ಹೂವಿನ ಹಾಡು (ಕಬ್ಬಿಗತೋಟ)

ಒಂದು ಮುದ್ದು ಮಲ್ಲಿಗೆ
ಎಲೆ ಮರೆಯಲಿ ಅರಳಿದೆ
ಅತುಳ ಶಾಂತಿ ಧವಳ ಕಾಂತಿ
ತನ್ನಷ್ಟಕ್ಕೆ ಸುಮ್ಮನಿದೆ

ನಿಲುವು ಮೋಹಕ
ಮೌನ ಮಾರ್ದವ
ಸಾವಿರ ಗದ್ದಲದಲ್ಲೂ
ಸದ್ದಿಲ್ಲದ ಸುಗಂಧ ಮಾಟ

ಯಾರ ಮುಡಿಯೇರುವ
ತವಕ ಲವ ಲೇಶವಿಲ್ಲ
ಹರನ ಕೊರಳಿಗೆ ಹಾರವಾಗುವ
ಗುರಿಯೂ ಇಲ್ಲ
ಅರಳುವುದಷ್ಟೇ ದಿವ್ಯ ಕಾಯಕ
ನಿಶ್ಶಬ್ದ ಸಂಗೀತದಲಿ...
ಲೋಕೋತ್ತರ ಚೆಲುವಿನಲ್ಲಿ
ಏಕಾಂಗಿಯಾದರೂ..
ಲೋಕ ದೂರವಿಲ್ಲ
ಲೋಕ ಸಖ್ಯವಿದೆ.
ನೆಲತಾಯಿಯ ಮಡಿಲು
ರವಿ ಕಿರಣದ ಜೀವ ನೇವರಿಕೆ
ತಂಗಾಳಿಯ ಸ್ಪರ್ಶ ಸಾಂಗತ್ಯ...
ಮಲ್ಲಿಗೆಗೆ ನೀರವ ನಗು,
ನೈರ್ಮಲ್ಯದ ಹೊಳಪು !
ಪ್ರತಿ ಕ್ಷಣ ಹೊಸ ಚೆಲುವು ಚೆಲ್ಲುವ
ನಿರ್ಮಲ ನಿಸರ್ಗದಂತೆ
ನಿರ್ಲಿಪ್ತ... ಶಾಂತ !
ಇದು ಲೋಕದೊಳಗಿನ ಏಕಾಂತ.

ಇರಬಹುದು ನೂರು ನೋವು
ಹೂವಿನ ಆಂತರ್ಯದಲ್ಲಿ
ನಮಗೆ ತಿಳಿಯುವುದಿಲ್ಲ
ಯಾಕೆಂದರೆ...
ಹೂವು ಅಳುವುದಿಲ್ಲ.

-ಭಾರತಿ ಕಾಸರಗೋಡು