ಉತ್ತರಾಧಿಕಾರಿ

ಲಕ್ಷ್ಮಿ ಬರ್ಕ್‌ಲಿ ರಮೇಶ್ ಕಿರಗಂದೂರು, ಮಂಡ್ಯ
ಮನೆಯೇ ಮಂತ್ರಾಲಯ, ಮನಸೇ ದೇವಾಲಯ ಅಂತಾರೆ. ಆದರೂ ದೇವರನ್ನು ಹುಡುಕಿಕೊಂಡು ದೇಗುಲಗಳಿಗೆ ಹೋಗುತ್ತಾರಲ್ಲ ಏಕೆ?
- ಭಕ್ತರನ್ನು ಕಣ್ತುಂಬಿಸಿಕೊಳ್ಳಲು!

ವಿ. ಹೇಮಂತ್‌ಕುಮಾರ್, ಬೆಂಗಳೂರು.
ಹೆಂಡತಿ ಗೊರಕೆ ಹೊಡೆಯುತ್ತಾ ಮಲಗಿದರೆ ಗಂಡನಾದವನು ಏನು ಮಾಡಬೇಕು?
- ಪೊರಕೆ ಹಿಡಿದು ಮನೆಯೆಲ್ಲ ಕ್ಲೀನ್ ಮಾಡಬೇಕು!

ಬರ್ಕ್‌ಲಿ ರಮೇಶ್, ಕಿರಗಂದೂರು, ಮಂಡ್ಯ.
ರಂಭೆ, ಊರ್ವಶಿ, ಮೇನಕೆಯರು ನಿಮ್ಮ ಮುಂದೆ ಪ್ರತ್ಯಕ್ಷರಾಗಿ ಐ ಲವ್ ಯೂ ಎಂದರೆ ಏನ್ಮಾಡ್ತೀರಿ?
- ಐ ಲವ್ ಯೂ ತ್ರೀ ಅಂತೀನಿ!

ಬಿ.ಎಸ್. ನಾರಾಯಣಸ್ವಾಮಿ, ಬೋಧನ ಹೊಸಹಳ್ಳಿ.
ಉರಿ ಬಿಸಿಲಿಗೆ ತಂಗಾಳಿಯಾದಳು,ಕೊರೆವ ಚಳಿಗೆ ಕಂಬಳಿಯಾದಳು, ಸುರಿವ ಮಳೆಗೆ ಕೊಡೆಯಾದಳು, ಈಗವಳು ಮೌನವಾಗಿದ್ದಾಳಲ್ಲ ಏಕೆ?
- ಹಾಗಾದರೆ ನಿಮಗೀಗ 'ಆಪತ್ಕಾಲ!'

ಕೆ.ಎಂ. ಲಿಂಗರಾಜು, ನಂಜನಗೂಡು
67ರ ದಿಗ್ವಿಜಯಸಿಂಗ್ ಅಷ್ಟು ಸಾಧಿಸುತ್ತಿರುವಾಗ 17ರ ಪ್ರಾಯದವರು ಏನು ಸಾಧಿಸಬೇಕು?
- ದಿಗ್ವಿಜಯರ ಅಭಿ'ಪ್ರಾಯ' ಕೇಳಿ!

ಪಿ.ಜೆ. ರಾಘವೇಂದ್ರ, ಮೈಸೂರು.
ಪ್ರೇಮಕುಮಾರಿಗೆ ಸಿದ್ದರಾಮಣ್ಣನೇ ಬಾಡಿಗೆ ಮನೆ ಕೊಡಿಸಬೇಕಂತೆ?
- ಅದೂ 'ಶ್ರೀರಾಮ ನಿಲಯ'ವೇ ಆಗಬೇಕಂತೆ!

ನೇರಲಗುಡ್ಡ ಶಿವಕುಮಾರ್, ಶಿರಾ.
ಸಕ್ಕರೆ ಸಿಹಿಗೂ, ಬೆಲ್ಲದ ಸಿಹಿಗೂ ವ್ಯತ್ಯಾಸವೇನು?
- ಸಕ್ಕರೆ ಸಿಹಿ ಇರುವೆಗಳಿಗೆ ಇಷ್ಟ, ಬೆಲ್ಲದ ಸಿಹಿ ಗೊದ್ದಗಳಿಗೆ ಇಷ್ಟ!

ಬೋ.ಪಾ. ವೆಂಕಟೇಶ್, ಬೆಂಗಳೂರು.
ಚಿತೆಗೂ, ಚಿಂತೆಗೂ ವ್ಯತ್ಯಾಸವೇನು?
- ಚಿತೆ ಮೇಲೆ ಬಾಡಿ ಇರುತ್ತೆ. ಚಿಂತೆ ಬಾಡಿ ಒಳಗೆ ಇರುತ್ತೆ!

=  ಎಸ್.ವಿ. ಪದ್ಮನಾಭ