ಕವನ ಜೀವನ

ಭಾವನೆಗಳ ಒರೆತದ ರತಿ ಬೆರಳುಗಳ ತುದಿಯಿಂದ
ಅಕ್ಷರಗಳಾಗಿ, ಪದಗಳಾಗಿ, ವಾಕ್ಯಗಳಾಗಿ
ವಯ್ಯಾರವಾಗಿ ಒರಗಿದಾಗ ಜನನ ಕವನ
ಕವನ ಕಣ್ತುಂಬಿದರೂ ಕಿವಿಗಳನ್ನು ಓಲೈಸಿದರೂ
ನಿಧಿನಿಕ್ಷೇಪಗಳು ನಡೆದಾಡಿದ ಸಂತೋಷ
ನವನಾಡಿಗಳನ್ನು ಬಿಗಿದು ಕಟ್ಟಿದ ಬೆನ್ನುಹುರಿಯ ತಂತಿಯನ್ನು
ನಯವಾಗಿ ಮೀಟಿದ ಅನುಭವ
ಕಲ್ಪನೆಯ ಕೂಸು ಸೃಷ್ಟಿಸುವ ಇಂದ್ರಜಾಲದಲ್ಲಿ
ನೋವು ಒಮ್ಮೆ ಕೆನೆದರೂ-
ಒಮ್ಮೆ ಕಾಲು ಮುರಿದ ಕುದುರೆಯಾಗುತ್ತೆ
ಆನಂದವು ಮರುಭೂಮಿಯಲ್ಲಿ ಓಯಸಿಸ್ ಆದರೆ
ದುಃಖವು ಹನಿಸಿದ ಹನಿಗಳು ನದಿಗಳಾಗಿ ಹರಿಯುತ್ತವೆ
ಮನೋಸಮುದ್ರ ಮಥನದಲ್ಲಿ ವಿಷಾದ ಗರಳವಾದರೂ
ವಿನೋದ ಮಧುಪಾನದ ಪಾತ್ರೆಯಾಗುತ್ತದೆ
ವಿಯೋಗ ವಿರಹವು ಗ್ರೀಷ್ಮತಾಪವಾದಾಗ
ಸರಸ ಸಮಾಗಮವು ಚೈತ್ರದ ಹೂಬನಗಳಾಗುತ್ತವೆ
ಹೀಗೆ ಕಲ್ಪನೆಯ ಕೂಸಿನ ಸೃಷ್ಟಿಯು ಚಕ್ರತೀರ್ಥವಾಗುತ್ತದೆ
ಆ ಸುಳಿಯಲ್ಲಿ ಕವನಗಳು ಏಕವಾಗಿ ಅನೇಕವಾಗುತ್ತವೆ
ಅನೇಕವಾಗಿ ಮತ್ತೆ ಏಕವಾಗುತ್ತವೆ
ಹಾಗೆ ಸುತ್ತುತ್ತಾ ಕವನ ಜೀವನವಾಗುತ್ತೆ
ಕಡೆಗೆ ಜೀವನವೇ ಕವನವಾಗುತ್ತದೆ.


-ರೋಹಿಣಿ ಸತ್ಯ