ಹುಡುಗಿಯರಿಗೆ ಏನಿಷ್ಟ ನಿಂಗೊತ್ತಾ?

ಸಹನಾ...
ಮುದ್ದಾದ ನಿನ್ನ ಹೆಸರು ನನಗಷ್ಟೇ ಅಲ್ಲ ಇಡೀ ಕಾಲೇಜಿಗೇ ಒಂದು ಬೆರಗು. ಕಾರಣ ಇಷ್ಟೇ; ಹೆಸರಿಗೆ ತಕ್ಕ ಹಾಗೆ ನೀನು ಸಹನಶೀಲೆ. ಸೌಮ್ಯತೆ ಅನ್ನುವುದು ನಿನ್ನ ಜಾಯಮಾನದಲ್ಲಿ ಭಗವಂತ ಅನ್ನೋನು ತುಂಬಿಟ್ಟ ಗುಣವಾ ಅಥವಾ ಅದು ನೀನು ರೂಢಿಸಿಕೊಂಡ ಗುಣವಾ ? ನನಗಿಂದಿಗೂ ಆಶ್ಚರ್ಯ. ನಮ್ಮಿಬ್ಬರ ಮೇಲೆ ಇಡೀ ಕಾಲೇಜಿನ ದೃಷ್ಟಿ ಹರಿಯುವುದು ಎಷ್ಟು ಸತ್ಯವೋ ಅಷ್ಟೇ ಸತ್ಯ ನಾವಿಬ್ಬರೂ ಒಬ್ಬರಿಗೊಬ್ಬರು ಬಿಟ್ಟಿರಲಾರದ ಗಾಢ ಪ್ರೀತಿಯ ನಂಟಿನ ವಾರಸುದಾರರಾಗಿರುವುದು. ಯಾರಿಗೆ ಗೊತ್ತಿತ್ತು ಕಣೇ, ನಿನ್ನಂಥ ಸಭ್ಯ, ಸುಶೀಲ, ವಿನಮ್ರ ಮನಸಿನ ಹುಡುಗಿ ನನ್ನ ಜೊತೆ ಹೆಜ್ಜೆ ಜೋಡಿಸುತ್ತಾಳೆಂದು? ಇಡೀ ಕ್ಲಾಸೇ ನನ್ನ ಮೇಲೆ ಬೆರಗುಗಣ್ಣಿನಿಂದ ನಖಶಿಖಾಂತ ದಿಟ್ಟಿಸುತ್ತಿದ್ದುದು ಯಾವುದಕ್ಕೆ ಗೊತ್ತಾ? ಅಬ್ಬೇಪಾರಿಯಾದ ನಾನು ನಿನ್ನನ್ನು ಒಲಿಸಿಕೊಂಡ ರೀತಿಗೆ, ನನ್ನನ್ನು ನೀನು ಪ್ರೀತಿಸಲು ಪ್ರಾರಂಭಿಸಿದ್ದಕ್ಕೆ. ನಿಜ ಹೇಳಲಾ ? ನನಗೂ ಅದಿನ್ನೂ ಬಗೆಹರಿಯಲಾರದ ಯಕ್ಷಪ್ರಶ್ನೆಯಂತೆ ಕಾಡುತ್ತಿದೆ.
ನೀನು ಕಾಲೇಜಿಗೆ ಅಡ್ಮಿಶನ್ ಆದ ದಿನದಿಂದಲೂ ನಿನ್ನ ಜೊತೆ ಇರುವ ಗೆಳತಿಯರಿಗೆಲ್ಲ ನೀನೊಂದು ಒಗಟಿನಂತೆ ಕಂಡಿದ್ದೆಯಂತೆ. ಯಾರೊಡನೆಯೂ ಮಾತನಾಡದ, ಯಾರೊಂದಿಗೂ ಹೆಚ್ಚು ಬೆರೆಯದ, ಸದಾ ಪುಸ್ತಕಗಳಲ್ಲಿಯೇ ಮುಳುಗೇಳುವ ನಿನ್ನನ್ನು ಅವರೆಲ್ಲ ಪುಸ್ತಕದ ಮಲ್ಲಿ ಎಂಬ ಅಡ್ಡ ಹೆಸರಿನಿಂದ ಬೇರೆ ಕರೆಯುತ್ತಿದ್ದರಂತೆ. ಪ್ರೀತಿ ಪ್ರೇಮದ ಗೊಡವೆಗೆ ತಲೆ ಕೊಡದೆ ನಿನ್ನಷ್ಟಕ್ಕೆ ನೀನು ಇರುತ್ತಿದ್ದುದು ಹುಡುಗರಿಗೂ ಕೂಡ ಕಬ್ಬಿಣದ ಕಡಲೆಯಂತೆ ಕಂಡದ್ದು ಸತ್ಯ ಇರಬಹುದು. ಒಬ್ಬರಿಗೊಬ್ಬರು ಪೈಪೋಟಿಯ ಮೇಲೆ ನಿನ್ನ ಸ್ನೇಹ ಹಸ್ತಕ್ಕಾಗಿ ಕೈ ಚಾಚುತ್ತಿದ್ದುದನ್ನು ಇಂದಿಗೂ ನಿನ್ನ ಗೆಳತಿಯರು ನನ್ನ ಮುಂದೆ ಕಥೆ ಮಾಡಿ ಹೇಳುತ್ತಾರೆ. ಆದರೆ ಹೀಗೆಲ್ಲ ಇದ್ದ ನೀನು ಅಬ್ಬೇಪಾರಿಯಂತೆ ಅಂಡಲೆಯುವ ನನ್ನನ್ನು ಇಷ್ಟಪಟ್ಟಿದ್ದು ಎಲ್ಲರಿಗೂ ಬಿಡಿಸಲಾರದ ಒಗಟಿನಂತೆ ಕಗ್ಗಂಟಾಗಿದೆ. ನನ್ನ ಗೆಳೆಯರೆಲ್ಲ 'ಲೋ ಮಗಾ ಅವಳನ್ನ ಹೇಗೆ ಕಣೋ ಪಟಾಯಿಸಿದ್ದು ಅಂತ ಕೇಳಿ ಪ್ರಾಣ ತಿಂತಾರೆ. ಅವರಿಗೆ ಹೇಗೆ ಹೇಳಲಿ ? ನಾನನುಭವಿಸುತ್ತಿದ್ದ ದುಃಖಗಳೇ ನಿನ್ನನ್ನು ನನ್ನ ಹತ್ತಿರಾಗಿಸಿದ್ದು ಎಂದು?'
ಗೆಳೆಯರೆಲ್ಲ ಹುಡುಗಿಯರನ್ನು ಪಟಾಯಿಸುವುದು ಅಂದರೆ ಚಂದನೆಯ ಡ್ರೆಸ್ಸು ಮಾಡಿಕೊಳ್ಳುವುದು, ಹೊಸ ಬೈಕು ಕೊಳ್ಳುವುದು, ಬಾಡಿ ಬಿಲ್ಡ್ ಮಾಡುವುದು, ಜೇಬಿನಲ್ಲಿ ಸಾವಿರಗಟ್ಟಲೆ ನೋಟು ಇಟ್ಟುಕೊಳ್ಳುವುದು ಅಂತ ತಿಳ್ಕೊಂಡಿದಾರೆ. ಒಂದು ಒಳ್ಳೆಯ ಮನಸ್ಸು, ಇನ್ನೊಬ್ಬರ ಕಷ್ಟಕ್ಕೆ ಆಗುವ ಔದಾರ್ಯ, ಕೊನೆವರೆಗೂ ನಿನ್ನ ಜೊತೆ ಇರ್ತೀನಿ ಅನ್ನುವ ಕಂಫರ್ಟ್... ಇಷ್ಟಿದ್ದರೆ ಸಾಕು ಅಂತ ಅವರಿಗೆ ಹೇಗೆ ಗೊತ್ತಾಗಬೇಕು. ಚೆಂದನೆಯ ಡ್ರೆಸ್ಸು ಹಾಕುವವರನ್ನೇ ಹುಡುಗಿಯರು ಇಷ್ಟಪಟ್ಟಿದ್ದರೆ ಬಟ್ಟೆ ಅಂಗಡಿ ಇಟ್ಟುಕೊಂಡಿರುವವರಷ್ಟೇ ಪ್ರೀತಿ ಮಾಡುತ್ತಿದ್ದರು. ದೇಹ ಸೌಂದರ್ಯ ಇಷ್ಟಪಟ್ಟಿದ್ದರೆ ಕುಸ್ತಿ ಪಟುಗಳಷ್ಟೇ ಮದುವೆ ಆಗಿರುತ್ತಿದ್ದರು. ಬೈಕು ಓಡಿಸುವವರನ್ನೇ ಹುಡುಗಿಯರು ಇಷ್ಟಪಡುತ್ತಾರೆ ಅನ್ನೋದಾದರೆ ಬೈಕ್ ರೇಸ್‌ನಲ್ಲಿ ಪಾಲ್ಗೊಳ್ಳುವವರೆಲ್ಲ ಅದೃಷ್ಟಶಾಲಿಗಳು ಅಂತ ಪ್ರೂವ್ ಆಗ್ತಿತ್ತು. ಇವೆಲ್ಲ ಮೀರಿದ ಗುಣಗಳನ್ನು ಹುಡುಗಿಯರು ಹುಡುಕ್ತಿರ್ತಾರೆ ಅನ್ನೋದಕ್ಕೆ ನನಗಿಂತ ಬೇರೆ ಸಾಕ್ಷಿ ಬೇಕಾ?
ನನ್ನ ಕೊನೆ ಉಸಿರು ಇರೋವರೆಗೂ ನೀನು ನನ್ನ ಮೇಲೆ ಇಟ್ಟಿರೋ ನಂಬಿಕೆಯ ಗೋಣು ಮುರಿಯೋಲ್ಲ. ನಿನ್ನಂಥ ಸಹನಶೀಲೆ, ದುಃಖಕ್ಕಾಗುವ ಅಪ್ಸರೆಯಂಥ ಹುಡುಗಿ ಸಿಕ್ಕಿದ್ದು ಜನ್ಮ ಜನ್ಮಾಂತರದ ಪುಣ್ಯ. ದಯವಿಟ್ಟು ಬರೀ ತಾಪತ್ರಯಗಳನ್ನೇ ಹಾಸು ಹೊದ್ದುಕೊಂಡಿರುವವನ ಕೈಬಿಡಬೇಡ. ನಿನ್ನ ಕಣ್ಣರೆಪ್ಪೆಯಲ್ಲಿ ಆಕಾಶವನ್ನೇ ಮಡಚಿಟ್ಟು ಬೆರಗು ಹುಟ್ಟಿಸುವ ಹಾಗೆ ಬದುಕ ನಡೆಸಿ ತೋರಿಸುತ್ತೇನೆ. ನಿನ್ನೊಬ್ಬಳ ಸಾಥ್ ಇದ್ದರೆ ಸಾಲು ಸಾಲು ಬರುವ ಕಷ್ಟಗಳದ್ಯಾವ ಲೆಕ್ಕ? ಯು ಆರ್ ಎ ಮೈ ಡ್ರೀಮ್ ಗರ್ಲ್.

ನಿನ್ನವನು
- ನಾಗೇಶ್ ಜೆ.ನಾಯಕ, ಉಡಿಕೇರಿ