ರಾಧೆಯ ಸ್ವಗತ

ಬೇಕಿರಲಿಲ್ಲ ನನಗೆ, ವಿರಹಿಣಿ ರಾಧೆಯ ಪಟ್ಟ
ಪ್ರೇಮದ ಔನ್ನತ್ವಕ್ಕೆ ರಾಧಾ - ಕೃಷ್ಣರ ಮಾದರಿ

ಹದಿನಾರು ಸಾವಿರ ಗೋಪಿಕೆಯರ ವಲ್ಲಭ ಪ್ರೀತಿಸಿದ್ದು ರಾಧೆಯೊಬ್ಬಳನ್ನೇ!
ಇದ್ದರು ರಾಧೆಯ ಗೆಜ್ಜೆಗೂ ದನಿಯಾಗುವವರು, ಕಣ್ಣೋಟಕ್ಕೆ ಸೋತವರು,
ಏಕಾಂತಕ್ಕೆ ಸಂಗಾತಿಯಾಗಬಯಸಿದವರು ಎಷ್ಟೋ!
ಬೇಕಿರಲಿಲ್ಲ ರಾಧೆಗೆ ಆತ್ಮವಂಚನೆ, ಆಕೆ ಆರಾಧಿಸಿದ್ದು
ಒಬ್ಬನೇ ಒಬ್ಬ ಕೃಷ್ಣನನ್ನು

ಗಾಂಧರ್ವ ವಿವಾಹದ ಕೆಲವು ಮಧುರಕ್ಷಣ, ಬಾಲ್ಯದ ಒಡನಾಟವೇ
ನನ್ನ ಸಂಗಾತಿಗಳಾದವು,
ಬೆದರಿದೆಯಾ? ಕೃಷ್ಣ, ಗೀತೆಯ ಸಾರದ ಸಾಲುಗಳಲ್ಲಿ ರಾಧೆಯೂ
ಪಾಲು ಕೇಳುವಳು ಎಂದು?
ಅಳುಕಿದೆಯಾ, ಭಾಮೆ, ರುಕ್ಮಿಣಿಯರೊಡನೆ ಸಲ್ಲಾಪ
ನಿರಾಕರಿಸುವಳು ಎಂದು?
ಅಂಜಿದೆಯಾ, ಧರ್ಮರಕ್ಷಣೆಯಲ್ಲಿ ತನ್ನ ಭೂಮಿಕೆ ಸಲ್ಲಿಸುವಳು ಎಂದು?
ದೇವನಾದರೇನಂತೆ, ನಿನಗೂ ಬೇಕಿತ್ತು ಧರ್ಮರಕ್ಷಣೆಯಲ್ಲಿ
ನಿನಗೊಂದೇ ಗೌರವ, ಪಟ್ಟ!
ತುಳಿಯಲಾರಿರಿ ನೀವು ನಮ್ಮನ್ನು ಶತಶತಮಾನಗಳವರೆಗೆ
ಬಂಧಿಸಲಾರಿರಿ ನಮ್ಮ ಭಾವನೆಗಳನ್ನು ನಿಮ್ಮ ಸಮರ್ಥ ಮಾತುಗಳಲ್ಲಿ
ವೈದ್ಯೆ, ಪೈಲಟ್, ರಾಜಕಾರಣಿ, ಸಮಾಜಸುಧಾರಕಿ
ವೇದಾಂತಿ, ಸಾಹಿತಿ ಇವರೆಲ್ಲಾ ರಾಧೆಯ ಪ್ರತಿನಿಧಿಗಳೇ
ನೋಡಿ ನಮ್ಮತ್ತ ನಿಡುಸುಯ್ಯದಿರು
ದೇವನೆಂಬ ಪಟ್ಟಕ್ಕೆ ಅಪಚಾರವಾದೀತು!

ಉಷಾ ಶಶಿಧರ್, ನಿಟ್ಟೂರು, ಶಿವಮೊಗ್ಗ