ದೂರವಿರು ದೂರವಿರು

ಕೆಲವು ಚಾಟೂಕ್ತಿಗಳು, ಒಗಟಿನಂತಿರುತ್ತವೆ. ಅವಕ್ಕೆ ಉತ್ತರವನ್ನು ಹುಡುಕಬೇಕು. ಆ ಪ್ರಶ್ನೋತ್ತರದಲ್ಲೇ ಒಂದು ಜೀವನ ವಿಧಾನ, ಒಂದು ರೀತಿ ರಿವಾಜನ್ನು ನಮ್ಮ ಮುಂದೆ ಕಣ್ಣಿಗೆ ಕಟ್ಟಿದಂತೆ ಇಡುತ್ತವೆ. ಈ ಕೆಳಗಿನ ಚಾಟೂಕ್ತಿ ಅಂಥದು.

ಅನುತೇತುಂ ಮಾನಿನ್ಯಾ ದಯಿತಶ್ಚರಣೇ ಸರಾಗ ಚರಣಾಯಾಃ
ಯಾವತ್ಪತಿತಃ ಸ ತಯಾ ತತ್‌ಕ್ಷಣಮವಧೀರಿತಃ ಕಸ್ಮಾತ್

ಪತ್ನಿಯ ಬಳಿಗೆ ಬಂದ ಪತಿ, ಆಕೆಯನ್ನು ಸಲ್ಲಾಪಕ್ಕೆ ಕರೆದ. ಆಕೆಯಾದರೋ ಕೆಂಪು ಪಾದಗಳನ್ನು ಹೊಂದಿದ ಸುಂದರಿ. ಆದರೆ ಆ ಹೊತ್ತಿನಲ್ಲಿ ಆಕೆಯ ಪಾದಕ್ಕೆ ಇನ್ನಷ್ಟು ಕೆಂಪು ಸೇರಿತ್ತು. ಆದ್ದರಿಂದ ಆಕೆ ಆತನನ್ನು ಸೇರಲು ಒಲ್ಲದೆ, ದೂರವಿರುವಂತೆ ತಿಳಿಸಿದಳು.
ಅರೆ, ಆಕೆಯ ಪಾದ ಕೆಂಪಾದರೆ ದೂರವಿರಬೇಕೇಕೆ? ಅಂದರೆ, ಆಕೆ ರಜಸ್ವಲೆಯಾಗಿದ್ದಳು ಎಂಬುದು ಅದರರ್ಥ. ದೂರವಿರು ಎಂದದ್ದು ಕೋಪದಿಂದಲ್ಲ, ಮುಂದಿನ ಮೂರು ದಿನಗಳ ಮಟ್ಟಿಗೆ ಅಷ್ಟೇ. ತಿಂಗಳ ಮೂರು ದಿವಸಗಳ ಪಾಡು ಎಲ್ಲ ಹೆಣ್ಣುಗಳಿಗೂ ಸಾಮಾನ್ಯವಾದುದಷ್ಟೆ. ಆ ಹೊತ್ತಿನಲ್ಲಿ ಗಂಡನನ್ನು ಮಾತ್ರವಲ್ಲ, ಇಡೀ ಮನೆಯವರನ್ನೇ ದೂರವಿಡಬೇಕೆಂಬುದು ಪ್ರಾಚೀನ ಭಾರತದ ಹೆಣ್ಣಿಗಿದ್ದ ಕಟ್ಟುಕಟ್ಟಳೆ. ಅದನ್ನು ಕವಿತೆಯಲ್ಲಿ ತಂದ ಕವಿ (ಅಥವಾ ಕವಯಿತ್ರಿಯೋ?)ಗೂ ಮುಕ್ತತನವಿದ್ದಿರಬೇಕು.
ಪತ್ರಿಕೆಗಳಲ್ಲಿ ಬರುವ ಲೈಂಗಿಕ ಸಮಸ್ಯೆ ಸಮಾಧಾನಗಳನ್ನು ನೋಡಿದರೆ, ಪ್ರತಿವಾರವೂ ಒಂದಲ್ಲ ಒಂದು ಪ್ರಶ್ನೆ 'ಮುಟ್ಟಿನ ಅವಧಿಯಲ್ಲಿ ದಂಪತಿಗಳು ಸೇರಬಹುದೇ?' ಎಂದೇ ಇರುತ್ತದೆ. ಡಾಕ್ಟರರ ಉತ್ತರವೂ ಅದೇ- 'ಸೇರಬಹುದು, ಆದರೆ ಸ್ವಚ್ಛತೆ ಮುಖ್ಯ.' ಪಾಪ, ಹಿಂದಿನ ಕಾಲದಲ್ಲಿ ಗೈನಕಾಲಜಿಸ್ಟ್‌ಗಳು ಇರಲಿಲ್ಲವಲ್ಲ.

-ಹರಿಹರ