ಆಸ್ತಿ ಅಂತಸ್ತು

'ಅಲ್ಲಾ, ಸರ್ಕಾರಿ ಆಫೀಸಿನಲ್ಲಿರೋರು, ಎಷ್ಟೆಲ್ಲಾ ಆಸ್ತಿ ಮಾಡ್ಕೋತಾರೆ. ನೀವೇ ಸರಿ, ತಹಸಿಲ್ದಾರರಾಗಿ ರಿಟೈರ್ಡ್ ಆದರೂ, ಕುಚೇಲನ ಹಾಗೆ ಬದುಕಿರೋರು, ಇಬ್ರೂ ಗಂಡು ಮಕ್ಕಳು ನಾಳೆ ಇರೋದೊಂದು ಮನೆ ಗಾಗಿ ಜಗಳ ಆಡಿ ಸಂಬಂಧ ಕೆಡಿಸ್ಕೋಬೇಕಾ? ಇನ್ನೊಂದು ಮನೆ ಬೇಕಿತ್ತಲ್ವಾ? ಆ ಎಫ್.ಡಿ.ಎ. ರಾಜಶೇಖರಯ್ಯನನ್ನು ನೋಡಿ ನಮ್ಮನೆ ಎದ್ರು ಎರಡು ಬಂಗ್ಲೆ ಕೊಂಡುಕೊಂಡ. ಅವನ ವ್ಯವಹಾರ ಜ್ಞಾನ ನಿಮಗೆಲ್ಲಿ ಬರಬೇಕು...?'
ನನ್ನ ಹೆಂಡತಿಯ ಆಕ್ಷೇಪಣೆ ಮುಂದುವರಿದಿತ್ತು. ಪಾಪ, ನನ್ನ ಮಡದಿ, ನಾನವಳಿಗಾಗಿ ಏನೂ ಗಂಟು ಕೂಡಿಸಿಟ್ಟಿಲ್ಲ. ಸರ್ವೀಸ್‌ನಲ್ಲಿದ್ದಾಗ ನಾನ್ಯಾರಲ್ಲೂ ಲಂಚಕ್ಕಾಗಿ ಕೈವೊಡ್ಡಿದವನಲ್ಲ. ಅಧಿಕಾರ ದುರ್ಬಳಕೆ ಮಾಡಿಕೊಂಡವನಲ್ಲ. ನನ್ನಪ್ಪನ ಕುಟುಂಬದೊಡ್ಡದು, ಬಡತನ ಬೇರೆ. ನನಗೆ ಬರುತ್ತಿದ್ದ ಸಂಬಳ ಯಾವುದಕ್ಕೂ ಸಾಲುತ್ತಿರಲಿಲ್ಲ. ಹೆಂಡತಿಗೂ ಸಾಕಾಗಿ ಹೋಗಿತ್ತು. ಅದಕ್ಕೆಂದೇ ಅವಳ ಬೈಗುಳಗಳನ್ನೆಲ್ಲಾ ಮೌನವಾಗಿ ಸಹಿಸಿಕೊಂಡಿದ್ದೇನೆ.
ಇನ್ನೊಂದು ವಿಷಯ, ಮೊನ್ನೆ ಮೊನ್ನೆ ಲೋಕಾಯುಕ್ತರು ಆ ಎಫ್. ಡಿ.ಎ. ರಾಜಶೇಖರನ ಮನೆಗೆ ದಾಳಿಮಾಡಿ, ಆದಾಯ ಮೀರಿದ ಆಸ್ತಿ ಮಾಡಿರುವ ಗುಟ್ಟು ರಟ್ಟಾಗಿರುವುದರಿಂದ ಅವನ ಆಸ್ತಿ - ಪಾಸ್ತಿಯನ್ನೆಲ್ಲಾ ಮುಟ್ಟುಗೋಲು ಹಾಕಿಕೊಂಡಿದ್ದಾರೆ. ನಮ್ಮನೆ ಎದುರಿನ ಅವನ ಬಂಗಲೆಗೂ ಬೀಗ ಜಡಿದಿದ್ದಾರೆ. ಹಾಂ! ಮನೆಯದುರಿನ ಬಂಗಲೆಗೆ ಮಾತ್ರವಲ್ಲ, ನನ್ನ ಹೆಂಡತಿಯ ಬಾಯಿಗೂ ಇದೀಗ ಬೀಗ ಬಿದ್ದಿದೆ.

-ಕೇವೀಟಿ ಮೇಗೂರು