ಆಸೆಗೊಂದು ರೆಕ್ಕೆ

ಅವನು ಬಡ ತಂದೆ. ಮನೆಯ ಎಲ್ಲರನ್ನೂ ಖುಷಿಯಾಗಿಡಲು ಕಷ್ಟಪಡುತ್ತಿದ್ದ. ಜೊತೆಗೆ ಹೆಚ್ಚು ಓದಿಕೊಂಡರೆ ಹೆಚ್ಚು ಸಂಬಳದ ಕೆಲಸ ಸಿಕ್ಕೀತೆಂದು ಸಂಜೆ ಕಾಲೇಜಿಗೂ ಹೋಗುತ್ತಿದ್ದ. ಹೀಗಾಗಿ ಭಾನುವಾರವೊಂದೇ ಮನೆಯವರ ಮುಖ ನೋಡುತ್ತಿದ್ದ. ವರ್ಷಗಳು ಉರುಳುವಷ್ಟರಲ್ಲಿ ಡಿಗ್ರಿ ಮುಗಿಸಿದ. ಅವನಿಗೆ ಹುದ್ದೆಯಲ್ಲಿ ಬಡ್ತಿ ಸಿಕ್ಕಿತು. ಸ್ವಂತ ಮನೆ ಮಾಡಿಕೊಂಡ, ಕಾರು ತಗೊಂಡ. ಮಕ್ಕಳಿಗೆ ಹೊಸ ಬಟ್ಟೆಗಳನ್ನು ಕೊಡಿಸಿದ. ಆದರೆ ಈಗಲೂ ಮನೆಯವರೊಂದಿಗೆ ವಾರಕ್ಕೆ ಒಂದು ದಿನವಿದ್ದರೆ ಹೆಚ್ಚು. ಕೇಳಿದರೆ, 'ನಿಮಗಾಗಿಯೇ ಅಲ್ಲವೇ ದುಡಿಯುತ್ತಿರೋದು? ಇನ್ನೊಂದಷ್ಟು ವರ್ಷ ಅನುಭವವಾದರೆ ಬಾಸ್ ಆಗುತ್ತೇನೆ. ಎಲ್ಲರೂ ಸುಖವಾಗಿರಬಹುದು' ಎಂದ. ವರ್ಷಗಳುರುಳಿದವು. ಈಗ ತಂದೆ ಬಾಸ್ ಆದ. ಮನೆ ಚಿಕ್ಕದೆನಿಸಿತು. ದೊಡ್ಡ ಬಂಗಲೆ ಕಟ್ಟಿಸಿದ. ರಜೆ ಕಳೆಯಲೆಂದೇ ಸಿಂಗಾಪುರದಲ್ಲಿ ಸ್ವಂತ ಮನೆ ಮಾಡಿದ. ಆಳುಕಾಳುಗಳನ್ನು ನೇಮಿಸಿದ. ಭವಿಷ್ಯಕ್ಕಾಗುವಷ್ಟು ಹಣ ಕೂಡಿಟ್ಟ. 'ಇನ್ನು ಮುಂದೆ ಹೆಂಡತಿ ಮಕ್ಕಳೊಂದಿಗೆ ಎಲ್ಲ ಸಮಯವನ್ನೂ ಕಳೆಯುತ್ತೇನೆ' ಎಂದ. ಕುಟುಂಬ ಖುಷಿ ಪಟ್ಟಿತು. ಮರುದಿನ ಮುಂಜಾನೆ ಆತ ಏಳಲೇ ಇಲ್ಲ!