Voluntary disclosures: ಏರ್ ಇಂಡಿಯಾಗೆ ನಾಲ್ಕು ಶೋಕಾಸ್ ನೋಟಿಸ್‌ ನೀಡಿದ DGCA

ಮುಂಬೈ: ಕ್ಯಾಬಿನ್ ಸಿಬ್ಬಂದಿ ವಿಶ್ರಾಂತಿ ಮತ್ತು ಕರ್ತವ್ಯ ನಿಯಮಗಳು, ಕ್ಯಾಬಿನ್ ಸಿಬ್ಬಂದಿ ತರಬೇತಿ ನಿಯಮಗಳು ಮತ್ತು ಕಾರ್ಯಾಚರಣೆಯ ಕಾರ್ಯವಿಧಾನಗಳಿಗೆ ಸಂಬಂಧಿಸಿದ ವಿವಿಧ ಉಲ್ಲಂಘನೆಗಳಿಗಾಗಿ ನಾಗರಿಕ ವಿಮಾನಯಾನ ನಿರ್ದೇಶನಾಲಯ (ಡಿಜಿಸಿಎ) ಏರ್ ಇಂಡಿಯಾಗೆ ನಾಲ್ಕು ಶೋಕಾಸ್ ನೋಟಿಸ್‌ಗಳನ್ನು ಜಾರಿ ಮಾಡಿದೆ.

ವಿಮಾನಯಾನ ಸಂಸ್ಥೆಯು ಸ್ವಯಂಪ್ರೇರಣೆಯಿಂದ ಕೆಲವು ಮಾಹಿತಿಯನ್ನು ಡಿಜಿಸಿಎ ಜೊತೆಗೆ ಹಂಚಿಕೊಂಡ ಒಂದು ತಿಂಗಳ ನಂತರ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಗುರುವಾರ ಮೂಲಗಳು ತಿಳಿಸಿವೆ.

ಜೂನ್ 20 ಮತ್ತು 21 ರಂದು ನಾಗರಿಕ ವಿಮಾನಯಾನ ನಿರ್ದೇಶನಾಲಯಕ್ಕೆ (ಡಿಜಿಸಿಎ) ವಿಮಾನಯಾನ ಸಂಸ್ಥೆಯು ಸ್ವಯಂಪ್ರೇರಿತವಾಗಿ ನೀಡಿದ ಕೆಲವು ಮಾಹಿತಿಗಳ ಆಧಾರದ ಮೇಲೆ ಜುಲೈ 23 ರಂದು ಶೋಕಾಸ್ ನೋಟಿಸ್‌ಗಳನ್ನು ನೀಡಲಾಗಿದೆ ಎಂದು ಮೂಲಗಳು ಸುದ್ದಿಸಂಸ್ಥೆ ಪಿಟಿಐಗೆ ತಿಳಿಸಿವೆ.

'ಕಳೆದ ಒಂದು ವರ್ಷದಿಂದ ಏರ್ ಇಂಡಿಯಾ ಹಂಚಿಕೊಂಡ ಕೆಲವು ಸ್ವಯಂಪ್ರೇರಿತ ಮಾಹಿತಿಗಳಿಗೆ ಸಂಬಂಧಿಸಿದ ಈ ನೋಟಿಸ್‌ಗಳನ್ನು ಡಿಜಿಸಿಎ ಇಂದ ನೋಟಿಸ್‌ಗಳನ್ನು ಸ್ವೀಕರಿಸಲಾಗಿದೆ ಎಂದು ನಾವು ಒಪ್ಪಿಕೊಳ್ಳುತ್ತೇವೆ. ನಿಗದಿತ ಅವಧಿಯೊಳಗೆ ನಾವು ಈ ನೋಟಿಸ್‌ಗಳಿಗೆ ಪ್ರತಿಕ್ರಿಯಿಸುತ್ತೇವೆ. ನಮ್ಮ ಸಿಬ್ಬಂದಿ ಮತ್ತು ಪ್ರಯಾಣಿಕರ ಸುರಕ್ಷತೆಗೆ ನಾವು ಬದ್ಧರಾಗಿರುತ್ತೇವೆ' ಎಂದು ಏರ್ ಇಂಡಿಯಾ ವಕ್ತಾರರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ಜೂನ್ 20 ರಂದು ಏರ್ ಇಂಡಿಯಾ ಸ್ವಯಂಪ್ರೇರಿತವಾಗಿ ಮಾಹಿತಿ ಹಂಚಿಕೊಂಡಿತು. ಇದರ ಆಧಾರದ ಮೇಲೆ, ಅಧಿಕಾರಿಗಳು ಮೂರು ಶೋಕಾಸ್ ನೋಟಿಸ್‌ಗಳನ್ನು ನೀಡಿದ್ದಾರೆ. ಮೂಲಗಳ ಪ್ರಕಾರ, ಈ ನೋಟಿಸ್‌ಗಳು ಕ್ಯಾಬಿನ್ ಸಿಬ್ಬಂದಿ ಕರ್ತವ್ಯ ಮತ್ತು ವಿಶ್ರಾಂತಿ ನಿಯಮಗಳ ಉಲ್ಲಂಘನೆಗೆ ಸಂಬಂಧಿಸಿವೆ. ಕನಿಷ್ಠ ನಾಲ್ಕು ಅಲ್ಟ್ರಾ-ಲಾಂಗ್-ಹಲ್ ವಿಮಾನಗಳ ಕಾರ್ಯಾಚರಣೆ ಸಮಯದಲ್ಲಿ ಉಲ್ಲಂಘನೆಗಳು ಸಂಭವಿಸಿವೆ. ಏಪ್ರಿಲ್ 27 ರಂದು ಎರಡು ವಿಮಾನಗಳು, ಏಪ್ರಿಲ್ 28 ಮತ್ತು ಮೇ 2 ರಂದು ತಲಾ ಒಂದು ವಿಮಾನಗಳ ಕಾರ್ಯಾಚರಣೆ ವೇಳೆ ಸಂಭವಿಸಿವೆ.

ಮೂಲಗಳ ಪ್ರಕಾರ, 2024ರ ಜುಲೈ 26, 2024ರ ಅಕ್ಟೋಬರ್ 9 ಮತ್ತು 2025ರ ಏಪ್ರಿಲ್ 22 ರಂದು ಕಾರ್ಯನಿರ್ವಹಿಸಿದ ವಿಮಾನಗಳು ಸೇರಿದಂತೆ ಕನಿಷ್ಠ ನಾಲ್ಕು ವಿಮಾನಗಳಿಗೆ ಸಂಬಂಧಿಸಿದಂತೆ ಸಿಬ್ಬಂದಿ ತರಬೇತಿ ಮತ್ತು ಕಾರ್ಯಾಚರಣೆಯ ಕಾರ್ಯವಿಧಾನದಲ್ಲಿ ಉಲ್ಲಂಘನೆಗಳು ನಡೆದಿವೆ.

ಡಿಜಿಸಿಎ ಶೋಕಾಸ್ ನೋಟಿಸ್‌ಗಳಲ್ಲಿ ಒಂದು 2024ರ ಜೂನ್ 24 ಮತ್ತು 2025ರ ಜೂನ್ 13 ರಂದು ಕಾರ್ಯನಿರ್ವಹಿಸಿದ ವಿಮಾನಗಳಿಗೆ ಸಂಬಂಧಿಸಿದಂತೆ ವಿಮಾನ ಕರ್ತವ್ಯದ ಅವಧಿ/ವಾರದ ವಿಶ್ರಾಂತಿ ಉಲ್ಲಂಘನೆಗಳಿಗೆ ಸಂಬಂಧಿಸಿದೆ ಎಂದು ಅವರು ಹೇಳಿದರು.

ಮತ್ತೊಂದು ಶೋಕಾಸ್ ನೋಟಿಸ್ ಜೂನ್ 21 ರಂದು ವಿಮಾನಯಾನ ಸಂಸ್ಥೆ ಮಾಡಿದ ಸ್ವಯಂಪ್ರೇರಿತ ಮಾಹಿತಿ ಬಹಿರಂಗಪಡಿಸುವಿಕೆಗಳನ್ನು ಆಧರಿಸಿದೆ. ಇದು ಕ್ಯಾಬಿನ್ ಸಿಬ್ಬಂದಿ ತರಬೇತಿ ಮತ್ತು ಕಾರ್ಯಾಚರಣಾ ಕಾರ್ಯವಿಧಾನಗಳು ಸೇರಿದಂತೆ ಮೂರು ನಿರ್ದಿಷ್ಟ ಉಲ್ಲಂಘನೆಗಳಿಗೆ ಸಂಬಂಧಿಸಿದೆ. ಏಪ್ರಿಲ್ 10-11, ಫೆಬ್ರುವರಿ 16-ಮೇ 19 ಮತ್ತು ಡಿಸೆಂಬರ್ 1, 2024 ರಂದು ಕಾರ್ಯನಿರ್ವಹಿಸಿದ ಕೆಲವು ವಿಮಾನಗಳಲ್ಲಿ ಈ ಉಲ್ಲಂಘನೆಗಳು ಸಂಭವಿಸಿವೆ ಎಂದು ಮೂಲಗಳು ತಿಳಿಸಿವೆ.

ಈಮಧ್ಯೆ, ಜೂನ್ 12 ರಂದು ಲಂಡನ್ ಗ್ಯಾಟ್ವಿಕ್‌ಗೆ ತೆರಳುತ್ತಿದ್ದ ಏರ್ ಇಂಡಿಯಾದ ಬೋಯಿಂಗ್ 787-8 ವಿಮಾನವು ಅಹಮದಾಬಾದ್‌ನಿಂದ ಟೇಕಾಫ್ ಆದ ಸ್ವಲ್ಪ ಸಮಯದ ನಂತರ ಕಟ್ಟಡಕ್ಕೆ ಅಪ್ಪಳಿಸಿತು. ಅಪಘಾತದಲ್ಲಿ ಒಟ್ಟು 260 ಜನರು ಸಾವಿಗೀಡಾಗಿದ್ದರು.