ಜನವರಿ ೨೫ ರಿಂದ ೨೭ರವರೆಗೆ ಒಬಾಮಾ ಭಾರತ ಪ್ರವಾಸ

ನವದೆಹಲಿ: ಅಮೇರಿಕಾ ರಾಷ್ಟ್ರಾಧ್ಯಕ್ಷ ಬರಾಕ್ ಒಬಾಮಾ ಜನವರಿ ೨೫ ರಿಂದ ೨೭ ರವರೆಗೆ ಭಾರತ ಪ್ರವಾಸ ಮಾಡಲಿದ್ದಾರೆ ಎಂದು ಬುಧವಾರ ಮೂಲಗಳು ತಿಳಿಸಿವೆ.

ದೆಹಲಿಯಲ್ಲಿ ನಡೆಯಲಿರುವ ಗಣರಾಜ್ಯೋತ್ಸವ ಸಮಾರಂಭಕ್ಕೆ ಒಬಾಮಾ ಮುಖ್ಯ ಅಥಿತಿಯಾಗಿರುತ್ತಾರೆ ಹಾಗೂ ಆಗ್ರಾದ ತಾಜ್ ಮಹಲ್ ಗೆ ಕೂಡ ಭೇಟಿ ನೀಡಲಿದ್ದಾರೆ ಎಂದು ತಿಳಿದುಬಂದಿದೆ.

ಈ ಭೇಟಿಯ ವೇಳೆಯಲ್ಲಿ ಒಬಾಮ ಅವರ ಪತ್ನಿ ಮಿಶೆಲ್ ಜೊತೆಗಿರುತ್ತಾರೆ ಎಂದು ಮೂಲಗಳು ತಿಳಿಸಿವೆ.

ಈ ಭೇಟಿಗೂ ಮುನ್ನ ರಾಷ್ಟ್ರದ ರಾಜಧಾನಿಯಲ್ಲಿ ಭದ್ರತೆಯನ್ನು ಹೆಚ್ಚಿಸಲಾಗಿದೆ. ಅಮೇರಿಕಾದ ಗುಪ್ತಚರ ಇಲಾಖೆಯ ಒಂದು ತಂಡ ಕೂಡ ಆಗಲೇ ರಾಜಧಾನಿಯಲ್ಲಿ ಬೀಡುಬಿಟ್ಟಿದ್ದು, ಭಾರತೀಯ ಗುಪ್ತಚರದಳದೊಂದಿಗೆ ಮಾತುಕತೆ ನಡೆಸಿದೆ. ಶುಕ್ರವಾರ ಎರಡೂ ದೇಶದ ಭದ್ರತಾ ಪಡೆಗಳ ಮತ್ತೊಂದು ಸುತ್ತಿನ ಮಾತುಕತೆ ನಡೆಯಲಿದ್ದು, ಅಂದೆ ಒಬಾಮ ಪ್ರವಾಸದ ಅಂತಿಮ ವಿವರಗಳು ಚರ್ಚೆಯಾಗಲಿದೆ ಎಂದು ತಿಳಿದುಬಂದಿದೆ.