ಮುಂದಾಲೋಚನೆ...

ಒಮ್ಮೆ ಇಲಿಯೊಂದಕ್ಕೆ ತಿನ್ನಲಿಕ್ಕಾಗಿ ಹಲವು ದಿನಗಳಿಂದ ಏನೂ ಸಹ ಸಿಗಲಿಲ್ಲ. ಅದು ಆಹಾರಕ್ಕಾಗಿ ಎಲ್ಲಾ ಕಡೆ ಹುಡುಕಾಡಿದರೂ ಯಾವುದೇ ಪ್ರಯೋಜನವಾಗಲಿಲ್ಲ. ಬಡಪಾಯಿ ಇಲಿಯು ಹಸಿವಿನಿಂದ ತತ್ತರಿಸಿತು. "ಪರಿಸ್ಥಿತಿಯು ಇದೇ ರೀತಿಯಲ್ಲಿ ಮುಂದುವರೆದಿದ್ದೇಯಾದರೆ, ತಾನು ಸಾಯುವುದಂತೂ ಖಂಡಿತ" ಎಂಬುದಾಗಿ ಮನದಲ್ಲೇ ಆಲೋಚಿಸಿತು.
ಮತ್ತೆ ಆಹಾರವನ್ನು ಹುಡುಕಲು ಹೊರಟ ಇದಕ್ಕೆ ಒಂದು ಮಣ್ಣಿನ ಗಡಿಗೆಯು ಕಾಣಿಸಿತು. ಅದಕ್ಕೆ ಒಂದು ಸಣ್ಣ ರಂಧ್ರವಿತ್ತು. ಈ ಗಡಿಗೆಯನ್ನು ಕಂಡ ಇಲಿಯು ಇದರ ಒಳಗೆ ಏನಾದರೂ ಆಹಾರ ಸಿಗಬಹುದೆಂದು ಭಾವಿಸಿ ಆ ರಂಧ್ರ ಮೂಲಕ ಒಳಕ್ಕೆ ಹೋಗಲು ಪ್ರಯತ್ನಿಸಿತು. ಕೆಲ ದಿನಗಳಿಂದ ಊಟವಿಲ್ಲದೆ ಬಳಲಿ ಬೆಂಡಾಗಿದ್ದ ಇಲಿಯು ರಂಧ್ರದ ಮೂಲಕ ಒಳಕ್ಕೆ ನುಸುಳುವಲ್ಲಿ ಯಶಸ್ವಿಯಾಯಿತು.
ಅದರಲ್ಲಿ ಅರ್ಧದಷ್ಟು ಆಹಾರ ಧಾನ್ಯಗಳು ಇದ್ದವು. ಹಸಿವಿನಿಂದ ಬಳಲಿದ್ದ ಇಲಿಯ ಸಂತೋಷಕ್ಕೆ ಪಾರವೇ ಇಲ್ಲವಾಯಿತು. ಅದು ಒಂದೇ ಸಮನೆ ಧಾನ್ಯಗಳನ್ನು ತಿನ್ನಲಾರಂಭಿಸಿತು. ಆದರೆ ಹೊಟ್ಟೆಯ ಗಾತ್ರವು ದೊಡ್ಡದಾಗಿ ಇನ್ನಷ್ಟು ತಿನ್ನಲು ಸಾಧ್ಯವಿಲ್ಲದಂತಾಯಿತು. ಹೊಟ್ಟೆ ತುಂಬಿಸಿಕೊಂಡ ಇಲಿಯು ಈಗ ಹೊರ ನಡೆಯಲು ನಿರ್ಧರಿಸಿತು. ಆದರೆ ಅದರ ಹೊಟ್ಟೆಯ ಗಾತ್ರವು ದೊಡ್ಡದ್ದಾಗಿದ್ದರಿಂದಾಗಿ ಆ ಸಣ್ಣ ರಂಧ್ರದ ಮೂಲಕ ಹೊರಬರಲು ಸಾಧ್ಯವಾಗದಾಯಿತು. ಎಷ್ಟೇ ಪ್ರಯತ್ನಿಸಿದರೂ ಫಲ ಸಿಗಲಿಲ್ಲ. ಕೆಲ ಸಮಯದ ನಂತರ ಬೇರೊಂದು ಇಲಿಯು ಇಲ್ಲಿಂದ ಹಾದು ಹೋಗುವಾಗ ಒಳಗಿದ್ದ ಇಲಿಯನ್ನು ಕುರಿತು "ಏನು ಸಮಾಚಾರ?" ಎಂದು ಕೇಳಿತು. ಆಗ ಒಳಗೆ ಸಿಕ್ಕಿ ಹಾಕಿಕೊಂಡಿದ್ದ ಇಲಿಯು ಇದುವರೆವಿಗೂ ನಡೆದಂತಹ ಎಲ್ಲಾ ಸಂಗತಿಗಳನ್ನು ವಿವರಿಸಿತು. ಇದನ್ನೆಲ್ಲಾ ಗಂಭೀರವಾಗಿ ಆಲಿಸಿದ ಇಲಿಯು "ನಿನ್ನ ಹೊಟ್ಟೆ ಸಣ್ಣದಾಗುವ ತನಕ ಏನನ್ನೂ ತಿನ್ನದೇ ಇಲ್ಲೇ ಇರು. ನಂತರ ಹೊರಬರಲು ಸಾಧ್ಯವಾಗುವುದು" ಎಂಬುದಾಗಿ ಸಲಹೆ ನೀಡಿತು. ಅಲ್ಲದೆ "ಮುಂದಾಲೋಚನೆಯಿಲ್ಲದೆ ಕೆಲಸ ಮಾಡುವ ಪ್ರತಿಯೊಬ್ಬರಿಗೂ ಕೂಡ ಇಂತಹ ತೊಂದರೆಗಳು ತಪ್ಪಿದ್ದಲ್ಲ" ಎಂದು ಎಚ್ಚರಿಕೆಯನ್ನೂ ನೀಡಿ ಅಲ್ಲಿಂದ ಹೊರಟು ಹೋಯಿತು.

- ಕೆ.ಎನ್. ಅಕ್ರಂಪಾಷ