ಡಿಜಿಟಲ್ ಯುಗದಲ್ಲೂ 100 ಪುಟಗಳ ಕೈಬರಹದ ಬಜೆಟ್‌ ಮಂಡಿಸಿ ಛತ್ತೀಸ್‌ಗಢ ಹಣಕಾಸು ಸಚಿವ ದಾಖಲೆ!

ರಾಯಪುರ: ಈ ಡಿಜಿಟಲ್ ಯುಗದಲ್ಲೂ, ಅದರಲ್ಲೂ ಛತ್ತೀಸ್‌ಗಢದ ಇತಿಹಾಸದಲ್ಲೇ ಮೊದಲ ಬಾರಿಗೆ, ಹಣಕಾಸು ಸಚಿವ ಒ.ಪಿ. ಚೌಧರಿ ಅವರು ಸ್ವತಃ ತಾವೇ ಕೈಯಿಂದ ಬರೆದ 100 ಪುಟಗಳ ಬಜೆಟ್ ಅನ್ನು ಮಂಡಿಸುವ ಮೂಲಕ ಹೊಸ ದಾಖಲೆ ಬರೆದಿದ್ದಾರೆ.

ಕೀಬೋರ್ಡ್‌ನಲ್ಲಿ ಟೈಪ್ ಮಾಡುವುದಕ್ಕಿಂತ ಕೈಯಿಂದ ಬರೆಯುವುದರಿಂದ ಸೃಜನಶೀಲತೆಯನ್ನು ಹೆಚ್ಚಿಸಬಹುದು, ನೆನಪಿನ ಶಕ್ತಿಯನ್ನು ಹೆಚ್ಚಿಸಿಕೊಳ್ಳಬಹುದು ಎಂದು ಸಂಶೋಧನೆ ಸೂಚಿಸುತ್ತದೆ. ಇದಕ್ಕೆ ಅನುಗುಣವಾಗಿ, ಬಿಜೆಪಿ ಆಡಳಿತದ ಛತ್ತೀಸ್‌ಗಢದ ಹಣಕಾಸು ಸಚಿವ ಮತ್ತು ಮಾಜಿ ಅಧಿಕಾರಿ ಒ.ಪಿ. ಚೌಧರಿ ಇತ್ತೀಚೆಗೆ ರಾಜ್ಯ ಬಜೆಟ್ ಅನ್ನು ಅಸಾಂಪ್ರದಾಯಿಕವಾಗಿ, ಆದರೆ ಮಹತ್ವದ ರೀತಿಯಲ್ಲಿ ಕೈಯಿಂದ ಬರೆದು ಮಂಡಿಸಿದ್ದಾರೆ.

ಛತ್ತೀಸ್‌ಗಢ ಹಣಕಾಸು ಸಚಿವರ ಈ ವಿಶೇಷ ಪ್ರಯತ್ನ ಸಂಪ್ರದಾಯಕ್ಕೆ ಮರಳುವಿಕೆಯನ್ನು ಸೂಚಿಸುತ್ತದೆ ಮತ್ತು ಆಡಳಿತದಲ್ಲಿ ಸ್ವಂತಿಕೆ ಹಾಗೂ ದೃಢೀಕರಣವನ್ನು ಉತ್ತೇಜಿಸುವ ಪ್ರಜ್ಞಾಪೂರ್ವಕ ಯತ್ನವೆಂದು ಪರಿಗಣಿಸಲಾಗಿದೆ.

"ಇದು ಸಂಪ್ರದಾಯಕ್ಕೆ ಮರಳುವಿಕೆ ಮತ್ತು ಸ್ವಂತಿಕೆಯನ್ನು ಉತ್ತೇಜಿಸುವ ಒಂದು ಹೆಜ್ಜೆಯಾಗಿದೆ. ಡಿಜಿಟಲ್ ಯುಗದಲ್ಲಿ ಕೈಬರಹದ ಬಜೆಟ್ ಅನ್ನು ಮಂಡಿಸುವುದು ಒಂದು ವಿಶಿಷ್ಟ ಗುರುತು ಮತ್ತು ಐತಿಹಾಸಿಕ ಮಹತ್ವವನ್ನು ಹೊಂದಿದೆ. ಇದು ದೃಢತೆ ಮತ್ತು ಪಾರದರ್ಶಕತೆಯನ್ನು ಉತ್ತೇಜಿಸುತ್ತದೆ" ಎಂದು ಚೌಧರಿ ಬಜೆಟ್ ಮಂಡಿಸಿದ ನಂತರ ದಿ ನ್ಯೂ ಇಂಡಿಯನ್ ಎಕ್ಸ್‌ಪ್ರೆಸ್‌ಗೆ ತಿಳಿಸಿದ್ದಾರೆ.

ಚೌಧರಿ ಅವರು 100 ಪುಟಗಳ ಬಜೆಟ್ ಅನ್ನು ಕೈಯಿಂದ ಬರೆದು ಪೂರ್ಣಗೊಳಿಸಲು ಮೂರು ರಾತ್ರಿ ನಿರಂತರವಾಗಿ ಕೆಲಸ ಮಾಡಿದ್ದಾರೆ ಎಂದು ಹಣಕಾಸು ಸಚಿವರ ಆಪ್ತರೊಬ್ಬರು ತಿಳಿಸಿದ್ದಾರೆ.

2005 ರ ಬ್ಯಾಚ್‌ನ ಐಎಎಸ್ ಅಧಿಕಾರಿಯಾಗಿದ್ದ ಚೌಧರಿ 2019 ರಲ್ಲಿ ಬಿಜೆಪಿ ಸೇರಲು ರಾಯ್‌ಪುರ ಕಲೆಕ್ಟರ್ ಹುದ್ದೆಗೆ ರಾಜೀನಾಮೆ ನೀಡಿದ್ದರು. ಯುಪಿಎಸ್‌ಸಿ ತಯಾರಿಯ ಸಮಯದಲ್ಲಿ ಅವರು ಅಧ್ಯಯನ ಮಾಡಿದ ಹಿಂದಿ ವಿಷಯದ ಮೇಲಿನ ಅವರ ಬಲವಾದ ಹಿಡಿತವು ಅವರ ಆದ್ಯತೆಯ ಶೈಲಿಯಲ್ಲಿ ಬಜೆಟ್ ಬರೆಯಲು ಸಹಾಯ ಮಾಡಿದೆ.