ಶಾರ್ಕ್​ ಪ್ರತಿಕಾಯಗಳಲ್ಲಿನ ಪ್ರೋಟೀನ್​​​​ ನಲ್ಲಿ ಕೊರೊನಾಗೆ ತಡೆಯೊಡ್ಡುವ ಸಾಮರ್ಥ್ಯ!

ವಾಷಿಂಗ್ ಟನ್: ಕೊರೊನಾ ನಿಯಂತ್ರಣಕ್ಕೆ ಇಡೀ ಪ್ರಪಂಚವೇ ಟೊಂಕ ಕಟ್ಟಿ ನಿಂತಿದೆ. ಇದರ ಬೆನ್ನಲ್ಲೇ ಈಗಾಗಲೇ ಹಲವಾರು ದೇಶಗಳಲ್ಲಿ ಎರಡೂ ಲಸಿಕೆಗಳನ್ನು ನೀಡಲಾಗಿದೆ. ಆದರೂ ಕೊರೊನಾ ರೂಪಾಂತರ ಪಡೆದುಕೊಂಡು ಮನುಕುಲಕ್ಕೆ ಕಾಟ ಕೊಡುತ್ತಲೇ ಇದೆ. ಇದರ ಬೆನ್ನಲ್ಲೇ ಈಗ ಸಮುದ್ರ, ಸಾಗರಗಳಲ್ಲಿ ವಾಸ ಮಾಡುವ ಜೀವಿಗಳ ದೇಹದಲ್ಲಿರುವ ಪ್ರತಿಕಾಯಗಳು ಕೊರೊನಾ ತಡೆಯಲು ಸಹಕಾರಿಯಾಗಿವೆ ಎಂಬ ವಿಷಯ ಅಧ್ಯಯನವೊಂದರಿಂದ ಹೊರಬಿದ್ದಿದೆ.

ಶಾರ್ಕ್‌ಗಳ ದೇಹದಲ್ಲಿರುವ ಪ್ರತಿಕಾಯಗಳಲ್ಲಿರುವ ಪ್ರೋಟೀನ್ ಕೊರೊನಾ ಹಾಗೆ ಕೊರೊನಾ ರೂಪಾಂತರ ವೈರಸ್​ಗಳು ಮಾನವ ಜೀವಕೋಶಕ್ಕೆ ಸೋಂಕು ತಗುಲದಂತೆ ಸಹಾಯ ಮಾಡುತ್ತದೆ ಎಂದು ಅಧ್ಯಯನದಿಂದ ತಿಳಿದುಬಂದಿದೆ.

ಶಾರ್ಕ್​ಗಳಲ್ಲಿರುವ ಪ್ರತಿಕಾಯಗಳಲ್ಲಿರುವ ಪ್ರೋಟೀನ್ ಅನ್ನು ವಿಎನ್​ಎಆರ್ ಎಂದು ಕರೆಯಲಾಗುತ್ತದೆ. ಈ ಪ್ರೋಟೀನ್ ಗಾತ್ರದಲ್ಲಿ ಮಾನವ ಪ್ರತಿಕಾಯಗಳ ಹತ್ತನೇ ಒಂದು ಭಾಗದಷ್ಟಿದ್ದು, ಸೋಂಕು ತಡೆಯುವ ಸಾಮರ್ಥ್ಯ ಹೊಂದಿರುತ್ತವೆಯಂತೆ.

ವಿಸ್ಕಾನ್ಸಿನ್ – ಮ್ಯಾಡಿಸನ್ ವಿಶ್ವವಿದ್ಯಾನಿಲಯದ ಸಂಶೋಧಕರು ಶಾರ್ಕ್​ ಪ್ರೋಟೀನ್​ಗಳು WIV1-CoV ಎಂಬ ಕೋವಿಡ್​ ಸೋಂಕನ್ನು ನಿಷ್ಕ್ರಿಯಗೊಳಿಸಲು ಸಹಕಾರಿ ಎಂದು ಸಂಶೋಧಿಸಿದ್ದಾರೆ. ಈ WIV1-CoV ಕೋವಿಡ್ ಸೋಂಕು ಮಾನವ ಜೀವಕೋಶಗಳಿಗೆ ತಗಲುವ ಸೋಂಕಾಗಿದೆ.

ಮುಂದೊಂದು ದಿನ ಎಲ್ಲ ರೀತಿಯ ಕೋವಿಡ್ ರೂಪಾಂತರಗಳಿಗೂ ಈ ಔಷಧ ಬಳಸುವ ಸಾಧ್ಯತೆ ಇದೆ ಎಂದು ವಿಸ್ಕಾನ್ಸಿನ್-ಮ್ಯಾಡಿಸನ್ ವಿಶ್ವವಿದ್ಯಾನಿಲಯ ರೋಗಶಾಸ್ತ್ರದ ಪ್ರಾಧ್ಯಾಪಕ ಆ್ಯರನ್ ಲೆಬ್ಯೂ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.