ರಜಿನಿಕಾಂತ್ ರಾಜಕೀಯಕ್ಕೆ ಬರದಿದ್ದರೆ ಒಳಿತು: ಟಿಎನ್‌ಸಿಸಿ ಮುಖ್ಯಸ್ಥ

ಚೆನ್ನೈ: ಸೂಪರ್ ಸ್ಟಾರ್ ರಜಿನಿಕಾಂತ್ ಅವರು ರಾಜಕೀಯಕ್ಕೆ ಬರದಿದ್ದರೆ ಉತ್ತಮ ಎಂದು ತಮಿಳುನಾಡಿನ ಕಾಂಗ್ರೆಸ್ ಮುಖ್ಯಸ್ಥ ಇ.ವಿ.ಕೆ.ಎಸ್ ಎಲಾಗಾಂವನ್ ಅಭಿಪ್ರಾಯಪಟ್ಟಿದ್ದಾರೆ.

ಬಿಜೆಪಿ ರಜಿನಿಕಾಂತ್ ಅವರನ್ನು ತಮ್ಮ ಪಕ್ಷಕ್ಕೆ ಸೇರ್ಪಡೆ ಮಾಡಿಕೊಳ್ಳಲು ಅನೇಕ ಕಸರತ್ತು ಮಾಡುತ್ತಿದೆ. ಆದರೆ, ಬಿಜೆಪಿ ಕಸರತ್ತಿಗೆ ಸೋಲದೆ, ರಜಿನಿಕಾಂತ್ ನಟನಾಗಿಯೇ ಉಳಿಯಬೇಕೆಂಬುದು ನನ್ನ ಅಭಿಪ್ರಾಯ ಎಂದು ಅವರು ತಿಳಿಸಿದ್ದಾರೆ.

ಇತ್ತೀಚೆಗಷ್ಟೇ ಕಾಂಗ್ರೆಸ್ ಪಕ್ಷವನ್ನು ತೊರೆದ ಜಿ.ಕೆ ವಾಸನ್ ಅವರು, ರಜಿನಿಕಾಂತ್ ಅವರನ್ನು ಬಿಜೆಪಿ ಪಕ್ಷಕ್ಕೆ ಸೇರಿಸಬೇಕೆಂದು ಪುಸಲಾಯಿಸುತ್ತಿದ್ದಾರೆ. ಆದರೆ ಇಂತಹವರ ಮಾತಿಗೆ ರಜಿನಿಕಾಂತ್ ಓಗೊಡಬಾರದು.

ರಜಿನಿಕಾಂತ್ ಅವರಿಗೆ ಎಲ್ಲಾ ಪಕ್ಷಗಳಿಂದ ಅಭಿಮಾನಿಗಳಿದ್ದಾರೆ. ಎಲ್ಲಾ ಪಕ್ಷದ ಕಾರ್ಯಕರ್ತರು ರಜಿನಿಕಾಂತ್ ಅವರನ್ನು ದೇವರೆಂದು ಪೂಜಿಸುತ್ತಾರೆ. ಇಂತಹವರು ರಾಜಕೀಯ ಪ್ರವೇಶಿಸಿದಾಗ, ಅಭಿಮಾನಿಗಳನ್ನು ಕಳೆದುಕೊಳ್ಳುವುದಲ್ಲದೇ, ಅಭಿಮಾನಿಗಳ ಭರವಸೆ ಮುರಿದಂತಾಗುತ್ತದೆ.

ಹಾಗಾಗಿ, ರಜಿನಿಕಾಂತ್ ಯಾವುದೇ ರಾಜಕೀಯಕ್ಕೆ ಸೇರ್ಪಡೆಗೊಳ್ಳದೇ, ನಟನಾಗಿ ಇದ್ದರೆ ಒಳಿತು. ಇದರಿಂದ ಅಭಿಮಾನಿಗಳಿಗೆ ನಿರಾಸೆ ಉಂಟಾಗುವುದಿಲ್ಲ ಎಂದು ಅವರು ಹೇಳಿದ್ದಾರೆ.