ಮಣಿಪುರ ಸೇನಾ ಶಿಬಿರದ ಮೇಲೆ ಉಗ್ರರ ದಾಳಿ: ಚೀನಾ ಕೈವಾಡ ಶಂಕೆ

ನವದೆಹಲಿ: ದೇಶದ ಈಶಾನ್ಯ ಭಾಗದಲ್ಲಿ ಭಾರತೀಯ ಭದ್ರತಾ ಪಡೆಗಳ ಮೇಲೆ ಇತ್ತೀಚೆಗೆ ನಡೆದಿರುವ  ಉಗ್ರಗಾಮಿ ದಾಳಿಯಲ್ಲಿ  ಚೀನದ ಕೈವಾಡ ಇರುವುದನ್ನು ಗುಪ್ತಚರ ಇಲಾಖೆ ಶಂಕಿಸಿದೆ.

ಭಾರತದ ಈಶಾನ್ಯ ಭಾಗದಲ್ಲಿ ಉಗ್ರ ಸಂಘಟನೆಗಳನ್ನು ಬೆಂಬಲಿಸುವ ಮೂಲಕ ಅರಾಜಕತೆ, ಅಶಾಂತಿ, ಹಿಂಸೆಯನ್ನು ಭುಗಿಲೇಳಿಸುವ ಸಂಚಿನಲ್ಲಿ ಚೀನ ತೊಡಗಿದೆ ಎಂದು ಗುಪ್ತಚರ ವರದಿ ಹೇಳಿದೆ.

ಮಣಿಪುರದಲ್ಲಿನ ಸೇನಾ ಶಿಬಿರದ ಮೇಲೆ ಇತ್ತೀಚೆಗೆ ಉಗ್ರರು ದಾಳಿ ನಡೆಸಿ 18 ಭಾರತೀಯ ಸೈನಿಕರನ್ನು ಕೊಂದ ಕೆಲವೇ ದಿನಗಳ ಒಳಗೆ ಗುಪ್ತಚರ ದಳವು ಈ ವರದಿಯನ್ನು ನೀಡಿದೆ.ಇದರ ಹೊರತಾಗಿಯೂ ಶಂಕಿತ ನಾಗಾ ಉಗ್ರ ಪಡೆಯಾಗಿರುವ ಎನ್‌ಎಸ್‌ಸಿಎನ್‌-ಕೆ ಇದರ ಉಗ್ರರು ನಿನ್ನೆ ಭಾನುವಾರ ಅರುಣಾಚಲದಲ್ಲಿನ ಅಸ್ಸಾಂ ರೈಫ‌ಲ್ಸ್‌ ಛಾಯಾ ಸೈನಿಕ ದಳದ ಶಿಬಿರದ ಮೇಲೆ ದಾಳಿ ನಡೆಸಿದ್ದಾರೆ. ಆದರೆ ಯಾವುದೇ ಜೀವ ಹಾನಿ ಸಂಭವಿಸಿಲ್ಲ.

ಈ ನಡುವೆ ಕೇಂದ್ರ ಗೃಹ ವ್ಯವಹಾರಗಳ ಸಹಾಯಕ ಸಚಿವ ಕಿರಣ್‌ ರಿಜಿಜು ಹೇಳಿಕೆಯೊಂದನ್ನು ಹೊರಡಿಸಿ, ಈಶಾನ್ಯ ಭಾಗದಲ್ಲಿ ನಮ್ಮ ಸೈನಿಕರ ಮೇಲೆ ಉಗ್ರರಿಂದ ನಡೆದಿರುವ ದಾಳಿಗಳನ್ನು ನಾವು ಗಂಭೀರವಾಗಿ ಪರಿಗಣಿಸಿದ್ದೇವೆ. ಕೇಂದ್ರ ಮತ್ತು ರಾಜ್ಯ ಪೊಲೀಸರು ಸಮಸ್ಯೆಯನ್ನು ಬಗೆಹರಿಸಲು ಒಟ್ಟಾಗಿ ಕೆಲಸ ಮಾಡಬೇಕಿದೆ. ಈಶಾನ್ಯ ಭಾಗದಲ್ಲಿ ಹೇಗೆ ಶಾಂತಿಯನ್ನು ಪುನಃಸ್ಥಾಪಿಸಬೇಕೆಂಬುದನ್ನು ನಾವು ಚರ್ಚಿಸುತ್ತಿದ್ದೇವೆ ಎಂದು ಹೇಳಿದ್ದಾರೆ.