ಅಶ್ವಿನಿ ವೈದ್ಯ

ಮದುವೆಯಾಗಿ ನಾಲ್ಕೈದು ವರ್ಷಗಳಾದರೂ ಮಕ್ಕಳಾಗಲಿಲ್ಲ ಎಂದಾದರೆ ಅಂಥ ದಂಪತಿ ತಕ್ಷಣಕ್ಕೆ ನೆನಪಿಸಿಕೊಳ್ಳುವುದು ಡಾ.ಬಿ.ಟಿ. ರುದ್ರೇಶ್ ಅವರನ್ನು. ಬೆಂಗಳೂರಿನ ಡಿವಿಜಿ ರಸ್ತೆಯಲ್ಲಿರುವ ಅಶ್ವಿನಿ ಹೋಮಿಯೋ ಕ್ಲಿನಿಕ್ನಲ್ಲಿ ಅವರ ಭೇಟಿಗಾಗಿ ನಿತ್ಯ ಏನಿಲ್ಲವೆಂದರೂ 150-200 ಜನ ಕಾದಿರುತ್ತಾರೆ. ಅವರೆಲ್ಲ ಎರಡು ತಿಂಗಳು ಮೊದಲೇ ಭೇಟಿಗೆ ಸಮಯ ನಿಗದಿಪಡಿಸಿಕೊಂಡವರು. ಹೆಚ್ಚಿನವರ ತೊಂದರೆ ಸಂತಾನದ್ದೇ.
32 ವರ್ಷಗಳಿಂದ ಪ್ರಾಕ್ಟೀಸ್ ನಡೆಸುತ್ತಿರುವ ರುದ್ರೇಶ್ ಸಂತಾನ ಸಮಸ್ಯೆ ಇರುವವರಿಗಷ್ಟೇ ಚಿಕಿತ್ಸೆ ನೀಡುವುದಿಲ್ಲ. ಶೀತದಿಂದ ಕ್ಯಾನ್ಸರ್ವರೆಗೆ ಎಲ್ಲ ಕಾಯಿಲೆಗಳಿಗೂ ಅವರಲ್ಲಿ ಮದ್ದುಂಟು. 15 ಲಕ್ಷಕ್ಕೂ ಹೆಚ್ಚು ಜನರಿಗೆ ಚಿಕಿತ್ಸೆ ನೀಡಿದ್ದಾರೆ. ಆದರೆ ಖ್ಯಾತರಾದದ್ದು ಮಾತ್ರ 'ಸಂತಾನ ಶಕ್ತಿ ನೀಡುವ ಡಾಕ್ಟರ್' ಎಂದೇ. ಈವರೆಗೆ ತಮ್ಮ ದಾಖಲೆಗಳ ಪ್ರಕಾರ 2,000 ಸ್ತ್ರೀಯರಿಗೆ ತಾಯ್ತನದ ಭಾಗ್ಯ ಸಿಕ್ಕಿದೆ. ಇದು ಚಿಕಿತ್ಸೆ ನಂತರ 'ನಾವು ಮಕ್ಕಳನ್ನು ಪಡೆದಿದ್ದೇವೆ' ಎಂದು ತಿಳಿಸಿದವರ ಸಂಖ್ಯೆ. ವಾಸ್ತವದಲ್ಲಿ ಚಿಕಿತ್ಸೆಯ 'ಫಲ' ಪಡೆದವರು ನಾಲ್ಕು ಸಾವಿರಕ್ಕೂ ಹೆಚ್ಚು ಜನ ಎನ್ನುತ್ತಾರೆ ರುದ್ರೇಶ್.
'ಬೇರೆ ಕಾಯಿಲೆಗಳಿಗೆ ಔಷಧ ಪಡೆದವರು ಇತರರ ಬಳಿ ಹೇಳಿಕೊಳ್ಳುವುದಿಲ್ಲ. ಸಂತಾನ ಎನ್ನುವುದು ಸಾಮಾಜಿಕ ಸ್ಥಾನಮಾನ, ಪ್ರತಿಷ್ಠೆ. ಮಕ್ಕಳನ್ನು ಹೆತ್ತರೇನೇ ಹೆಣ್ತನಕ್ಕೆ ಪರಿಪೂರ್ಣತೆ ಎನ್ನುವ ಭಾವನೆ ನಮ್ಮ ಸಮಾಜದಲ್ಲಿದೆ. ಆದ್ದರಿಂದಲೇ ಅದು ಎಲ್ಲರಿಗೂ ಗೊತ್ತಾಗುತ್ತದೆ. ಬಹುಶಃ ಈ ಕಾರಣದಿಂದಾಗಿಯೇ ರುದ್ರೇಶ್ ಎಂದರೆ ಬಂಜೆತನ ನಿವಾರಿಸುವ ಡಾಕ್ಟರ್ ಎಂದು ಖ್ಯಾತನಾಗಿರುವುದು' ಎಂದು ಅಭಿಪ್ರಾಯಪಡುತ್ತಾರೆ 'ಅಶ್ವಿನಿ' ವೈದ್ಯ.
ಅಶ್ವಿನಿ ಕ್ಲಿನಿಕ್ನ ದೂರವಾಣಿ: (080) 26797575.



ಸಮಾಜದ ಎಲ್ಲ ಸ್ತರದ, ಎಲ್ಲ ರೀತಿಯ ಕೆಲಸ ಮಾಡುವ ಮಂದಿ ನನ್ನಲ್ಲಿ ಬರುತ್ತಾರೆ. ವೈದ್ಯನಾಗಿ ನನಗೆ ಎಲ್ಲರೂ ಸಮಾನರು. ವೈದ್ಯ ತನ್ನ ವೃತ್ತಿಯಲ್ಲಿ ಯಶಸ್ಸು ಗಳಿಸಬೇಕಿದ್ದರೆ ಆತ ಸೂಕ್ಷ್ಮಪ್ರಜ್ಞೆ ಉಳ್ಳವನಾಗಿರಬೇಕು. ರೋಗಿಗಳ ಮನಗೆದ್ದು ರೋಗ ಪತ್ತೆ ಮಾಡುವ ಪತ್ತೇದಾರನಾಗಿರಬೇಕು.
- ಡಾ.ಬಿ.ಟಿ. ರುದ್ರೇಶ್