ವಿಶ್ವಾಸ

ಸೈನಿಕನೊಬ್ಬ ತನ್ನ ಮೇಲಧಿಕಾರಿಗೆ ಹೇಳಿದ- 'ನನ್ನ ಸ್ನೇಹಿತ ರಣರಂಗದಿಂದ ಇನ್ನೂ ಹಿಂತಿರುಗಿಲ್ಲ, ಸರ್. ಹೊರಗೆ ಹೋಗಿ ಅವನನ್ನು ಹುಡುಕಲು ಅನುಮತಿ ನೀಡಬೇಕಾಗಿ ವಿನಂತಿ.'
ಮೇಲಧಿಕಾರಿ ಹೇಳಿದ- 'ನಿನ್ನ ವಿನಂತಿಯನ್ನು ತಿರಸ್ಕರಿಸಲಾಗಿದೆ. ಬಹುಶಃ ಈ ಹೊತ್ತಿಗಾಗಲೇ ಮೃತಪಟ್ಟಿರುವವನೊಬ್ಬನಿಗಾಗಿ ನೀನು ನಿನ್ನ ಪ್ರಾಣವನ್ನು ಅಪಾಯಕ್ಕೊಡ್ಡುವುದು ನನಗಿಷ್ಟವಿಲ್ಲ.'
ಆದರೂ ಆ ಯೋಧನಿಂದ ತಡೆಯಲಿಕ್ಕಾಗಲಿಲ್ಲ. ಹೊರಟೇಬಿಟ್ಟ. ಸುಮಾರು ಒಂದು ಗಂಟೆಯ ಬಳಿಕ ಸ್ವತಃ ಮಾರಣಾಂತಿಕವಾಗಿ ಗಾಯಗೊಂಡು, ತನ್ನ ಮೃತ ಸ್ನೇಹಿತನ ದೇಹವನ್ನು ಹೊತ್ತು ತಂದ.
ಅವನನ್ನು ನೋಡಿ ಅಧಿಕಾರಿ ಕೆಂಡಾಮಂಡಲವಾದ. 'ಅವನು ಸತ್ತಿರಬಹುದೆಂದು ನಾನು ಹೇಳಿದ್ದೆ. ನಿನ್ನ ಮೂರ್ಖತನದಿಂದ ನಾನೀಗ ಇಬ್ಬರನ್ನು ಕಳೆದುಕೊಳ್ಳುವಂತಾಯಿತು. ಹೇಳು, ಈ ಮೃತ ಶರೀರವನ್ನು ಹೊತ್ತು ತರಲು ನೀನು ಅಲ್ಲಿಗೆ ಹೋಗುವ ಅಗತ್ಯವಿತ್ತೇ?'
ಕೊನೆಯುಸಿರೆಳೆಯುತ್ತಿದ್ದ ಆ ಯೋಧ ಉತ್ತರಿಸಿದ- 'ಓಹ್! ಹೌದು, ಸರ್. ನಾನಾತನನ್ನು ಕಂಡಾಗ ಅವನಿನ್ನೂ ಜೀವಂತವಾಗಿದ್ದ ಮತ್ತು ಅವನು ಹೇಳಿದ 'ಜಾಕ್, ನೀನು ಖಂಡಿತವಾಗಿಯೂ ಬರುವೆಯೆಂದು ನನಗೆ ಗೊತ್ತಿತ್ತು...'

-  ನಂದಿನಿ ಡಿ. ಕಾಮತ್