ನ್ಯಾನೋ ಕಥೆಗಳು

ಹುಡುಗಿಯ ಅಣ್ಣನ ದೆಸೆಯಿಂದ, ಹಗಲಿನಲ್ಲಿ ಅವಳ ಮನೆಯ ಮುಂದೆ ಅಡ್ಡಾಡಲು ಸಹ ಹಿಂಜರಿಯುವ ಹುಡುಗ... ನಡುರಾತ್ರಿ ಯಾವ ಎಗ್ಗಿಲ್ಲದೆಯೇ ಅವಳ ಕನಸಿಗೆ ನುಸುಳಿ ಬರುತ್ತಾನೆ!
===
ಮನ ಮೆಚ್ಚಿದವಳನ್ನೇ ಮನಸಾರೆ ಪ್ರೀತಿಸಿ ಮದುವೆಯಾದ... 'ಹೆಂಡತಿ ಪ್ರೇಯಸಿಯಲ್ಲ' ಎಂಬ ಸತ್ಯ ಅವನಿಗೆ ಬಹಳ ಬೇಗನೆ ಅರ್ಥವಾಯ್ತು!
===
ವಿರಹಿಯೊಬ್ಬನ ಸಮಾಧಿಯ ಮೇಲೆ ಹೀಗೆ ಬರೆದಿತ್ತು... 'ಅವಳಿಲ್ಲದೆಯೂ ಬದುಕಿದ್ದಾನೆ!'
===
ಬಡವನ ಗುಡಿಸಲಿನಲ್ಲಿ ಬೆಳದಿಂಗಳಿದೆ... ಮುರುಕು ಸೂರಿನಲ್ಲಿ ಚಂದಿರ ಇಣುಕುತ್ತಿದ್ದಾನೆ !
===
ಹೂವೊಂದು ದುಂಬಿಯ ಧ್ಯಾನಕ್ಕೆ ಕೂತು, ಅರೆ ಜೀವವಾಗಿದೆ... ದುಂಬಿಯನ್ನು, ಮತ್ತೊಂದು ಮಲ್ಲಿಗೆಯ ತೋಟ ಆಹ್ವಾನಿಸುತ್ತಿದೆ... !!
===
ರಾತ್ರಿ ಬಿದ್ದ ಕನಸುಗಳನ್ನುರಿಸಲು ಮುಂಜಾನೆಯೇ ಅವಳ ಮನೆಯಂಗಳಕ್ಕೆ ಓಡಿದೆ... ಆಗಷ್ಟೇ ಅವಳು ಅಂಗಳದ ಕಸ ಗುಡಿಸಿದ್ದಳು !

- ನವೀನ್ ಮಧುಗಿರಿ