ಟಿಕೆಟ್ ಬೇಕಾ? SMS ಕಳಿಸಿ

ರೇಲ್ವೆ ಇಲಾಖೆಯಿಂದ ಶೀಘ್ರ ಹೊಸ ಸಂಖ್ಯೆ ಘೋಷಣೆ

ನವದೆಹಲಿ: ಇನ್ನು ಮುಂದೆ ರೇಲ್ವೆ ಟಿಕೆಟ್ ಬುಕ್ಕಿಂಗ್‌ಗಾಗಿ ನೀವು ರೇಲ್ವೆ ನಿಲ್ದಾಣದಲ್ಲಿ ಸರದಿ ಸಾಲಲ್ಲಿ ನಿಲ್ಲಬೇಕಾಗಿಲ್ಲ, ರೇಲ್ವೆ ವೆಬ್‌ಸೈಟ್ ಜಾಲಾಡಬೇಕಾಗಿಲ್ಲ. ಅಂಗೈಯಲ್ಲೇ ಇರುವ ಮೊಬೈಲ್‌ನಿಂದ ಎಸ್‌ಎಂಎಸ್ ಮಾಡಿದರೆ ಸಾಕು. ನೀವು ಪ್ರಯಾಣಿಸಬೇಕಿರುವ ರೈಲು ಟಿಕೆಟ್ ಬುಕ್ ಆಗುತ್ತದೆ.

ಹೌದು. ಈ ಎಸ್‌ಎಂಎಸ್ ಆಧರಿತ ರೈಲು ಟಿಕೆಟ್ ಬುಕ್ಕಿಂಗ್ ಸೇವೆ ಜು.1ರಿಂದ ದೇಶಾದ್ಯಂತ ಜಾರಿಗೆ ಬರಲಿದೆ. ಈ ಸೌಲಭ್ಯ ಬಳಸಿ ಸಾಮಾನ್ಯ ಮೊಬೈಲ್‌ನಿಂದಲೂ ರೇಲ್ವೆ ಟಿಕೆಟ್ ಬುಕ್ ಮಾಡುವುದು ಸಾಧ್ಯವಾಗಲಿದೆ. ಈ ನಿಟ್ಟಿನಲ್ಲಿ ಟಿಕೆಟ್ ಬುಕ್ಕಿಂಗ್‌ಗಾಗಿ ಆರಂಭಿಸಲಾಗಿರುವ ನೂತನ ಸಂಖ್ಯೆಯನ್ನು ಐಆರ್‌ಸಿಟಿಸಿಯು ಶೀಘ್ರದಲ್ಲೇ ಘೋಷಣೆ ಮಾಡಲಿದೆ.
ಅನುಕೂಲ ಏನು?: ಈ ನೂತನ ಸೇವೆಗಾಗಿ ಇಂಡಿಯನ್ ರೇಲ್ವೆ ಕ್ಯಾಟರಿಂಗ್ ಆ್ಯಂಡ್ ಟೂರಿಸಂ ಕಾರ್ಪೊರೇಷನ್ ಇಂಟರ್ನೆಟ್ ರಹಿತ ಎರಡು ರೀತಿಯ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಿದೆ. ಬುಕ್‌ಮಾಡಿದ ಟಿಕೆಟ್‌ನ ಪ್ರಿಂಟ್ ತೆಗೆಯಬೇಕಾದ ಅಗತ್ಯವೂ ಇರುವುದಿಲ್ಲ. ಪ್ರಯಾಣದ ವೇಳೆ ನಿಮ್ಮ ಮೊಬೈಲ್‌ನಲ್ಲಿರುವ ಎಸ್‌ಎಂಎಸ್ ಅನ್ನೇ ಟಿಕೆಟ್ ಆಗಿ ಪರಿಗಣಿಸಲಾಗುತ್ತದೆ.
ಈ ನೂತನ ವ್ಯವಸ್ಥೆಯ ಮುಖ್ಯ ಅನುಕೂಲವೇನೆಂದರೆ ಪ್ರಯಾಣಿಕರು ದಿನದ ಯಾವುದೇ ಅವಧಿಯಲ್ಲಿ, ಯಾವುದೇ ಸ್ಥಳದಿಂದಲಾದರೂ ಟಿಕೆಟ್ ಬುಕ್ಕಿಂಗ್ ಮಾಡುವುದು ಸಾಧ್ಯವಿದೆ.

ದರ ಎಷ್ಟು?
ಟಿಕೆಟ್ ಬುಕ್ ಮಾಡಲು ಕಳುಹಿಸಲಾಗುವ ಪ್ರತಿ ಎಸ್‌ಎಂಎಸ್‌ಗೆ 3 ನಿಗದಿಪಡಿಸಲಾಗಿದೆ. ಇದಲ್ಲದೆ, 5 ಸಾವಿರದ ವರೆಗಿನ ಪ್ರತಿ ಟಿಕೆಟ್‌ಗೆ 5, 5 ಸಾವಿರಕ್ಕಿಂತ ಹೆಚ್ಚಿನ ಟಿಕೆಟ್‌ಗೆ 10 ತೆರಿಗೆ ವಿಧಿಸಲಾಗುತ್ತದೆ.

ಟಿಕೆಟ್ ಬುಕ್ಕಿಂಗ್ ಹೇಗೆ?
-ಎಸ್‌ಎಂಎಸ್ ಟಿಕೆಟ್ ಬುಕ್ಕಿಂಗ್ ಸೇವೆಗಾಗಿ ನೀವು ಮೊದಲು ನಿಮ್ಮ ಮೊಬೈಲ್ ಸಂಖ್ಯೆಯನ್ನು ಐಆರ್‌ಟಿಸಿ ಹಾಗೂ ಬ್ಯಾಂಕ್‌ನಲ್ಲಿ ನೋಂದಣಿ ಮಾಡಿರಬೇಕು. ಆಗ ಬ್ಯಾಂಕ್ ನಿಮಗೆ ಎಂಎಂಐಡಿ (ಮೊಬೈಲ್ ಮನಿ ಐಡೆಂಟಿಫೈಯರ್) ಮತ್ತು ಒಪಿಟಿ (ಒನ್‌ಟೈಂ ಪಾಸ್‌ವರ್ಡ್) ನೀಡುತ್ತದೆ.

- ಟಿಕೆಟ್ ಬುಕ್ ಮಾಡಬೇಕೆಂದಿದ್ದರೆ ರೇಲ್ವೆಯು ನೀಡಿರುವ ವಿಶೇಷ ಸಂಖ್ಯೆಗೆ ಪ್ರಯಾಣಿಸಬೇಕಿರುವ ರೈಲಿನ ಸಂಖ್ಯೆ, ತಲುಪಬೇಕಿರುವ ಸ್ಥಳ, ಪ್ರಯಾಣದ ದಿನಾಂಕ, ಕ್ಲಾಸ್‌ನ ಜತೆಗೆ ಹೆಸರು, ವಯಸ್ಸು, ಲಿಂಗ (ಸ್ತ್ರೀ ಅಥವಾ ಪುರುಷ)  ಮಾಹಿತಿಯನ್ನು ದಾಖಲಿಸಿ ರೇಲ್ವೆ ನೀಡುವ ಆ ಸಂಖ್ಯೆಗೆ "BOOK’ ಎಂದು ಮೆಸೇಜ್ ಮಾಡಿ.

-ನಂತರ ನಿಮ್ಮ ಮೊಬೈಲ್‌ಗೆ ಟ್ರಾನ್ಸ್ಯಾಕ್ಷನ್ ಐಡಿ ಕಳುಹಿಸಿ ಕೊಡಲಾಗುತ್ತದೆ. ಬಳಿಕ ಟ್ರ್ಯಾನ್ಸ್ಯಾಕ್ಷನ್ ಐಡಿ, ಎಂಎಂಐಡಿಯೊಂದಿಗೆ 'PAY', ಎಂದು ಟೈಪ್ ಮಾಡಿ ಇನ್ನೊಂದು ಎಸ್‌ಎಂಎಸ್ ಕಳುಹಿಸಬೇಕು. ಆಗ ನಿಮ್ಮ ಟಿಕೆಟ್ ಬುಕ್ ಆಗುತ್ತದೆ.