ಪತಿಗಿಂತ ಹೆಚ್ಚು ಸಂಪಾದನೆ: ಅಮೆರಿಕದಲ್ಲಿ ನೆಲೆಸಿರುವ ಮಹಿಳೆಯ ಜೀವನಾಂಶ ಕೋರಿಕೆ ತಿರಸ್ಕರಿಸಿದ ಹೈಕೋರ್ಟ್; ಪತಿಗೆ ಬಿಗ್ ರಿಲೀಫ್!

ಮುಂಬೈ: ಪತಿಗಿಂತ ತಾನೇ ಹೆಚ್ಚು ಆದಾಯ ಹೊಂದಿರುವ ಮಹಿಳೆಯೊಬ್ಬರಿಗೆ ಮಧ್ಯಂತರ ಜೀವನಾಂಶ ನೀಡಲು ಬಾಂಬೆ ಹೈಕೋರ್ಟ್ ನಿರಾಕರಿಸಿದೆ. ಕೃತಕ ಬುದ್ಧಿಮತ್ತೆಯ (AI) ಹೆಚ್ಚುತ್ತಿರುವ ಪ್ರಭಾವದಿಂದಾಗಿ ಪತಿಯ ಐಟಿ ಉದ್ಯೋಗವು ಅನಿಶ್ಚಿತತೆಗೆ ಒಳಗಾಗುವ ಸಾಧ್ಯತೆಯಿದ್ದು, ಅವರಿಗೆ ಆರ್ಥಿಕ ನೆರವು ನೀಡುವಂತೆ ಆದೇಶಿಸುವುದು ಸೂಕ್ತವಲ್ಲ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿತು.

ಅಮೆರಿಕದ ನ್ಯೂಜೆರ್ಸಿಯಲ್ಲಿ ವಾಸಿಸುವ ಈ ಮಹಿಳೆ ತಿಂಗಳಿಗೆ ₹8 ಲಕ್ಷ ($8,700) ಆದಾಯ ಹೊಂದಿದ್ದು, ಇದು ಅವರ ಪತಿಯ ವೇತನಕ್ಕಿಂತ ಹೆಚ್ಚಾಗಿದೆ.

ವಿದೇಶದಲ್ಲಿನ ಜೀವನ ವೆಚ್ಚವು ಹೆಚ್ಚಾಗಿರುವುದು ಮಾತ್ರವೇ ಮಧ್ಯಂತರ ಜೀವನಾಂಶವನ್ನು ಕೋರಲು ಆಧಾರವಾಗಲಾರದು ಎಂದು ನ್ಯಾಯಾಲಯವು ಅಭಿಪ್ರಾಯಪಟ್ಟಿದೆ.

ನ್ಯಾಯಮೂರ್ತಿ ಭಾರತಿ ಡಂಗ್ರೆ ಮತ್ತು ನ್ಯಾಯಮೂರ್ತಿ ಮಂಜೂಷಾ ದೇಶಪಾಂಡೆ ಅವರಿದ್ದ ವಿಭಾಗೀಯ ಪೀಠವು, ಮಾಸಿಕ 1 ಲಕ್ಷ ರೂಪಾಯಿ ಮಧ್ಯಂತರ ಜೀವನಾಂಶ ಕೋರಿ ಮಹಿಳೆ ಸಲ್ಲಿಸಿದ್ದ ಅರ್ಜಿಯನ್ನು ವಜಾಗೊಳಿಸಿತು.

ಅರ್ಜಿದಾರರು 2011 ರಿಂದ ಅಮೆರಿಕದಲ್ಲಿ ವಾಸಿಸುತ್ತಿದ್ದಾರೆ ಮತ್ತು ನವದೆಹಲಿ ಮೂಲದ 'ಮಾರ್ಕ್ ಇನ್ಫೋಟೆಕ್' ಕಂಪನಿಯಲ್ಲಿ ಉದ್ಯೋಗಿಯಾಗಿದ್ದಾರೆ. ಅವರ ಪತಿಯೂ ಕೂಡ ಐಟಿ ಕ್ಷೇತ್ರದಲ್ಲಿಯೇ ಕೆಲಸ ಮಾಡುತ್ತಿದ್ದಾರೆ.

ಐಟಿ ಉದ್ಯಮದಲ್ಲಿ ಹೆಚ್ಚುತ್ತಿರುವ ಸ್ಪರ್ಧೆ ಮತ್ತು ಕೃತಕ ಬುದ್ಧಿಮತ್ತೆ (AI) ಹೆಚ್ಚುತ್ತಿರುವ ಬಳಕೆಯು ಪತಿಯ ಕೆಲಸಕ್ಕೆ ಅಪಾಯವನ್ನುಂಟುಮಾಡಬಹುದು ಎಂದು ನ್ಯಾಯಾಲಯ ಗಮನಿಸಿದೆ.

ಇದಕ್ಕೂ ಮೊದಲು, ಕೌಟುಂಬಿಕ ನ್ಯಾಯಾಲಯವು ಮಧ್ಯಂತರ ಜೀವನಾಂಶ ಕೋರಿದ್ದ ಆಕೆಯ ಅರ್ಜಿಯನ್ನು ತಿರಸ್ಕರಿಸಿತ್ತು. ಆದರೆ, ಪತಿಗೆ ಮೊಕದ್ದಮೆ ವೆಚ್ಚವಾಗಿ ₹25,000 ಗಳನ್ನು ಪಾವತಿಸಲು ನಿರ್ದೇಶನ ನೀಡಿತ್ತು.

ಕೌಟುಂಬಿಕ ನ್ಯಾಯಾಲಯದ ಆದೇಶವನ್ನು ಪ್ರಶ್ನಿಸಿ ಮಹಿಳೆ ಹೈಕೋರ್ಟ್ ಮೆಟ್ಟಿಲೇರಿದ್ದರು. ಹಿರಿಯ ಮಗು ತಂದೆಯ ವಶದಲ್ಲಿ ಉಳಿದಿದ್ದರೆ, ಕಿರಿಯ ಮಗುವನ್ನು ತಾಯಿಯ ವಶಕ್ಕೆ ನೀಡಲಾಗಿದೆ.