ಬಡವರಿಗೆ ಇಂದಿನಿಂದ ಅನ್ನಭಾಗ್ಯ

ಕನ್ನಡಪ್ರಭ ವಾರ್ತೆ, ಬೆಂಗಳೂರು, ಜು.9-
ರಾಜ್ಯದ 5.7 ಕೋಟಿ ಜನರಿಗೆ ಬುಧವಾರದಿಂದ ಅನ್ನಭಾಗ್ಯ...
ಅಂದರೆ ರಾಜ್ಯದ ಶೇ.93ರಷ್ಟು ಜನರು 'ಅನ್ನಭಾಗ್ಯ' ಯೋಜನೆ ಸೌಲಭ್ಯಕ್ಕೆ ಪಾತ್ರರಾಗಲಿದ್ದಾರೆ. ಕಾಂಗ್ರೆಸ್ ತನ್ನ ವಿಧಾನಸಭೆ ಚುನಾವಣೆ ಪ್ರಣಾಳಿಕೆಯಲ್ಲಿ ಪ್ರಸ್ತಾಪಿಸಿದಂತೆ ಒಂದು ರುಪಾಯಿಗೆ ಒಂದು ಕೆಜಿ ಅಕ್ಕಿ ನೀಡುವ ಯೋಜನೆಗೆ ಬುಧವಾರ ಅಧಿಕೃತ ಚಾಲನೆ ದೊರೆಯಲಿದೆ. ಮುಖ್ಯಮಂತ್ರಿಯಾಗಿ ಅಧಿಕಾರ ಸ್ವೀಕರಿಸಿದ ದಿನವೇ ಸಿದ್ದರಾಮಯ್ಯ ಅವರು ಅಗ್ಗದ ಅಕ್ಕಿ ಯೋಜನೆ ಪ್ರಕಟಿಸಿದ್ದರು. ಜೂನ್‌ನಿಂದಲೇ ಆರಂಭವಾಗಬೇಕಿದ್ದ ಈ ಯೋಜನೆ ಒಂದು ತಿಂಗಳ ತಡವಾಗಿ ಪ್ರಾರಂಭವಾಗುತ್ತಿದೆ.
ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಬೆಂಗಳೂರಿನ ಸ್ವಾತಂತ್ರ್ಯ ಉದ್ಯಾನದಲ್ಲಿ ಅನ್ನಭಾಗ್ಯ ಯೋಜನೆಗೆ ಬುಧವಾರ ಚಾಲನೆ ನೀಡಲಿದ್ದಾರೆ. ರಾಜ್ಯದೆಲ್ಲೆಡೆಯೂ ಬುಧವಾರದಿಂದಲೇ ಯೋಜನೆ ಜಾರಿಗೆ ಬರಲಿದ್ದು, ಆಯಾ ನ್ಯಾಯಬೆಲೆ ಅಂಗಡಿಗಳು ಯಾವ ಕಾಲದಲ್ಲಿ ಅಕ್ಕಿ ವಿತರಿಸಲಾಗುತ್ತದೋ ಅಂದಿನಿಂದಲೇ 1ರು.ಗೆ ಒಂದು ಕೆಜಿ ಅಕ್ಕಿ ಖರೀದಿಸಬಹುದು.
ಅಂತ್ಯೋದಯ, ಬಡತನ ರೇಖೆಯಿಂದ ಕೆಳಗಿರುವ ಕಾರ್ಡ್‌ದಾರರು ಅನ್ನಭಾಗ್ಯ ಯೋಜನೆಯ ಫಲಾನುಭವಿಗಳು. ಒಬ್ಬ ಸದಸ್ಯರಿದ್ದರೆ 10 ಕೆಜಿ, 2 ಸದಸ್ಯರಿದ್ದರೆ 20 ಕೆಜಿ ಹಾಗೂ ಇಬ್ಬರಿಗಿಂತ ಹೆಚ್ಚಿನ ಸದಸ್ಯರಿದ್ದರೆ ಪ್ರತಿ ತಿಂಗಳು 30 ಕೆಜಿ ಅಕ್ಕಿ ಪಡೆಯಲಿದ್ದಾರೆ. ಅಂತ್ಯೋದಯ ಕಾರ್ಡ್‌ನಲ್ಲಿ ಸದಸ್ಯರ ಲೆಕ್ಕಾಚಾರ ಇಲ್ಲ. ಆ ಕಾರ್ಡ್‌ಗೆ ಪ್ರತಿ ತಿಂಗಳು 35 ಕೆಜಿ ಅಕ್ಕಿ ನೀಡಲಾಗುತ್ತದೆ. ಬಿಪಿಎಲ್, ಅಂತ್ಯೋದಯದಲ್ಲಿ ಒಟ್ಟು 98,35,701 ಕಾರ್ಡ್‌ಗಳಿದ್ದು, 20,459 ನ್ಯಾಯಬೆಲೆ ಅಂಗಡಿಗಳ ಮೂಲಕ ಯೋಜನೆಯಡಿ ಅಕ್ಕಿ ಖರೀದಿಸಬಹುದು.
    
ಸಂಪೂರ್ಣ ಸಜ್ಜು: ಅನ್ನಭಾಗ್ಯ ಯೋಜನೆಯಡಿ ಅಕ್ಕಿ ವಿತರಿಸಲು ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆ ಸಂಪೂರ್ಣ ಸಜ್ಜಾಗಿದೆ. ಇದಕ್ಕೆ ಅಗತ್ಯವಿರುವ ಅಕ್ಕಿಯನ್ನು ಜಿಲ್ಲಾ ಹಾಗೂ ತಾಲೂಕು ಮಟ್ಟದ ಅಧಿಕಾರಿಗಳು ಪಡೆದುಕೊಳ್ಳಲು ಈಗಾಗಲೇ ಸೂಚಿಸಲಾಗಿದೆ. ಬಹುತೇಕ ಎಲ್ಲರೂ ಅಕ್ಕಿಯನ್ನು ಪಡೆದುಕೊಂಡಿದ್ದಾರೆ. ಹೀಗಿದ್ದರೂ ರಾಜ್ಯದಲ್ಲಿರುವ 20459 ನ್ಯಾಯಬೆಲೆ ಅಂಗಡಿಗಳಲ್ಲೂ ಬುಧವಾರದಿಂದಲೇ ಒಂದು ರುಪಾಯಿ ಅಕ್ಕಿ ಸಿಗುತ್ತದೆ ಎಂಬ ಖಾತರಿ ಇಲ್ಲ. ಏಕೆಂದರೆ ಈವರೆಗೂ ಇರುವ ವ್ಯವಸ್ಥೆಯಲ್ಲಿ ಒಂದೊಂದು ನ್ಯಾಯಬೆಲೆ ಅಂಗಡಿಯವರು ಒಂದೊಂದು ದಿನ ಅಕ್ಕಿ ವಿತರಿಸುತ್ತಾರೆ. ಹೀಗಾಗಿ 10ನೇ ತಾರೀಖಿನಿಂದ ಹಿಡಿದು 30ರವರೆಗೂ ತಿಂಗಳ ಪಡಿತರ ವಿತರಣೆಯಾಗುತ್ತದೆ. ಅಗ್ಗದ ಅಕ್ಕಿ ಯೋಜನೆ ಜೂನ್‌ನಿಂದಲೇ ಪ್ರಾರಂಭವಾಗಬೇಕಿತ್ತು. ಆಗ ಯೋಜನೆ ಪ್ರಾರಂಭವಾಗಿದ್ದರೆ ಅಕ್ಕಿ ಕೊರತೆ ಹಾಗೂ ಖರೀದಿ ಸಮಸ್ಯೆಯನ್ನು ರಾಜ್ಯ ಸರ್ಕಾರ ಎದುರಿಸಬೇಕಾಗಿತ್ತು. ಈಗ ಯೋಜನೆ ಜಾರಿ ಮಾಡುವ ಮೂಲಕ ಹೊರಗಡೆಯಿಂದ ಅಕ್ಕಿ ಖರೀದಿ ಮಾಡದೆಯೇ ನಿರ್ವಹಣೆ ಮಾಡುತ್ತಿದೆ. ಸರ್ಕಾರದ ದಾಸ್ತಾನಿನಲ್ಲಿರುವ ಅಕ್ಕಿ, ಕೇಂದ್ರ ಸರ್ಕಾರ ನೀಡಿರುವ 20 ಸಾವಿರ ಮೆಟ್ರಿಕ್ ಟನ್ ಹೆಚ್ಚುವರಿ ಅಕ್ಕಿ ಸೇರಿದಂತೆ ಜುಲೈ ತಿಂಗಳಿಗೆ ಅಗತ್ಯ ವಿರುವ 2.78 ಮೆಟ್ರಿಕ್ ಟನ್ ಅಕ್ಕಿ ಸರಿಯಾಗುತ್ತದೆ. ಹೀಗಾಗಿ, ಜುಲೈ ತಿಂಗಳಲ್ಲಿ ಅನ್ನಭಾಗ್ಯ ಯೋಜನೆಗೆ ಖರೀದಿಸುವ ಪ್ರಮೇಯವೇ ಇಲ್ಲ.

ಅಕ್ಕಿ ಖರೀದಿ: ಆಗಸ್ಟ್ ತಿಂಗಳಿನಲ್ಲಿ ಅಕ್ಕಿ ನೀಡುವ ಸಂದರ್ಭಕ್ಕೆ ಖರೀದಿ ಅಗತ್ಯವಾಗುತ್ತದೆ. ಇದಕ್ಕಾಗಿ ಛತ್ತೀಸ್‌ಗಢದಿಂದ ಖರೀದಿಸುವ ಪ್ರಕ್ರಿಯೆಗೆ ಸರ್ಕಾರ ಈಗಾಗಲೇ ಚಾಲನೆ ನೀಡಿದ್ದು, ಒಪ್ಪಂದಕ್ಕೆ ಸಹಿ ಹಾಕುವುದಷ್ಟೇ ಬಾಕಿ ಉಳಿದಿದೆ. ಇದಲ್ಲದೆ, ಟೆಂಡರ್ ಮೂಲಕವೂ ಸ್ಪರ್ಧಾತ್ಮಕ ದರದಲ್ಲಿ ಅಕ್ಕಿ ಖರೀದಿಸಲು ನಿರ್ಧರಿಸಿದೆ. ಇದಲ್ಲದೆ, ಕೇಂದ್ರ ಸರ್ಕಾರದ ಆಹಾರ ಭದ್ರತೆ ಅಧಿಸೂಚನೆಯಿಂದಲೂ ರಾಜ್ಯ ಸರ್ಕಾರಕ್ಕೆ ಹೆಚ್ಚಿನ ಅಕ್ಕಿ ಬರುವ ನಿರೀಕ್ಷೆ ಇದೆ. ರಾಜ್ಯ ಸರ್ಕಾರ ಸುಮಾರು 4500 ಕೋಟಿ ಹೆಚ್ಚುವರಿ ಹೊರೆ ಹಾಕಿಕೊಂಡು ಅನ್ನಭಾಗ್ಯ ಯೋಜನೆ ಜಾರಿ ಮಾಡಿದೆ. ಅಗತ್ಯವಿರುವ 2.78 ಮೆಟ್ರಿಕ್ ಟನ್ ಅಕ್ಕಿಯಲ್ಲಿ ಕೇಂದ್ರ ಸರ್ಕಾರ 1.77 ಮೆಟ್ರಿಕ್ ಟನ್ ಅಕ್ಕಿ ನೀಡುತ್ತಿದೆ. ಈ ತಿಂಗಳು ಹೆಚ್ಚುವರಿಯಾಗಿ 20 ಸಾವಿರ ಮೆಟ್ರಿಕ್ ಟನ್ ಅಕ್ಕಿ ನೀಡಿದೆ. ಹೀಗಾಗಿ ಈ ಬಾರಿ ಯಾವುದೇ ರೀತಿಯ ಸಮಸ್ಯೆ ಇಲ್ಲದೆ ಅಕ್ಕಿ ವಿತರಣೆಯಾಗುವ ಲಕ್ಷಣಗಳಿವೆ. ಆದರೆ, ಆಗಸ್ಟ್‌ನಿಂದ ಅಕ್ಕಿ ಖರೀದಿಯಾಗದೆ ಅನ್ನಭಾಗ್ಯ ಯೋಜನೆ ಸಂಪೂರ್ಣಗೊಳ್ಳುವುದಿಲ್ಲ.

ಅಂತ್ಯೋದಯ ಹಾಗೂ ಬಿಪಿಎಲ್ ಕಾರ್ಡ್‌ಗಳ ಜಿಲ್ಲಾವಾರು ವಿವರ
ಜಿಲ್ಲೆ     ಅಂತ್ಯೋದಯ    ಬಿಪಿಎಲ್
ಬಾಗಲಕೋಟೆ     46,673    2,64,180
ಬೆಂಗಳೂರು ನಗರ    30,116    6,91,411
ಬೆಂಗಳೂರು ಗ್ರಾ.     14,659    1,74,793
ಬೆಳಗಾವಿ    83,361     6,48,853
ಬಳ್ಳಾರಿ     63,912     3,03,517
ಬೀದರ್    40,811    2,45,534
ಬಿಜಾಪುರ      46,880    2,96,453
ಚಾಮರಾಜನಗರ      35,820    2,03,059
ಚಿಕ್ಕಮಗಳೂರು     22,922     1,99,140
ಚಿತ್ರದುರ್ಗ     43,574    2,98,022
ಚಿಕ್ಕಬಳ್ಳಾಪುರ    28,775    2,39,584
ದಕ್ಷಿಣ ಕನ್ನಡ     21,350    1,58,457
ದಾವಣಗೆರೆ      50,885    3,33,830
ಧಾರವಾಡ      30,407    2,78,816
ಗದಗ      29,553    1,72,797
ಗುಲ್ಬರ್ಗಾ    63,717      4,04,599
ಹಾಸನ     23,795     3,63,412
ಹಾವೇರಿ    47,882     2,61,407
ಕೊಡಗು     9,672    68,719
ಕೋಲಾರ     30,305     2,68,061
ಕೊಪ್ಪಳ     38,256     2,04,131
ಮಂಡ್ಯ    35,108    3,74,364
ಮೈಸೂರು     51,097     5,47,736
ರಾಯಚೂರು     54,342    2,45,190
ರಾಮನಗರ     19,056     2,15,318
ಶಿವಮೊಗ್ಗ     38,717    2,69,569
ತುಮಕೂರು    50,286    4,77,783
ಉಡುಪಿ    18,513    95,904
ಉತ್ತರ ಕನ್ನಡ     16,321     2,18,381
ಯಾದಗಿರಿ     30,009    1,66,126

ಅನ್ನಭಾಗ್ಯ ಯೋಜನೆಗೆ ಅಕ್ಕಿ ಕೊರತೆ ಇಲ್ಲ. ಜುಲೈ 10ರಿಂದ ರಾಜ್ಯದ ಎಲ್ಲ ಜಿಲ್ಲಾ ಕೇಂದ್ರಗಳಲ್ಲಿ ಏಕಕಾಲಕ್ಕೆ ಈ ಯೋಜನೆ ಆರಂಭಗೊಳ್ಳುತ್ತದೆ. ಬೆಂಗಳೂರಿನ ಸ್ವಾತಂತ್ರ್ಯ ಉದ್ಯಾನವನದಲ್ಲಿ ಯೋಜನೆಗೆ ನಾನು ಅಧಿಕೃತ ಚಾಲನೆ ನೀಡಲಿದ್ದೇನೆ.
- ಸಿದ್ದರಾಮಯ್ಯ, ಮುಖ್ಯಮಂತ್ರಿ

ಬಹುತೇಕ ಎಲ್ಲ ನ್ಯಾಯಬೆಲೆ ಅಂಗಡಿಯಲ್ಲಿ ಅಕ್ಕಿ ಲಭ್ಯ. ಆದರೆ, ಈವರೆಗೂ ಇರುವ ವ್ಯವಸ್ಥೆಯಲ್ಲಿ ಒಂದೊಂದು ನ್ಯಾಯಬೆಲೆ ಅಂಗಡಿಯವರು ಒಂದೊಂದು ದಿನ ಅಕ್ಕಿ ವಿತರಿಸುತ್ತಾರೆ. ಹೀಗಾಗಿ, ಯಾರೂ ಆತಂಕ ಪಡಬೇಕಿಲ್ಲ. ಜುಲೈ ತಿಂಗಳ ಪಡಿತರದಿಂದಲೇ ಒಂದು ಕೆಜಿ ಅಕ್ಕಿ ಒಂದು ರುಪಾಯಿಗೆ ಸಿಗುತ್ತದೆ. ಈ ಯೋಜನೆ ನಿರಂತರ.
- ದಿನೇಶ್ ಗುಂಡೂರಾವ್,
ಆಹಾರ ಮತ್ತು ನಾಗರಿಕ ಸರಬರಾಜು ಖಾತೆ ರಾಜ್ಯ ಸಚಿವ

ಹೆಚ್ಚಾಯ್ತು ಜನಸಂಖ್ಯೆ
ರಾಜ್ಯದಲ್ಲಿ ಲಕ್ಷಾಂತರ ಬೋಗಸ್ ಬಿಪಿಎಲ್ ಕಾರ್ಡ್‌ಗಳಿರುವುದನ್ನು ಅಂಕಿ- ಅಂಶಗಳೇ ಸ್ಪಷ್ಪಪಡಿಸುತ್ತವೆ. ರಾಜ್ಯದಲ್ಲಿ ಅಂತ್ಯೋದಯ ಹಾಗೂ ಬಿಪಿಎಲ್‌ಕಾರ್ಡ್‌ಗಳ ಸಂಖ್ಯೆ 98,35,701. ಬಡತನ ರೇಖೆಗಿಂತ ಮೇಲಿರುವ (ಎಪಿಎಲ್) ಕಾರ್ಡ್‌ಗಳ ಸಂಖ್ಯೆ 35,26,773. ಅನ್ನಭಾಗ್ಯ ಯೋಜನೆ ಅಂದಾಜಿನ ಪ್ರಕಾರ 5.7 ಕೋಟಿ ಜನರು ಫಲಾನುಭವಿಗಳು. ಇದರಲ್ಲಿ ಎಪಿಎಲ್ ಕಾರ್ಡ್‌ನಲ್ಲಿರುವವರು ಸೇರಿಲ್ಲ. 2011ರ ಜನಗಣತಿ ಪ್ರಕಾರ ರಾಜ್ಯದಲ್ಲಿರುವ 6.11 ಕೋಟಿ ಜನರಿದ್ದಾರೆ. ಬಿಪಿಎಲ್ ಹಾಗೂ ಅಂತ್ಯೋದಯ ವ್ಯಾಪ್ತಿಯಲ್ಲೇ 5.7ಕೋಟಿ ಜನರಿದ್ದರೆ. ಇನ್ನು ಅದಕ್ಕಿಂತ ಮೇಲಿರುವ ಜನರು ಕೇವಲ 41 ಲಕ್ಷ ಮಾತ್ರವೇ? ಈ ಪ್ರಶ್ನೆಗೆ ಸ್ಪಷ್ಟ ಉತ್ತರ ದೊರೆತಿಲ್ಲ. ನಕಲಿ ಅಥವಾ ಬೋಗಸ್ ಬಿಪಿಎಲ್ ಕಾರ್ಡ್‌ಗಳು ರದ್ದಾದಾಗ ಮಾತ್ರ 'ಅನ್ನಭಾಗ್ಯ'ಕ್ಕೆ ನೈಜ ಫಲಾನುಭವಿಗಳು ಅರ್ಹರಾಗುತ್ತಾರೆ.

ಒಟ್ಟು ಬಿಪಿಎಲ್ ಕಾರ್ಡ್‌ಗಳು
87,00,740

ಒಬ್ಬರೇ ಸದಸ್ಯರಿರುವ ಕಾರ್ಡ್‌ಗಳು
3,60,200
ಇಬ್ಬರು ಸದಸ್ಯರಿರುವ ಕಾರ್ಡ್‌ಗಳು
 8,30,742
ಇಬ್ಬರಿಗಿಂತ ಹೆಚ್ಚು ಸದಸ್ಯರಿರುವ ಕಾರ್ಡ್
75,09,798
ಅಂತ್ಯೋದಯ ಕಾರ್ಡ್‌ಗಳು
11,34,96
ಒಬ್ಬ ಸದಸ್ಯನ ಕಾರ್ಡ್‌ಗೆ ತಿಂಗಳಿಗೆ10 ಕೆಜಿ ಅಕ್ಕಿ
ಎರಡು ಕಾರ್ಡ್‌ಗೆ ತಿಂಗಳಿಗೆ
20 ಕೆಜಿ ಅಕ್ಕಿ
ಎರಡಕ್ಕಿಂತ ಹೆಚ್ಚಿರುವ ಕಾರ್ಡ್‌ಗೆ
30 ಕೆಜಿ ಅಕ್ಕಿ
ಅಂತ್ಯೋದಯ ಕಾರ್ಡ್‌ಗೆ
 35 ಕೆಜಿ ಅಕ್ಕಿ

ಒಟ್ಟು ಫಲಾನುಭವಿಗಳು    5.7 ಕೋಟಿ
ಅಗತ್ಯವಿರುವ ಅಕ್ಕಿ    2,78,428 ಮೆಟ್ರಿಕ್ ಟನ್
ರಾಜ್ಯ ಸರ್ಕಾರಕ್ಕೆ ಹೆಚ್ಚುವರಿ ಹೊರೆ     4500 ಕೋಟಿ
ಒಟ್ಟು ನ್ಯಾಯಬೆಲೆ ಅಂಗಡಿಗಳು     20,459