'ಮಿಸ್ಟರ್ 10 ಪರ್ಸೆಂಟ್': ಶೇ 3-4ರಷ್ಟಿರುವ ಹಿಂದೂಗಳನ್ನು ಸಹಿಸಿಕೊಳ್ಳುತ್ತಿದ್ದೇವೆ ಎಂದ ಪಾಕ್ ಅಧ್ಯಕ್ಷನಿಗೆ ಜಾವೇದ್ ಅಖ್ತರ್ ತಿರುಗೇಟು!

ನವದೆಹಲಿ: ಪಾಕಿಸ್ತಾನದಲ್ಲಿನ ಹಿಂದೂ ಅಲ್ಪಸಂಖ್ಯಾತರ ಕುರಿತು ಪಾಕ್ ಅಧ್ಯಕ್ಷ ಆಸಿಫ್ ಅಲಿ ಜರ್ದಾರಿ ಮಾಡಿರುವ ಟೀಕೆಗಳನ್ನು ಬರಹಗಾರ ಜಾವೇದ್ ಅಖ್ತರ್ ತೀವ್ರವಾಗಿ ಟೀಕಿಸಿದ್ದಾರೆ. ಪಾಕಿಸ್ತಾನದ ಸ್ವಾತಂತ್ರ್ಯ ದಿನಾಚರಣೆಯ ಕಾರ್ಯಕ್ರಮವೊಂದರ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಕಾಣಿಸಿಕೊಂಡ ನಂತರ ಈ ಚರ್ಚೆ ಆರಂಭವಾಗಿದೆ.

ಆ ವಿಡಿಯೋದಲ್ಲಿ, ತಮ್ಮ ದೇಶ ಮತ್ತು ಅಲ್ಲಿನ ಮುಸ್ಲಿಂ ಬಹುಸಂಖ್ಯಾತರು, ದೇಶದ ಜನಸಂಖ್ಯೆಯ ಶೇ 3-4 ರಷ್ಟಿರುವ ಹಿಂದೂ ಜನಸಂಖ್ಯೆಯನ್ನು 'ಸಹಿಸಿಕೊಳ್ಳುತ್ತಿದ್ದಾರೆ' ಎಂದು ಜರ್ದಾರಿ ಆರೋಪಿಸಿದ್ದಾರೆ.

'ಭಾರತೀಯರ ದೃಷ್ಟಿಕೋನ ಭಿನ್ನವಾಗಿದೆ. ಅವರು ತಮ್ಮದೇ ಆದ ಕಾರ್ಯಸೂಚಿಯನ್ನು (ಅಜೆಂಡಾ) ಮನಸ್ಸಿನಲ್ಲಿಟ್ಟುಕೊಂಡಿದ್ದಾರೆ. ಅವರು 'ಅಖಂಡ ಭಾರತ'ದ ಪರಿಕಲ್ಪನೆಯನ್ನು ನಂಬುತ್ತಾರೆ. ಆದರೆ, ಈ ನಡುವೆ ಇರುವ ಅನೇಕ ವಿಷಯಗಳನ್ನು ಅವರು ಮರೆತಿದ್ದಾರೆ' ವಿಡಿಯೋದಲ್ಲಿ ಜರ್ದಾರಿ ಹೇಳಿದ್ದಾರೆ.

'ನಾವು ಮುಸ್ಲಿಮರು, ಅವರ ರೀತಿಯ ಹಾಗಿಲ್ಲ. ಆದರೆ, ಪಾಕಿಸ್ತಾನದಲ್ಲಿ ಶೇ 3-4 ರಷ್ಟು ಇರುವ ಹಿಂದೂ ಜನಸಂಖ್ಯೆಯನ್ನು ಸಹಿಸಿಕೊಳ್ಳುವ ಮನಸ್ಥಿತಿಯನ್ನು ನಾವು ಮುಸ್ಲಿಮರು ಹೊಂದಿದ್ದೇವೆ. ಅವರು ಬೇರೆಲ್ಲೆಲ್ಲಿದ್ದರೋ ಅಲ್ಲಿನಷ್ಟೇ ಸ್ವಾತಂತ್ರ್ಯ ಮತ್ತು ಉತ್ತಮ ಸ್ಥಿತಿಯನ್ನು ಇಲ್ಲಿಯೂ ಹೊಂದಿದ್ದಾರೆ. ಅವರೊಂದಿಗೆ (ಭಾರತದೊಂದಿಗೆ) ಇರುವುದಕ್ಕಿಂತ ನಮ್ಮೊಂದಿಗೆ ಇರುವುದನ್ನೇ ಅವರು ಬಯಸುತ್ತಾರೆ' ಎಂದು ಪಾಕಿಸ್ತಾನಿ ನಾಯಕ ಹೇಳಿದ್ದಾರೆ.

ಈ ಭಾಷಣಕ್ಕೆ ಪ್ರತಿಕ್ರಿಯಿಸಿದ ಅಖ್ತರ್, ಜರ್ದಾರಿ ಅವರನ್ನು 'ಮಿಸ್ಟರ್ 10 ಪರ್ಸೆಂಟ್' (Mr 10 per cent) ಎಂದು 'ಎಕ್ಸ್' (X) ನಲ್ಲಿನ ಪೋಸ್ಟ್ ಒಂದರಲ್ಲಿ ಲೇವಡಿ ಮಾಡಿದ್ದಾರೆ; ಸರ್ಕಾರಿ ಯೋಜನೆಗಳಿಂದ ಅವರು ಹಣದ ಪಾಲನ್ನು ಪಡೆಯುತ್ತಿದ್ದರು ಎಂಬ ಪಾಕಿಸ್ತಾನದಲ್ಲಿನ ಆರೋಪಗಳನ್ನು ಇದು ಸೂಚಿಸುತ್ತದೆ.

'ಬೆನಜೀರ್ ಭುಟ್ಟೋ ಅವರೊಂದಿಗಿನ ವಿವಾಹದ ನಂತರ ಬೆಳಕಿಗೆ ಬಂದ ಪಾಕಿಸ್ತಾನದ ಜರ್ದಾರಿ ಅವರು, ತಮ್ಮ ದೇಶದಲ್ಲಿರುವ ಶೇ 3-4 ರಷ್ಟು ಹಿಂದೂ ಜನಸಂಖ್ಯೆಯನ್ನು ತಾವು ಸಹಿಸಿಕೊಳ್ಳುವುದಾಗಿ ಹೇಳುತ್ತಾರೆ. ಜರ್ದಾರಿ ಅವರೇ, ನಿಮ್ಮ ಹೇಳಿಕೆ ಸಂವೇದನಾರಹಿತವಾಗಿದೆ; ಅಲ್ಲದೆ, ಇದು ಅಲ್ಪಸಂಖ್ಯಾತರನ್ನು ಸಮಾನ ನಾಗರಿಕರನ್ನಾಗಿ ಪರಿಗಣಿಸುವ ಬದಲು ಕೇವಲ ಸಹಿಸಿಕೊಳ್ಳಲಾಗುತ್ತಿದೆ ಎಂಬ ಭಾವನೆಯನ್ನು ಮೂಡಿಸುತ್ತದೆ' ಎಂದು ಜಾವೇದ್ ಅಖ್ತರ್ ತಿರುಗೇಟು ನೀಡಿದ್ದಾರೆ.

ಅಖ್ತರ್ ಅವರು ಪಾಕಿಸ್ತಾನದ ನೀತಿಗಳು ಮತ್ತು ದ್ವಿಪಕ್ಷೀಯ ಸಂಬಂಧಗಳ ಕುರಿತಾದ ಅದರ ಧೋರಣೆಯ ವಿರುದ್ಧ ಆಗಾಗ್ಗೆ ಬಲವಾಗಿ ಧ್ವನಿ ಎತ್ತಿದ್ದಾರೆ. ಕಳೆದ ವರ್ಷದ ಮೇ ತಿಂಗಳಲ್ಲಿ ಮುಂಬೈನಲ್ಲಿ ನಡೆದ ಪುಸ್ತಕ ಬಿಡುಗಡೆ ಸಮಾರಂಭವೊಂದರಲ್ಲಿ, ಗಡಿಯಾಚೆಗಿನ ಭಯೋತ್ಪಾದನೆಗೆ ಬೆಂಬಲ ನೀಡಿದ್ದಕ್ಕಾಗಿ ಹಾಗೂ ಭಯೋತ್ಪಾದಕರು ತಮ್ಮ ಭೂಭಾಗವನ್ನು ಸುರಕ್ಷಿತ ತಾಣವನ್ನಾಗಿ ಬಳಸಿಕೊಳ್ಳಲು ಅವಕಾಶ ನೀಡಿದ್ದಕ್ಕಾಗಿ ಅವರು ಪಾಕಿಸ್ತಾನವನ್ನು ತೀವ್ರವಾಗಿ ಟೀಕಿಸಿದ್ದರು.

'ಪಾಕಿಸ್ತಾನದೊಂದಿಗಿನ ಸಂಬಂಧವನ್ನು ಸುಧಾರಿಸಲು ಭಾರತ ಯಾವಾಗಲೂ ಪ್ರಾಮಾಣಿಕ ಪ್ರಯತ್ನಗಳನ್ನು ಮಾಡಿದೆ. ನಾವು ಪಾಕಿಸ್ತಾನ ಮತ್ತು ಅಲ್ಲಿನ ಕಲಾವಿದರೊಂದಿಗೆ ಸಾಂಸ್ಕೃತಿಕ ಸಂಪರ್ಕದ ಮಾರ್ಗಗಳನ್ನು ತೆರೆದಿದ್ದೇವೆ. ಆದರೆ, ಒಂದೇ ಕೈಯಿಂದ ಚಪ್ಪಾಳೆ ತಟ್ಟಲು ಸಾಧ್ಯವಿಲ್ಲ; ಪರಿಸ್ಥಿತಿಯನ್ನು ಸುಧಾರಿಸಲು ಪಾಕಿಸ್ತಾನ ಎಂದಿಗೂ ಯಾವುದೇ ಗಂಭೀರ ಪ್ರಯತ್ನಗಳನ್ನು ಮಾಡಿಲ್ಲ' ಎಂದು ಜಮ್ಮು ಮತ್ತು ಕಾಶ್ಮೀರದ ಉದಾಹರಣೆಯನ್ನು ಉಲ್ಲೇಖಿಸುತ್ತಾ ಅಖ್ತರ್ ಹೇಳಿದರು.

2024ರ ಮಾರ್ಚ್‌ನಲ್ಲಿ ಜರ್ದಾರಿ ಪಾಕಿಸ್ತಾನದ 14ನೇ ಅಧ್ಯಕ್ಷರಾಗಿ ಪ್ರಮಾಣವಚನ ಸ್ವೀಕರಿಸಿದರು. ವಿಳಂಬ ಮತ್ತು ವ್ಯಾಪಕ ಮತ ಅಕ್ರಮದ ಆರೋಪಗಳಿಂದ ಕೂಡಿದ್ದ ಫೆಬ್ರುವರಿ 2024ರ ಸಾರ್ವತ್ರಿಕ ಚುನಾವಣೆಯ ನಂತರ, ಪಾಕಿಸ್ತಾನ ಮುಸ್ಲಿಂ ಲೀಗ್-ನವಾಜ್ (PMLN) ಮತ್ತು ಜರ್ದಾರಿ ಅವರ ಪಾಕಿಸ್ತಾನ ಪೀಪಲ್ಸ್ ಪಾರ್ಟಿ (PPP) ಮೈತ್ರಿ ಸರ್ಕಾರವನ್ನು ರಚಿಸುವಲ್ಲಿ ಯಶಸ್ವಿಯಾದವು.