ಪಕ್ಷಿ ಪ್ರಪಂಚ

ಇದು ಮೂಲತಃ ದಕ್ಷಿಣ ಭಾರತ ಮತ್ತು ಶ್ರೀಲಂಕಾಗಳಲ್ಲಿ ಕಂಡುಬರುವ ಪಕ್ಷಿ. ಇವು ಪೊದೆಗಳು, ಸಾಗುವಳಿ ಪ್ರದೇಶಗಳು ಮತ್ತು ತೋಟಗಳಲ್ಲಿ ಕಂಡುಬರುತ್ತವೆ. ಈ ಹರಟೆಮಲ್ಲ ಪಕ್ಷಿಗಳು ವಲಸೆ ಹೋಗುವ ಜಾತಿಯಲ್ಲ. ಚಿಕ್ಕ ದುಂಡಾಗಿರುವ ರೆಕ್ಕೆಗಳನ್ನು ಹೊಂದಿದ್ದು, ಹೆಚ್ಚು ದೂರ ಹಾರುವಷ್ಟು ಬಲಶಾಲಿಯಲ್ಲ. ಇವು ದಟ್ಟ ಕಾನನದಿಂದ ದೂರವಿರುತ್ತವೆ. ಆಹಾರಕ್ಕಾಗಿ ಮತ್ತು ಚಿಲಿಪಿಲಿಗುಟ್ಟುವುದಕ್ಕಾಗಿ ಹಿಂಡುಹಿಂಡಾಗಿಯೇ ಸಾಗುತ್ತವೆ. ಹಿಂಡಿನ ಹಕ್ಕಿಗಳು ಒಂದರ ಪಕ್ಕದಲ್ಲಿ ಒಂದು ಮಲಗುತ್ತವೆ ಹಾಗೂ ಈ ಗುಂಪಿನ ಮಧ್ಯದಲ್ಲಿಯೇ ಮರಿಹಕ್ಕಿಗಳು ತೂರಿಕೊಂಡು ಮಲಗುತ್ತವೆ.
ಇವು ಏಳು ಬಗೆಯ ವಿಶಿಷ್ಟ ಧ್ವನಿಯನ್ನು ಹೊರಡಿಸುವುದು ಕಂಡುಬರುತ್ತದೆ. ಕಾಡು ಹರಟೆಮಲ್ಲಗಳಿಗಿಂತಲೂ ಹಳದಿಕೊಕ್ಕಿನ ಹರಟೆಮಲ್ಲದ ಕೂಗು ಹೆಚ್ಚಿನ ಸ್ಥಾಯಿಯದ್ದಾಗಿರುತ್ತದೆ. ಕಾಡು ಹರಟೆಮಲ್ಲಗಳ ಕೂಗು ಮೂಗಿನಿಂದ ಹೊರಟಂತಿರುತ್ತದೆ ಮತ್ತು ಅವುಗಳ ಕೂಗಿನಲ್ಲಿ ಕರ್ಕಶತೆ ಹೆಚ್ಚಾಗಿ ಕಂಡುಬರುತ್ತದೆ.
ಹರಟೆಮಲ್ಲ ಸಾಮಾನ್ಯವಾಗಿ ಕೀಟಗಳನ್ನು ತಿನ್ನುತ್ತವಾದರೂ ಹಣ್ಣು, ಜೇನುತುಪ್ಪ ಮತ್ತು ಮನುಷ್ಯರು ಬಿಸಾಡಿದ ಆಹಾರ ಪದಾರ್ಥ, ಹಲ್ಲಿ, ಚೇಳುಗಳನ್ನೂ ತಿನ್ನುತ್ತವೆ. ಮೊಟ್ಟೆ ಇಡುವ ಸಮಯ ಮುಂಗಾರು ಆರಂಭವಾಗುವ ಮೊದಲು. ಒಂದು ಬಾರಿಗೆ ಎರಡರಿಂದ ನಾಲ್ಕು ನೀಲಿ ಬಣ್ಣದ ಮೊಟ್ಟೆಗಳನ್ನಿಡುತ್ತವೆ. ಮೊಟ್ಟೆ 14ರಿಂದ 16 ದಿನಗಳಲ್ಲಿ ಒಡೆದು ಮರಿ ಹೊರಬರುತ್ತದೆ.