ಅಮಿತ್ ಶಾ ಅವರಿಂದ ಅಂತರ ಕಾಯ್ದುಕೊಂಡರೇ ಬಿಎಸ್ ಯಡಿಯೂರಪ್ಪ?

ಬೆಂಗಳೂರು: ವರುಣ ಕ್ಷೇತ್ರದಲ್ಲಿ ಪುತ್ರ ಬಿ.ವೈ. ವಿಜಯೇಂದ್ರಗೆ ಟಿಕೆಟ್ ನಿರಾಕರಿಸಿದ್ದಕ್ಕೆ  ಬೇಸರಗೊಂಡಿರುವ  ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್. ಯಡಿಯೂರಪ್ಪ, ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ಅಮಿತ್ ಶಾ ಜೊತೆಗೆ ಅಂತರ ಕಾಯ್ದುಕೊಳ್ಳಲು ಮುಂದಾಗಿದ್ದಾರೆಯೇ? ಅನ್ನೋ ಮಾತುಗಳು ರಾಜಕೀಯ ವಲಯದಲ್ಲಿ ಕೇಳಿಬರುತ್ತಿವೆ.ಬಿ.ಎಸ್. ಯಡಿಯೂರಪ್ಪ ನಿನ್ನೆ  ನಡೆದುಕೊಂಡಿರುವ ರೀತಿ ಈ ಮಾತಿಗೆ ಪುಷ್ಠಿ ನೀಡುವಂತಿದೆ.

ನಾಲ್ಕು ದಿನಗಳ ರಾಜ್ಯಪ್ರವಾಸಕ್ಕಾಗಿ ಅಮಿತ್ ಶಾ ಮೊನ್ನೆ ರಾತ್ರಿ ಬೆಂಗಳೂರಿಗೆ ಆಗಮಿಸಿದಾಗ ಯಡಿಯೂರಪ್ಪ , ಬೆಂಗಳೂರಿನಲ್ಲಿ ಇದ್ದರೂ  ಭೇಟಿಗೆ ತೆರಳಲಿಲ್ಲ. ತಡರಾತ್ರಿವರೆಗೂ  ಬಿಎಸ್ ವೈ ಆಪ್ತರೊಂದಿಗೆ ಸಭೆ ನಡೆಸಿದ್ದಾರೆ. ವರುಣ ಕ್ಷೇತ್ರದ ಟಿಕೆಟ್ ವಿಚಾರ ಪ್ರಸ್ತಾಪವಾಗಿ ಕಾರ್ಯಕರ್ತರ ಮುಂದುವರೆದ ಆಕ್ರೋಶ ಹಾಗೂ ನೋವನ್ನು ಹಂಚಿಕೊಂಡರು ಎನ್ನಲಾಗಿದೆ.

ನಿನ್ನೆ ಬೆಳಿಗ್ಗೆ ಚಾಲುಕ್ಯ ವೃತ್ತದಲ್ಲಿರುವ ಅಮಿತ್ ಶಾ ನಿವಾಸಕ್ಕೆ ಯಡಿಯೂರಪ್ಪ ಆಗಮಿಸಿದರಾದರೂ  ಕೇವಲ 5 ನಿಮಿಷದಲ್ಲೇ ಹೊರಬಂದು ಹಾಸನದತ್ತ ತೆರಳಿದ್ದಾರೆ.
ತನ್ನ ಪುತ್ರನಿಗೆ ಟಿಕೆಟ್  ಕೊಡಿಸಲು ಸಾಧ್ಯವಾಗಲಿಲ್ಲ ಎಂಬ ಮಾತು ಕೇಳಿ ಬಂದು ತಮ್ಮ ಘನತೆಗೂ ಧಕ್ಕೆಯಾಗಿದೆ ಎಂದು ಯಡಿಯೂರಪ್ಪ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ ಎಂದು ಮೂಲಗಳು ಹೇಳಿವೆ.

 ಬಿಎಸ್ ವೈ, ಅಮಿತ್ ಶಾ  ಭಿನ್ನ ನಿಲುವುಗಳ ಜೊತೆಗೆ ಮತ್ತಷ್ಟು ಕಾರಣವೂ ಇರಬಹುದು ಎಂದು  ಪಕ್ಷದ ವಲಯದಲ್ಲಿ ಚರ್ಚೆಯಾಗುತ್ತಿದೆ. ಆದರೆ, ಚುನಾವಣೆಯಲ್ಲಿ ಗೆಲ್ಲುವುದೊಂದೆ ಮುಖ್ಯವಾಗಿರುವ ಹಿನ್ನೆಲೆಯಲ್ಲಿ ಎಲ್ಲ ನಾಯಕರು ಮೇಲ್ನೋಟಕ್ಕೆ ಅಸಮಾಧಾನ ತೋರ್ಪಡಿಸದೇ ಚುನಾವಣಾ ಕಾರ್ಯದಲ್ಲಿ ತೊಡಗಿದ್ದಾರೆ ಎಂದು ಆ ಪಕ್ಷದ ನಾಯಕರೇ ಹೇಳಿದ್ದಾರೆ.