ಸ್ಮಾರ್ಟ್ ಸಿಟಿ ಅಧಿಕೃತ ಪಟ್ಟಿ ಪ್ರಕಟ, ರಾಜ್ಯದ 6 ನಗರಗಳ ಆಯ್ಕೆ

ನವದೆಹಲಿ: ಎನ್‍ಡಿಎ ಸರ್ಕಾರದ ಮಹತ್ವಾಕಾಂಕ್ಷಿ ಸ್ಮಾರ್ಟ್ ಸಿಟಿ ಯೋಜನೆಗೆ ಆಯ್ಕೆಯಾಗಿರುವ ದೇಶದ 98 ನಗರಗಳ ಅಧಿಕೃತ ಪಟ್ಟಿಯನ್ನು ಕೇಂದ್ರ ಸರ್ಕಾರ ಗುರುವಾರ ಬಿಡುಗಡೆ ಮಾಡಿದ್ದು, ರಾಜ್ಯದ ಆರು ನಗರಗಳು ಸೇರಿದಂತೆ 24 ರಾಜಧಾನಿಗಳು ಸ್ಥಾನ ಪಡೆದುಕೊಂಡಿವೆ.

ಉತ್ತರ ಪ್ರದೇಶ, ತಮಿಳುನಾಡು ಹಾಗೂ ಮಹಾರಾಷ್ಟ್ರ ರಾಜ್ಯಗಳು ಕೇಂದ್ರ ಸರ್ಕಾರದ ಈ ಸ್ಮಾರ್ಟ್ ಯೋಜನೆಯಲ್ಲಿ ಅತಿ ಹೆಚ್ಚಿನ ಪಾಲು ಪಡೆದಿವೆ. ಉತ್ತರ ಪ್ರದೇಶದ 13 ನಗರಗಳು, ತಮಿಳುನಾಡಿನ 12 ನಗರಗಳು, ಮಹಾರಾಷ್ಟ್ರದ 10, ಮಧ್ಯಪ್ರದೇಶದ 7, ಕರ್ನಾಟಕದ 6 ನಗರಗಳು ಹಾಗೂ ಬಿಹಾರ ಮತ್ತು ಆಂಧ್ರಪ್ರದೇಶದ ತಲಾ ಮೂರು ನಗರಗಳನ್ನು ಸ್ಮಾರ್ಟ್ ಸಿಟಿ ಯೋಜನೆಗೆ ಆಯ್ಕೆ ಮಾಡಲಾಗಿದೆ.

ಸುದ್ದಿಗೋಷ್ಠಿಯಲ್ಲಿ ಪಟ್ಟಿ ಬಿಡುಗಡೆ ಮಾಡಿ ಮಾತನಾಡಿದ ಕೇಂದ್ರ ನಗರಾಭಿವೃದ್ಧಿ ಸಚಿವ ಎಂ.ವೆಂಕಯ್ಯ ನಾಯ್ಡು ಅವರು, ಜನಸಂಖ್ಯೆ ಆಧಾರದ ಮೇಲೆ ನಗರಗಳನ್ನು ಸ್ಮಾರ್ಟ್ ಸಿಟಿ ಯೋಜನೆಗೆ ಆಯ್ಕೆ ಮಾಡಲಾಗಿದೆ ಎಂದು ತಿಳಿಸಿದರು.

ಜಮ್ಮುಕಾಶ್ಮೀರ ಹೊರತು ಪಡಿಸಿ ಕೇಂದ್ರದ ನಿರ್ದೇಶನದಂತೆ ದೇಶದ ಇತರ ಎಲ್ಲಾ ರಾಜ್ಯಗಳೂ ಸ್ಮಾರ್ಟ್ ಯೋಜನೆಗೆ ತಮ್ಮ ಪ್ರಸ್ತಾವನೆಗಳನ್ನು ಸಲ್ಲಿಸಿದ್ದವು. ಕೇಂದ್ರ ನಗರಾಭಿವೃದ್ಧಿ ಸಚಿವಾಲಯ ಯೋಜನೆಗೆ ಅಂತಿಮಗೊಂಡಿರುವ 98 ನಗರಗಳ ಪಟ್ಟಿಯನ್ನು ಇಂದು ಬಿಡುಗಡೆ ಮಾಡಿದೆ.

ಸ್ಮಾರ್ಟ್ ಸಿಟಿ ಯೋಜನೆಗೆ ಆಯ್ಕೆಯಾದ ರಾಜ್ಯದ 6 ನಗರಗಳು
1. ತುಮಕೂರು
2. ಶಿವಮೊಗ್ಗ
3. ಬೆಳಗಾವಿ
4. ಹುಬ್ಬಳ್ಳಿ-ಧಾರವಾಡ
5. ಮಂಗಳೂರು
6. ದಾವಣಗೆರೆ