ಸಿದ್ದರಾಮಯ್ಯ ಅರಮನೆ ಕಟ್ಟಿಲ್ಲ, ಸಣ್ಣದೊಂದು ಮನೆ ಕಟ್ಟಿದ್ದಾರೆ; ಅವರು ವೀಕ್ ಆಗಿಲ್ಲ, ರಾಜಕೀಯದಲ್ಲಿ ಟಗರು: ಜಮೀರ್ ಅಹ್ಮದ್ ಖಾನ್

ಬೆಂಗಳೂರು: ಸಿದ್ದರಾಮಯ್ಯ ಅವರು ಯಾವುದೇ ಕಾರಣಕ್ಕೂ ದುರ್ಬಲರಾಗಿಲ್ಲ, ಅವರು ರಾಜಕೀಯದಲ್ಲಿ "ಟಗರು" ಇದ್ದ ಹಾಗೆ ಗಟ್ಟಿಯಾಗಿದ್ದಾರೆ ಎಂದು ಜಮೀರ್ ಅಹ್ಮದ್ ಖಾನ್ ಹೇಳಿದ್ದಾರೆ.

ಮಾಧ್ಯಮಗಳೊಂದಿಗೆ ಮಾತನಾಡಿದ ಅವರು, ಸಿದ್ದರಾಮಯ್ಯ ನಮ್ಮ ನಾಯಕರು. ಅವರು ವೀಕ್ ಆಗೋಕೆ ಸಾಧ್ಯವಿಲ್ಲ, ಅವರು ಎಲ್ಲ ಜಾತಿ ಮತ್ತು ವರ್ಗದವರನ್ನು ಒಟ್ಟಾಗಿ ತೆಗೆದುಕೊಂಡು ಹೋಗುವ ನಿಜವಾದ ಅಹಿಂದ ನಾಯಕ. ಅವರು ವೀಕ್ ಆಗಲ್ಲ, ವೀಕ್ ಆಗೋಕು ನಾವು ಬಿಡಲ್ಲ. 2028 ಕ್ಕೂ ಸಿದ್ದರಾಮಯ್ಯ ನೇತೃತ್ವದಲ್ಲೇ ಚುನಾವಣೆ ನಡೆಯಲಿದೆ ಎಂದು ನಮ್ಮ ನಾಯಕ ಡಿಕೆ ಶಿವಕುಮಾರ್ ಹೇಳಿದ್ದಾರೆಂದು ಜಮೀರ್ ತಿಳಿಸಿದ್ದಾರೆ.

ಮನೆ ಗೃಹಪ್ರವೇಶದ ಸ್ಪಷ್ಟನೆ: ಮೈಸೂರಿನಲ್ಲಿ ಸಿದ್ದರಾಮಯ್ಯ ಅವರು ಕಟ್ಟಿಸಿರುವ ಹೊಸ ಮನೆ ಅರಮನೆಯಂತೆ ಇಲ್ಲ, ಅದೊಂದು ಸಾಮಾನ್ಯ ಹಾಗೂ ಸರಳವಾದ ಮನೆ ಎಂದೂ, ಇದು ಕೇವಲ ಕುಟುಂಬದವರಷ್ಟೇ ಸೇರಿ ಮಾಡಿಕೊಂಡ ಖಾಸಗಿ ಕಾರ್ಯಕ್ರಮವಾಗಿತ್ತು ಎಂದೂ ಜಮೀರ್ ಸ್ಪಷ್ಟಪಡಿಸಿದ್ದಾರೆ.

ಎರಡು ಬಾರಿ ಮುಖ್ಯಮಂತ್ರಿಗಳಾಗಿದ್ದರೂ ಅವರಿಗೆ ಸ್ವಂತ ಮನೆ ಇರಲಿಲ್ಲ. ಯಾವಾಗಲೋ ಒಂದು ಮನೆ ಕಟ್ಟಿದ್ದರಂತೆ, ಆದರೆ ಕಷ್ಟ ಎದುರಾದಾಗ ಅದನ್ನು ಮಾರಿದ್ದರು. ಈಗ ಕಟ್ಟಿರುವುದು ಸಣ್ಣ ಮನೆ ಎಂದು ಹೇಳಿದ್ದಾರೆ. ಅವರು ಗೃಹ ಪ್ರವೇಶಕ್ಕೆ ಯಾರನ್ನು ಕರೆದಿಲ್ಲ ಎಂದರು.

ನನ್ನ ಮತ್ತು ಸಿದ್ದರಾಮಯ್ಯ ನಡುವೆ ಯಾವುದೇ ಮುನಿಸಿಲ್ಲ ಎಂದು ಸ್ಪಷ್ಟಪಡಿಸಿದ ಜಮೀರ್, ಸಿದ್ದರಾಮಯ್ಯ ಅವರನ್ನು ನಿರ್ಲಕ್ಷ್ಯಿಸಲಾಗುತ್ತದೆ ಎಂಬುದು ಮಾಧ್ಯಮಗಳ ಸೃಷ್ಟಿ ಎಂದರು.