ ಎಂದು ತಿಳಿದುಬಂದಿದ್ದರೂ ರಾಮದೇವ್ ಅವರನ್ನು ಹೊರತುಪಡಿಸಿ ಉಳಿದವರ್ಯಾರು ಎಂಬುದು ಇನ್ನು ನಿಶ್ಚಿತವಾಗಿ ತಿಳಿದುಬಂದಿಲ್ಲ.